Indor , 12 ജൂലൈ (H.S.)

ഇൻഡോർ: മധ്യപ്രദേശിൽ വൻ രാഷ്ട്രീയ കൊടുങ്കാറ്റ് സൃഷ്ടിച്ച ലഹരിക്കടത്ത് കേസിൽ സംസ്ഥാന കോൺഗ്രസ് അധ്യക്ഷൻ ജിതു പട്വാരിയുടെ സഹോദരനെ പോലീസ് വീണ്ടും ചോദ്യം ചെയ്തു. ജിതു പട്വാരിയുടെ അനിയനായ കുൽഭൂഷൺ പട്വാരി എന്ന നാനാ പട്വാരിയെയാണ് ഇൻഡോർ പോലീസ് ഈ ആഴ്ചയിൽ രണ്ടാം തവണയും വിളിപ്പിച്ചു ചോദ്യം ചെയ്തത്. കേസിൽ അറസ്റ്റിലായ ലഹരിക്കടത്തുകാരിൽ നിന്നും അന്വേഷണസംഘത്തിന് ലഭിച്ച നിർണായക മൊഴികളുടെയും വിവരങ്ങളുടെയും അടിസ്ഥാനത്തിലായിരുന്നു ഈ നടപടി.

വഴിത്തിരിവായത് ലഹരിക്കടത്തുകാരുടെ മൊഴി

ഇൻഡോറിലെ രാജേന്ദ്ര നഗർ പോലീസ് വ്യാഴാഴ്ച നടത്തിയ അതീവ രഹസ്യമായ നീക്കത്തിലാണ് കേസിനാസ്പദമായ സംഭവം ഉണ്ടാകുന്നത്. 10.8 ഗ്രാം ബ്രൗൺ ഷുഗറും ഒരു സ്കോർപിയോ വാഹനവുമായി ഇർഫാൻ ഖാൻ (ഗോലു), സഞ്ജയ് കൗശൽ (റോണി ഭായ്) എന്നീ രണ്ട് ലഹരിക്കടത്തുകാരെ പോലീസ് സംഘം പിടികൂടി. എൻ.ഡി.പി.എസ് (NDPS) നിയമപ്രകാരം ഇവർക്കെതിരെ കേസെടുത്ത് ചോദ്യം ചെയ്തപ്പോഴാണ് കേസിൽ വൻ വഴിത്തിരിവുണ്ടായത്. പിടിച്ചെടുത്ത മയക്കുമരുന്ന് നാനാ പട്വാരിക്കും മാനവ് ഗാംഗ്വാനി എന്ന മറ്റൊരാൾക്കും എത്തിച്ചുനൽകാൻ പോകുന്നതിനിടെയാണ് തങ്ങൾ പിടിയിലായതെന്നായിരുന്നു പ്രതികളുടെ വെളിപ്പെടുത്തൽ.

ഈ മൊഴിയുടെ അടിസ്ഥാനത്തിൽ നാനാ പട്വാരിയെ പോലീസ് കസ്റ്റഡിയിലെടുത്ത് ചോദ്യം ചെയ്യുകയായിരുന്നു. പ്രാഥമിക ചോദ്യം ചെയ്യലിന് ശേഷം ഇയാളെ വിട്ടയച്ചെങ്കിലും, അന്വേഷണം പുരോഗമിക്കുന്ന മുറയ്ക്ക് വീണ്ടും ഹാജരാകാൻ നോട്ടീസ് നൽകുകയായിരുന്നു.

