Thruvananthapuram , 07 ജൂണ് (H.S.)

തിരുവനന്തപുരം: വിവാദങ്ങൾക്കും ഭരണതലത്തിലെ കടുത്ത വിയോജിപ്പുകൾക്കുമൊടുവിൽ ഐഎഎസ് ഉദ്യോഗസ്ഥരായ ഡോ. ബി. അശോകിന്റെയും എൻ. പ്രശാന്തിന്റെയും സസ്പെൻഷൻ പിൻവലിച്ചുകൊണ്ട് പൊതുഭരണ വകുപ്പ് ഔദ്യോഗിക ഉത്തരവിറക്കി. കഴിഞ്ഞ പിണറായി വിജയൻ സർക്കാരിന്റെ കാലത്ത് അച്ചടക്ക നടപടിയുടെ ഭാഗമായി സർവീസിന് പുറത്താക്കപ്പെട്ട ഇരുവർക്കുമെതിരെയുള്ള സസ്പെൻഷൻ നടപടികളാണ് പുതിയ യുഡിഎഫ് (UDF) സർക്കാർ റദ്ദാക്കിയത്. കേവലം ഭരണകൂടത്തെയും വ്യക്തികളെയും വിമർശിച്ചു എന്നതിന്റെ പേരിൽ ഐഎഎസ് ഉദ്യോഗസ്ഥർക്കെതിരെ സ്വീകരിച്ച നടപടികൾ അനാവശ്യവും ജനാധിപത്യവിരുദ്ധവുമാണെന്ന രാഷ്ട്രീയ നിലപാടിന്റെ അടിസ്ഥാനത്തിലാണ് പുതിയ സർക്കാരിന്റെ ഈ നീക്കം.

മുൻ എൽഡിഎഫ് സർക്കാരിന്റെ വിവാദ ഉത്തരവുകളും നയങ്ങളും തുടരെത്തുടരെ തിരുത്തുന്നതിന്റെ ഭാഗമായാണ് മുഖ്യമന്ത്രി വി. ഡി. സതീശൻ ഈ ഫയലിൽ ഒപ്പുവെച്ചത്. സംസ്ഥാനത്ത് കടുത്ത ഐഎഎസ് ഉദ്യോഗസ്ഥ ക്ഷാമം നേരിടുന്ന പശ്ചാത്തലത്തിൽ, യോഗ്യരായ രണ്ട് മുതിർന്ന ഉദ്യോഗസ്ഥരെ ദീർഘകാലം ഭരണരംഗത്ത് നിന്ന് മാറ്റിനിർത്തുന്നത് ഭരണസ്തംഭനത്തിന് കാരണമാകുമെന്നും വിലയിരുത്തലുണ്ടായി.

ചീഫ് സെക്രട്ടറിയുടെ വിയോജിപ്പ് തള്ളി മുഖ്യമന്ത്രി

സസ്പെൻഷൻ പിൻവലിക്കാനുള്ള ആഭ്യന്തര വകുപ്പിന്റെയും മുഖ്യമന്ത്രിയുടെയും തീരുമാനത്തിൽ ചീഫ് സെക്രട്ടറി ഡോ. എ. ജയതിലകിന് കടുത്ത വിയോജിപ്പുണ്ടായിരുന്നു എന്നാണ് പുറത്തുവരുന്ന വിവരങ്ങൾ. താൻ സർവീസിൽ നിന്ന് വിരമിച്ചതിനു ശേഷം മാത്രമേ എൻ. പ്രശാന്തിനെയും ബി. അശോകിനെയും വീണ്ടും സർവീസിൽ പ്രവേശിപ്പിക്കാവൂ എന്ന ശക്തമായ നിലപാടിലായിരുന്നു ചീഫ് സെക്രട്ടറി. തന്റെ ഔദ്യോഗിക പദവിയെ അധിക്ഷേപിച്ച ഉദ്യോഗസ്ഥരെ തിരികെ പ്രവേശിപ്പിക്കുന്നത് സിവിൽ സർവീസിന്റെ അച്ചടക്കത്തെ ബാധിക്കുമെന്ന വാദമാണ് ചീഫ് സെക്രട്ടറി ഉന്നയിച്ചത്.

