Enter your Email Address to subscribe to our newsletters
Kochi, 10 ജൂലൈ (H.S.)
ബിജെപി നേതാവ് രഞ്ജിത്ത് ശ്രീനിവാസനെ കൊലപ്പെടുത്തിയ കേസില് സ്പെഷ്യല് പ്രോസിക്യൂട്ടറെ നിയമിച്ചു. പ്രതികളുടെ അപ്പീലിലാണ് ഹൈക്കോടതിയില് സ്പെഷ്യല് പ്രോസിക്യൂട്ടറെ നിയമിച്ചിരിക്കന്നത്. മുതിര്ന്ന അഭിഭാഷകന് പി.വിജയഭാനുവിനെയാണ് സ്പെഷ്യല് പ്രോസീക്യൂട്ടര് ആയി നിയമിച്ചത്.
വിചാരണ കോടതിയുടെ ശിക്ഷ വിധിക്കെതിരെ പ്രതികള് സമര്പ്പിച്ച അപ്പീലുകളിലാണ് നിയമനം. രഞ്ജിത്തിന്റെ കുടുംബം ആവശ്യപ്പെട്ടതിനെ തുടര്ന്നാണ് തീരുമാനം എന്നാണ് സര്ക്കാര് വൃത്തങ്ങള് നല്കുന്ന വിവരം. നേരത്തെ മാറാട് കേസടക്കമുള്ളവയില് സ്പെഷ്യല് പ്രോസിക്യൂട്ടറായിരുന്നു വിജയഭാനു.
2021 ഡിസംബര് 19-നാണ് രഞ്ജിത്ത് ശ്രീനിവാസനെ ആലപ്പുഴ വെള്ളക്കിണറിലുള്ള വീട്ടില്ക്കയറി അമ്മയുടെയും ഭാര്യയുടെയും മകളുടെയും മുന്നിലിട്ട് വെട്ടിക്കൊന്നത്. ബി.ജെ.പി. ഒ.ബി.സി. മോര്ച്ച സംസ്ഥാന സെക്രട്ടറിയായിരുന്ന ആലപ്പുഴയിലെ അഭിഭാഷകന് രഞ്ജിത് ശ്രീനിവാസനെ കൊലപ്പെടുത്തിയ കേസില് 15 പ്രതികള്ക്കും വധശിക്ഷ വിധിച്ചിരുന്നു. മാവേലിക്കര അഡീഷണല് സെഷന്സ് ജഡ്ജി വി.ജി. ശ്രീദേവിയാണ് ശിക്ഷ വിധിച്ചത്. കേസിലെ 15 പ്രതികളും കുറ്റക്കാരാണെന്ന് ജനുവരി 20-ന് കോടതി കണ്ടെത്തിയിരുന്നു. പ്രതികളെല്ലാം പോപ്പുലര് ഫ്രണ്ട്-എസ്.ഡി.പി.ഐ. പ്രവര്ത്തകരാണ്. കേസില് പ്രോസിക്യൂഷന്റെയും പ്രതിഭാഗത്തിന്റെയും വാദം കേട്ടശേഷമാണ് കോടതി ശിക്ഷ വിധിച്ചത്.
പ്രതികള്ക്ക് വധശിക്ഷ നല്കണമെന്നായിരുന്നു പ്രോസിക്യൂഷന്റെ ആവശ്യം. പ്രതികള് നിരോധിത തീവ്രവാദസംഘത്തിലെ അംഗങ്ങളും കൊലചെയ്യാന് പരിശീലനം ലഭിച്ചവരുമാണ്. ഇവര് പുറത്തിറങ്ങിയാല് നാടിന് ആപത്താണെന്നും അതിനാല് മാതൃകാപരമായ ശിക്ഷ നല്കണമെന്നും പ്രോസിക്യൂഷന് കോടതിയില് ആവശ്യപ്പെട്ടിരുന്നു.
പോപ്പുലര് ഫ്രണ്ട് പ്രവര്ത്തകരായ ആലപ്പുഴ അമ്പനാകുളങ്ങര മാച്ചനാട് കോളനിയില് നൈസാം, മണ്ണഞ്ചേരി അമ്പലക്കടവ് വടക്കേച്ചിറപ്പുറം വീട്ടില് അജ്മല്, ആലപ്പുഴ വെസ്റ്റ് മുണ്ടുവാടയ്ക്കല് വീട്ടില് അനൂപ്, ആര്യാട് തെക്ക് അവലൂക്കുന്ന് ഇരക്കാട്ട് വീട്ടില് മുഹമ്മദ് അസ്ലം, മണ്ണഞ്ചേരി ഞാറവേലില് അബ്ദുല് കലാം, അടിവാരം ദാറുസബീന് വീട്ടില് അബ്ദുല് കലാം, ആലപ്പുഴ വെസ്റ്റ് തൈവേലിക്കകം വീട്ടില് സറഫുദ്ദീന്, മണ്ണഞ്ചേരി ഉടുമ്പിത്തറ വീട്ടില് മന്ഷാദ്, ആലപ്പുഴ വെസ്റ്റ് കടവത്തുശ്ശേരി ചിറയില് ജസീബ് രാജ, മുല്ലയ്ക്കല് വട്ടക്കാട്ടുശ്ശേരി വീട്ടില് നവാസ്, കോമളപുരം തയ്യില് വീട്ടില് സമീര്, നോര്ത്ത് ആര്യാട് കണ്ണറുകാട് വീട്ടില് നസീര്, മണ്ണഞ്ചേരി ചാവടിയില് സക്കീര് ഹുസൈന്, മണ്ണഞ്ചേരി തെക്കേവെളിയില് ഷാജി, മുല്ലയ്ക്കല് നൂറുദ്ദീന് പുരയിടത്തില് ഷെര്നാസ് അഷറഫ് എന്നിവരാണ് ഒന്നുമുതല് 15 വരെ പ്രതികള്. വഘശിക്ഷ നല്കിയ വിധിക്ക് എതിരെയാണ് പ്രതികള് ഹൈക്കോടതിയെ സമീപിച്ചിരിക്കുന്നത്.
---------------
Hindusthan Samachar / Sreejith S
