Kozhikode, 04 ജൂണ് (H.S.)

കോഴിക്കോട്: യു.ഡി.എഫ് മന്ത്രിസഭയിലെ മുസ്ലിം ലീഗ് മന്ത്രിമാരുടെ പഴ്സനൽ സ്റ്റാഫ് നിയമനവുമായി ബന്ധപ്പെട്ട് പാർട്ടിക്കുള്ളിൽ തർക്കങ്ങൾ പുകയുന്നു. സംസ്ഥാന നേതൃത്വം ഔദ്യോഗികമായി തയാറാക്കി നൽകിയ പാനൽ പൂർണ്ണമായും തള്ളിക്കളഞ്ഞ് മന്ത്രിമാർ സ്വന്തം താല്പര്യപ്രകാരം ആളുകളെ തിരുകിക്കയറ്റിയതാണ് പുതിയ പ്രതിസന്ധിക്ക് കാരണമായിരിക്കുന്നത്. ഇതോടെ പാർട്ടിയുടെ നിയന്ത്രണങ്ങൾക്ക് വഴങ്ങാതെ മന്ത്രിമാർ സ്വന്തം നിലയ്ക്ക് മുന്നോട്ട് പോകുന്നതിനെതിരെ ലീഗ് അണികളിലും വലിയ അമർഷം രൂപപ്പെട്ടിട്ടുണ്ട്.

അഞ്ചംഗ മന്ത്രിമാരാണ് ഇത്തവണ ലീഗിന് മന്ത്രിസഭയിലുള്ളത്. മുൻകാലങ്ങളിലെ അനുഭവങ്ങളുടെ വെളിച്ചത്തിൽ, മന്ത്രിമാരുടെ ഓഫിസുകൾ കേന്ദ്രീകരിച്ച് ബന്ധുനിയമനങ്ങളും അഴിമതി ആരോപണങ്ങളും ഉണ്ടാകാതിരിക്കാൻ പാർട്ടി നേതൃത്വം ഇത്തവണ കർശനമായ മുൻകരുതലുകൾ എടുത്തിരുന്നു. ഇതിനായി സംസ്ഥാന പ്രസിഡന്റ് സാദിഖലി ശിഹാബ് തങ്ങളുടെ നിർദേശപ്രകാരം പ്രത്യേക സമിതിയെ നിയോഗിക്കുകയും ചെയ്തു. പാണക്കാട് റഷീദലി തങ്ങൾ, സംസ്ഥാന ജനറൽ സെക്രട്ടറി പി.എം.എ. സലാം എന്നിവർക്കായിരുന്നു ഇതിന്റെ ചുമതല.

ഗ്രാമീണ കമ്മറ്റികൾ മുതൽ ജില്ലാ ഘടകങ്ങൾ വരെ നൽകിയ നിർദേശങ്ങളും സർവീസ് സംഘടനകളിൽ നിന്നുള്ള അപേക്ഷകളും പരിഗണിച്ചാണ് ഈ സമിതി പ്രവർത്തിച്ചത്. അയ്യായിരത്തോളം അപേക്ഷകരിൽ നിന്നും യോഗ്യതകൾ വിലയിരുത്തി ഒരു പ്രഫഷണൽ ഏജൻസിയുടെ സഹായത്തോടെ 150 പേരുടെ അന്തിമ പട്ടിക സമിതി തയാറാക്കി. ഓരോ മന്ത്രിയും തങ്ങളുടെ സ്റ്റാഫിലെ പ്രധാനപ്പെട്ട 15 പേരെ ഈ ഔദ്യോഗിക പട്ടികയിൽ നിന്ന് മാത്രമേ നിയമിക്കാവൂ എന്ന് സാദിഖലി തങ്ങൾ കർശനമായി നിർദേശിച്ചിരുന്നു. ജൂൺ ഒന്നിന് മുൻപായി നിയമന ഉത്തരവുകൾ നൽകാനായിരുന്നു തീരുമാനം.

എന്നാൽ, പാർട്ടിയുടെ ഈ ശുപാർശകളെല്ലാം അപ്രസക്തമാക്കിക്കൊണ്ട് മന്ത്രിമാരുടെ ഓഫിസുകളിൽ 90 ശതമാനത്തിലേറെ നിയമനങ്ങളും ഇതിനകം തന്നെ രഹസ്യമായി പൂർത്തിയായിക്കഴിഞ്ഞു എന്നാണ് പുറത്തുവരുന്ന വിവരങ്ങൾ. പാർട്ടി പട്ടികയിൽ ഇടംപിടിച്ച ഉദ്യോഗാർത്ഥികൾ പ്രതീക്ഷയോടെ തിരുവനന്തപുരത്ത് എത്തിയപ്പോഴാണ് തങ്ങൾ പൂർണ്ണമായും തഴയപ്പെട്ടതായി മനസ്സിലാക്കിയത്. പേരിന് മാത്രമായി മൂന്നോ നാലോ പേരെ മാത്രമാണ് നിലവിൽ ഉൾപ്പെടുത്താൻ മന്ത്രിമാർ തയ്യാറായിട്ടുള്ളത്.

നേതൃത്വത്തെ പൂർണ്ണമായും നോക്കുകുത്തിയാക്കി, യാതൊരുവിധ ആലോചനകളും നടത്താതെ മന്ത്രിമാർ നടത്തിയ ഈ ഏകപക്ഷീയമായ നീക്കം ലീഗിൽ വലിയൊരു വിഭാഗം നേതാക്കൾക്കിടയിൽ കടുത്ത പ്രതിഷേധത്തിന് വഴിവെച്ചിട്ടുണ്ട്. അച്ചടക്കമുള്ള ഒരു പാർട്ടി സംവിധാനത്തിൽ മന്ത്രിമാരും സംഘടനയും ഇരുധ്രുവങ്ങളിൽ സഞ്ചരിക്കുന്നത് വരും ദിവസങ്ങളിൽ കൂടുതൽ ആഭ്യന്തര കലഹങ്ങളിലേക്ക് നയിച്ചേക്കുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.

---------------

Hindusthan Samachar / Roshith K