Thiruvananthapuram, 08 ജൂണ് (H.S.)

കൊച്ചി: ശബരിമല അയ്യപ്പ ക്ഷേത്രത്തിലെ സ്വർണ്ണക്കൊള്ളയുമായി ബന്ധപ്പെട്ടും, 2025-ൽ ശ്രീകോവിലിന് മുന്നിലെ ദ്വാരപാലക ശില്പം പുറത്തേക്ക് കൊണ്ടുപോയ സംഭവത്തിലും അന്വേഷണം അവസാനഘട്ടത്തിലെന്ന് പ്രത്യേക അന്വേഷണസംഘം (SIT). കേസിൽ കുറ്റകൃത്യത്തിൽ ഏർപ്പെട്ടവരുടെ പൂർണ്ണമായ വിശദാംശങ്ങൾ തങ്ങളുടെ അടുത്ത പ്രോഗ്രസ് റിപ്പോർട്ടിലൂടെ കോടതിയെ അറിയിക്കുമെന്നും ഹൈക്കോടതിയിൽ സമർപ്പിച്ച റിപ്പോർട്ടിൽ എസ്.ഐ.ടി വ്യക്തമാക്കി.

ജസ്റ്റിസ് രാജ വിജയരാഘവൻ, ജസ്റ്റിസ് കെ.വി. ജയകുമാർ എന്നിവരടങ്ങിയ ഹൈക്കോടതി ഡിവിഷൻ ബെഞ്ചിന് മുന്നിലാണ് അന്വേഷണസംഘം നിർണ്ണായകമായ ഈ പുരോഗതി റിപ്പോർട്ട് സമർപ്പിച്ചത്. കേസിൽ ശാസ്ത്രീയ തെളിവുകൾ ശേഖരിക്കുന്നതിനായി ശബരിമലയിലെ പ്രഭാമണ്ഡലത്തിന്റെയും ശ്രീകോവിൽ വാതിലിന്റെ മുകൾഭാഗത്തെയും സ്വർണ്ണം പൂശിയ പാളികൾ ഇളക്കി മാറ്റി സാമ്പിളുകൾ ശേഖരിക്കാൻ ഹൈക്കോടതി എസ്.ഐ.ടിക്ക് അനുമതി നൽകി.

ചെന്നൈ കേന്ദ്രീകരിച്ച് അന്വേഷണം; 1998-ലെ ഇടപാടുകളിലേക്കും

ശബരിമലയിലെ സ്വർണ്ണം പൂശിയതും സ്വർണ്ണം പൊതിഞ്ഞതുമായ ചെമ്പ് പാളികളെ കുറിച്ച് സമഗ്രമായ അന്വേഷണമാണ് ഇപ്പോൾ നടക്കുന്നത്. 2025-ൽ ദ്വാരപാലക ശില്പങ്ങൾ ഇളക്കിമാറ്റി ചെന്നൈയിലേക്ക് കൊണ്ടുപോയതുമായി ബന്ധപ്പെട്ട് ചെന്നൈ കേന്ദ്രീകരിച്ച് കൂടുതൽ അന്വേഷണം വേണമെന്ന് എസ്.ഐ.ടി കോടതിയിൽ ആവശ്യപ്പെട്ടു.

കേസിന്റെ വേരുകൾ തേടി 1998-ൽ ശബരിമലയിൽ നടന്ന ചെമ്പ് പാളി സമർപ്പണങ്ങളിലേക്കും അന്വേഷണം വ്യാപിപ്പിക്കാനാണ് എസ്.ഐ.ടിയുടെ തീരുമാനം. അന്നത്തെ ഇടപാടുകളുടെ രേഖകളും സാമ്പത്തിക സ്രോതസ്സുകളും സംഘം പരിശോധിക്കും. ഇതിനുപുറമെ, 2019-ൽ ചെന്നൈയിലെ 'സ്മാർട്ട് ക്രിയേഷൻസ്' എന്ന സ്ഥാപനം പ്രത്യേക തരം കെമിക്കൽ സാൾട്ട് (Stripping Salt) ഉപയോഗിച്ച് ശില്പങ്ങളിൽ നിന്നും മറ്റും സ്വർണ്ണം വേർതിരിച്ചെടുത്തതായി അന്വേഷണത്തിൽ കണ്ടെത്തിയിട്ടുണ്ട്. ഇതിനായി ഉപയോഗിച്ച രാസവസ്തുക്കളുടെ സാമ്പിളുകൾ നിലവിൽ ജംഷഡ്പൂരിലെ നാഷണൽ മെറ്റലർജിക്കൽ ലബോറട്ടറിയിലേക്ക് (NML) ശാസ്ത്രീയ പരിശോധനയ്ക്കായി അയച്ചിരിക്കുകയാണ്.

