alapuzha, 07 ജൂണ് (H.S.)

ആലപ്പുഴ: ജില്ലയിലെ മോട്ടോർ വാഹന വകുപ്പ് (എം.വി.ഡി) ഓഫീസുകൾ കടുത്ത വൈദ്യുതി തടസത്തെ തുടർന്ന് വലിയ പ്രതിസന്ധി നേരിടുന്നു. സംസ്ഥാനത്ത് കാലവർഷം കനക്കുകയും കാറ്റും മഴയും ശക്തമാകുകയും ചെയ്യുന്ന സാഹചര്യത്തിൽ, ഡ്രൈവിംഗ് പരിശീലകർക്കും വിദ്യാർത്ഥികൾക്കുമായുള്ള ലേണേഴ്സ് പരീക്ഷകൾ ഉൾപ്പെടെയുള്ള ഓഫീസ് സേവനങ്ങൾ പൂർണ്ണമായും അവതാളത്തിലാകുന്ന അവസ്ഥയാണ് നിലവിലുള്ളത്. വേനൽക്കാലത്ത് നേരിട്ട കടുത്ത വൈദ്യുതി പ്രതിസന്ധിക്ക് പിന്നാലെ, ലൈനുകളിലെ ഓവർലോഡ് താങ്ങാനാകാതെ കെ.എസ്.ഇ.ബി സംവിധാനങ്ങൾ അടിക്കടി ഡ്രിപ്പാകാൻ തുടങ്ങിയത് മുതലാണ് മോട്ടോർ വാഹന വകുപ്പ് ഓഫീസുകളിൽ ഈ ദുരിതം ആരംഭിച്ച് തുടർന്നുകൊണ്ടിരിക്കുന്നത്.

ഓഫീസുകളുടെ പ്രവൃത്തിസമയത്ത് തുടർച്ചയായുണ്ടാകുന്ന അപ്രതീക്ഷിത വൈദ്യുതി തടസം ലേണേഴ്സ് ടെസ്റ്റുകൾ സമയബന്ധിതമായി പൂർത്തിയാക്കാൻ കഴിയാത്ത സാഹചര്യമാണ് സൃഷ്ടിക്കുന്നത്. ഇതേത്തുടർന്ന് പരീക്ഷാർത്ഥികളും പൊതുജനങ്ങളും ഉദ്യോഗസ്ഥരും തമ്മിൽ വലിയ രീതിയിലുള്ള വാഗ്വാദങ്ങളും പ്രതിഷേധങ്ങളും ഓഫീസുകളിൽ പതിവായിരിക്കുകയാണ്. പ്രത്യേകിച്ച് കൃത്യമായ ജനറേറ്റർ അല്ലെങ്കിൽ ഇൻവെർട്ടർ ബാക്കപ്പ് സംവിധാനങ്ങൾ ഇല്ലാത്ത ജോയിന്റ് ആർ.ടി ഓഫീസുകളിലാണ് നിലവിൽ പ്രതിസന്ധി ഏറ്റവും ഗുരുതരമായി തുടരുന്നത്. ഇത് ജീവനക്കാരുടെ ജോലിഭാരം ഇരട്ടിയാക്കാനും കാരണമാകുന്നുണ്ട്.

മദ്ധ്യവേനലവധി പ്രമാണിച്ചു വിദ്യാർത്ഥികൾ ഉൾപ്പെടെ നൂറുകണക്കിന് ആളുകളാണ് കഴിഞ്ഞ രണ്ടു മാസമായി വിവിധ ഡ്രൈവിംഗ് സ്കൂളുകളിൽ പരിശീലനത്തിനായി ചേർന്നത്. ഓൺലൈൻ വഴി മുൻകൂട്ടി തീയതിയും സമയവും ബുക്ക് ചെയ്താണ് പരീക്ഷാർത്ഥികൾ ലേണേഴ്സ് ടെസ്റ്റിനായി ഓഫീസുകളിൽ എത്തുന്നത്. ആകെ ലഭ്യമാകുന്ന 30 ചോദ്യങ്ങളിൽ നിന്ന് 18 എണ്ണത്തിന് കൃത്യമായി ശരിയുത്തരം നൽകി 30 മിനിറ്റിനുള്ളിൽ പൂർത്തിയാക്കേണ്ട കമ്പ്യൂട്ടർ അധിഷ്ഠിത പരീക്ഷയാണിത്. എന്നാൽ, പരീക്ഷ എഴുതിക്കൊണ്ടിരിക്കുന്നതിനിടയിൽ പെട്ടെന്ന് കറന്റ് പോകുന്നത് വലിയ പ്രതിസന്ധിയാണ് സൃഷ്ടിക്കുന്നത്. കറന്റ് തിരികെ വരുന്നത് വരെ മണിക്കൂറുകളോളം കാത്തിരുന്നാൽ മാത്രമേ പരീക്ഷ പൂർത്തിയാക്കാൻ ഇവർക്ക് സാധിക്കുന്നുള്ളൂ. പലർക്കും നിശ്ചിത സമയത്തിനുള്ളിൽ പരീക്ഷ പൂർത്തിയാക്കാൻ കഴിയാതെ അക്കൗണ്ട് ലോക്കാകുന്ന അവസ്ഥയുമുണ്ട്.