എന്നാൽ, മുൻ സർക്കാരിന്റെ രാഷ്ട്രീയ പകപോക്കലുകൾക്ക് ഉദ്യോഗസ്ഥ ഭരണസംവിധാനത്തെ വിട്ടുകൊടുക്കാൻ കഴിയില്ലെന്ന വ്യക്തമായ രാഷ്ട്രീയ നിലപാടാണ് മുഖ്യമന്ത്രി വി. ഡി. സതീശൻ സ്വീകരിച്ചത്. ചീഫ് സെക്രട്ടറിയുടെ വിയോജനക്കുറിപ്പും വാദങ്ങളും പൂർണ്ണമായും തള്ളിക്കൊണ്ടാണ് മുഖ്യമന്ത്രി സസ്പെൻഷൻ പൂട്ട് പൊളിച്ച് ഫയലിൽ ഒപ്പിട്ടത്.

നടപടികളിലേക്ക് നയിച്ച പശ്ചാത്തലം

മുൻ മുഖ്യമന്ത്രി പിണറായി വിജയന്റെ നയങ്ങളെയും ഇടതുപക്ഷ സർക്കാരിന്റെ പ്രവർത്തന ശൈലിയെയും പരസ്യമായി മാധ്യമങ്ങളിലൂടെ വിമർശിച്ചതിനാണ് 1998 ബാച്ച് ഐഎഎസ് ഉദ്യോഗസ്ഥനായ ഡോ. ബി. അശോകിനെതിരെ കഴിഞ്ഞ മാസങ്ങളിൽ നടപടിയുണ്ടായത്. അനുമതിയില്ലാതെ മാധ്യമങ്ങൾക്ക് അഭിമുഖം നൽകുകയും സർക്കാരിന്റെ പ്രതിച്ഛായയ്ക്ക് മങ്ങലേൽപ്പിക്കുകയും ചെയ്തു എന്നതായിരുന്നു അദ്ദേഹത്തിനെതിരായ കുറ്റം.

2007 ബാച്ച് ഉദ്യോഗസ്ഥനായ എൻ. പ്രശാന്ത് (കളക്ടർ ബ്രോ) മുൻ അഡീഷണൽ ചീഫ് സെക്രട്ടറിയും നിലവിലെ ചീഫ് സെക്രട്ടറിയുമായ ഡോ. എ. ജയതിലകിനെതിരെ സോഷ്യൽ മീഡിയയിലൂടെ കടുത്ത ഭാഷയിൽ ട്രോളുകളും വിമർശനങ്ങളും ഉന്നയിച്ചതിനാണ് സസ്പെൻഷനിലായത്. പ്രശാന്തിന്റെ സസ്പെൻഷൻ പലതവണ നീട്ടിക്കൊണ്ടുപോയ മുൻ സർക്കാർ, അദ്ദേഹം ലോട്ടറി വിൽപ്പനയെക്കുറിച്ച് എഴുതിയ ലേഖനത്തിന്റെ പേരിൽ ഒൻപതാമതും നടപടി സ്വീകരിച്ചിരുന്നു.

ഈ രണ്ട് ഐഎഎസ് ഉദ്യോഗസ്ഥരെയും തിരിച്ചെടുത്തതോടെ യുഡിഎഫ് സർക്കാർ തങ്ങളുടെ രാഷ്ട്രീയ മുൻഗണനകൾ വ്യക്തമാക്കുകയാണ്. വരും ദിവസങ്ങളിൽ സിവിൽ സർവീസ് ബോർഡ് യോഗം ചേർന്ന് ഇരുവർക്കും പ്രധാനപ്പെട്ട വകുപ്പുകളിൽ പുതിയ ചുമതലകൾ നൽകുമെന്നാണ് സെക്രട്ടേറിയറ്റ് വൃത്തങ്ങളിൽ നിന്നുള്ള സൂചന.

---------------

Hindusthan Samachar / Roshith K