വിക്രം സാരാഭായ് സ്പേസ് സെന്ററിന്റെ (VSSC) കണ്ടെത്തലുകൾ

ശബരിമലയിൽ നടന്ന സ്വർണ്ണ ചോർച്ചയുടെ യഥാർത്ഥ രീതി കണ്ടെത്താൻ വിക്രം സാരാഭായ് സ്പേസ് സെന്റർ (VSSC), ജംഷഡ്പൂർ ലബോറട്ടറി എന്നിവ നൽകിയ ശാസ്ത്രീയ റിപ്പോർട്ടുകൾ അന്വേഷണസംഘത്തിന് ഏറെ സഹായകരമായിട്ടുണ്ട്. സ്വർണ്ണത്തിന്റെ അളവിൽ വന്ന കുറവും അത് തട്ടിയെടുക്കാൻ ഉപയോഗിച്ച സാങ്കേതിക മാർഗ്ഗങ്ങളും ഈ റിപ്പോർട്ടുകളിലൂടെ വ്യക്തമായിട്ടുണ്ടെന്ന് കോടതി നിരീക്ഷിച്ചു.

സ്പെഷ്യൽ ഇൻവെസ്റ്റിഗേഷൻ ടീം സമർപ്പിച്ച വിശദമായ റിപ്പോർട്ട് പരിശോധിച്ച കോടതി, ശബരിമല സന്നിധാനത്ത് സ്വർണ്ണത്തിന്റെ ചോർച്ചയും തട്ടിപ്പും ഏത് രീതിയിലാണ് നടന്നതെന്ന് കൃത്യമായി തിരിച്ചറിയാൻ ഈ കണ്ടെത്തലുകൾ ഉപകരിക്കുമെന്ന് വ്യക്തമാക്കി.

മുൻ ദേവസ്വം ബോർഡ് പ്രസിഡന്റിനെതിരെ വിജിലൻസ് റിപ്പോർട്ട്

ശ്രീകോവിലിലെ ദ്വാരപാലക ശില്പങ്ങളും കട്ടിളപ്പാളികളും അഴിച്ചെടുത്ത് സ്വർണ്ണം പൂശാനായി ചെന്നൈയിലേക്ക് കൊണ്ടുപോയ സംഭവത്തിൽ മുൻ തിരുവിതാംകൂർ ദേവസ്വം ബോർഡ് പ്രസിഡന്റ് പി.എസ്. പ്രശാന്ത് നിയമപരമായ നടപടിക്രമങ്ങൾ പാലിച്ചില്ലെന്നും അനാവശ്യ തിടുക്കം കാട്ടിയെന്നും വിജിലൻസ് നേരത്തെ ഹൈക്കോടതിയിൽ റിപ്പോർട്ട് നൽകിയിരുന്നു. സ്പെഷ്യൽ കമ്മീഷണറെയോ മറ്റ് ഉന്നത ഉദ്യോഗസ്ഥരെയോ കൃത്യമായി അറിയിക്കാതെയാണ് പവിത്രമായ ഈ ശില്പങ്ങൾ സന്നിധാനത്തിന് പുറത്തേക്ക് കൊണ്ടുപോയത്.

കേസിൽ ഇതുവരെ സ്പോൺസർ ഉണ്ണികൃഷ്ണൻ പോറ്റി ഉൾപ്പെടെയുള്ള പന്ത്രണ്ടോളം പേരെ എസ്.ഐ.ടി അറസ്റ്റ് ചെയ്തിരുന്നുവെങ്കിലും നിശ്ചിത സമയത്തിനകം അന്വേഷണം പൂർത്തിയാകാത്തതിനാൽ ഇവർക്ക് മുൻപ് നിയമപരമായ ജാമ്യം ലഭിച്ചിരുന്നു. എന്നാൽ, പ്രഭാമണ്ഡലത്തിലെ പാളികൾ ഇളക്കി മാറ്റി കൂടുതൽ ശാസ്ത്രീയ പരിശോധനകൾ നടത്തുന്നതോടെ കുറ്റവാളികളുടെ കൃത്യമായ പങ്ക് വ്യക്തമാകുമെന്നും, അടുത്ത റിപ്പോർട്ടിൽ ഇവരുടെ പൂർണ്ണ വിവരങ്ങൾ കോടതിക്ക് കൈമാറുമെന്നും അന്വേഷണ ഉദ്യോഗസ്ഥനായ എസ്. ശശിധരൻ അറിയിച്ചു. കേസ് വീണ്ടും പരിഗണിക്കുന്നതിനായി ജൂൺ 18-ലേക്ക് കോടതി മാറ്റിയിട്ടുണ്ട്.

---------------

Hindusthan Samachar / Roshith K