ലേണേഴ്സ് പരീക്ഷയ്ക്കായി മാറ്റിവെച്ചിരിക്കുന്ന കമ്പ്യൂട്ടർ സിസ്റ്റങ്ങൾക്ക് ഇൻവെർട്ടറിന്റെയോ ജനറേറ്ററിന്റെയോ അടിയന്തര സേവനം ലഭ്യമാക്കാത്തതാണ് പ്രധാന വില്ലൻ. ചില ഓഫീസുകളിൽ ജനറേറ്ററുകൾ മുൻപ് സ്ഥാപിച്ചിട്ടുണ്ടെങ്കിലും വർഷങ്ങൾ പഴക്കമുള്ളതും കൃത്യമായ അറ്റകുറ്റപ്പണികൾ നടത്താത്തതും കാരണം അവയൊന്നും നിലവിൽ പ്രവർത്തനക്ഷമമല്ല. ഒരു ദിവസം കുറഞ്ഞത് 50 പേരെങ്കിലും ലേണേഴ്സ് പരീക്ഷയ്ക്കായി ഓരോ ഓഫീസിലും എത്തുന്നുണ്ട്. വൈദ്യുതി മുടങ്ങുന്നത് വഴി പരീക്ഷകൾ നീണ്ടുപോകുന്നത് മോട്ടോർ വാഹന വകുപ്പിന്റെ മറ്റ് ദൈനംദിന ഓഫീസ് പ്രവർത്തനങ്ങളെയും ഫയൽ നീക്കങ്ങളെയും ലൈസൻസ് വിതരണത്തെയും ദോഷകരമായി ബാധിക്കുന്നുണ്ട്. കൂടാതെ തുടർച്ചയായുള്ള ലോഡ്ഷെഡിംഗും കറന്റ് വന്നുപോകുന്നതും ഓഫീസിലെ വിലകൂടിയ കമ്പ്യൂട്ടറുകൾ അടക്കമുള്ള ഇലക്ട്രോണിക് ഉപകരണങ്ങളുടെ സാങ്കേതിക തകരാറുകൾക്കും സർവർ തകരാറുകൾക്കും കാരണമാകുന്നു.

വരും ദിവസങ്ങളിൽ കാലവർഷം കൂടുതൽ ശക്തമാകാനിരിക്കെ കാറ്റിലും മഴയിലും മരങ്ങൾ കടപുഴകി വീണും മറ്റും വൈദ്യുതി മുടക്കം പതിവാകാൻ snake സാദ്ധ്യതയേറെയാണ്. ഡ്രൈവിംഗ് പരിശീലനത്തിലും റോഡ് ടെസ്റ്റുകളിലും കർശനമായ ഉന്നത നിലവാരം സർക്കാർ നിഷ്കർഷിക്കുമ്പോൾ, പരീക്ഷാർത്ഥികൾക്ക് കുറ്റമറ്റ രീതിയിൽ ലേണേഴ്സ് ടെസ്റ്റ് എഴുതാനുള്ള അടിസ്ഥാന സൗകര്യങ്ങൾ ഒരുക്കാൻ മോട്ടോർ വാഹന വകുപ്പ് അധികൃതർ തയ്യാറാകണമെന്ന് ഡ്രൈവിംഗ് സ്കൂൾ അസോസിയേഷൻ പ്രതിനിധികൾ ആവശ്യപ്പെടുന്നു. ആർ.ടി ഓഫീസുകളിൽ അടിയന്തരമായി യു.പി.എസ്, പുതിയ ജനറേറ്റർ സംവിധാനങ്ങൾ സ്ഥാപിച്ച് ഈ സാങ്കേതിക പ്രതിസന്ധി പരിഹരിക്കണമെന്നാണ് പൊതുജനങ്ങളുടെ ശക്തമായ ആവശ്യം.

---------------

Hindusthan Samachar / Roshith K