ശൃംഖല വലുതെന്ന് പോലീസ്; യുവതിയുടെ മൊഴിയും നിർണായകം

ഇൻഡോർ ഡെപ്യൂട്ടി പോലീസ് കമ്മീഷണർ (സോൺ-1) നരേന്ദ്ര സിംഗ് റാവത്ത് വ്യക്തമാക്കിയതനുസരിച്ച്, ഇതൊരു വലിയ ലഹരിശൃംഖലയുടെ ഭാഗമാണ്. പ്രതികളെ 7 ദിവസത്തെ പോലീസ് കസ്റ്റഡിയിൽ വാങ്ങി കൂടുതൽ ചോദ്യം ചെയ്തപ്പോഴാണ് ഇതിന്റെ വ്യാപ്തി വ്യക്തമായത്. ഇതിനിടെ കേസിൽ ഒരു യുവതിയുടെ പേരും ഉയർന്നുവന്നിട്ടുണ്ട്. ഈ യുവതിയെ പോലീസ് ചോദ്യം ചെയ്തപ്പോൾ, താൻ നാനാ പട്വാരിക്കൊപ്പം ചില ഫ്ലാറ്റുകളിൽ വെച്ച് ലഹരിമരുന്ന് ഉപയോഗിച്ചിട്ടുണ്ടെന്നും പണമിടപാടുകൾ നടത്തിയിട്ടുണ്ടെന്നും പോലീസിന് മൊഴി നൽകി.

ഇതുമായി ബന്ധപ്പെട്ട സാമ്പത്തിക ഇടപാടുകളും ബാങ്ക് അക്കൗണ്ട് വിവരങ്ങളും പോലീസ് സാങ്കേതികമായി പരിശോധിച്ചു വരികയാണ്. ഈ നെറ്റ്വർക്കുമായി ബന്ധമുള്ള മറ്റുള്ളവരിലേക്ക് അന്വേഷണം വ്യാപിപ്പിക്കുമെന്നും ആവശ്യമെങ്കിൽ നാനാ പട്വാരിയെ വീണ്ടും ചോദ്യം ചെയ്യുമെന്നും ഡിസിപി അറിയിച്ചു.

രാഷ്ട്രീയ പകപോക്കലെന്ന് കോൺഗ്രസ്; ആരോപണം തള്ളി ബിജെപി

അതേസമയം, ഈ സംഭവത്തോടെ മധ്യപ്രദേശിൽ ഭരണ-പ്രതിപക്ഷ കക്ഷികൾ തമ്മിൽ കടുത്ത വാക്പോര് ആരംഭിച്ചു. തന്റെ സഹോദരനെ കൃത്യമായ വിവരങ്ങൾ നൽകാതെ പോലീസ് കസ്റ്റഡിയിലെടുത്ത് നഗരം മുഴുവൻ ചുറ്റിച്ചുവെന്നും, ബിജെപി സർക്കാർ രാഷ്ട്രീയമായി പ്രതികാരം തീർക്കുകയാണെന്നും കോൺഗ്രസ് അധ്യക്ഷൻ ജിതു പട്വാരി ആരോപിച്ചു. സർക്കാരിനെതിരെ ശബ്ദമുയർത്തുന്നവരെ ഒതുക്കാനുള്ള നീക്കമാണിതെന്നാണ് കോൺഗ്രസ് നിലപാട്.

എന്നാൽ ഈ ആരോപണങ്ങളെ നാനാ പട്വാരി തന്നെ ഭാഗികമായി തള്ളിക്കളഞ്ഞു. താൻ മൂന്ന്-നാല് വർഷം മുമ്പ് ലഹരിമരുന്ന് ഉപയോഗിച്ചിരുന്നു എന്നത് സത്യമാണെന്നും എന്നാൽ ഇപ്പോൾ അത് പൂർണ്ണമായി ഉപേക്ഷിച്ചതാണെന്നുമാണ് നാനാ പട്വാരി മാധ്യമങ്ങളോട് പറഞ്ഞത്. കോൺഗ്രസ് അധ്യക്ഷന്റെ സഹോദരൻ തന്നെ ലഹരി ഉപയോഗം സമ്മതിച്ച സാഹചര്യത്തിൽ, കോൺഗ്രസ് ഉന്നയിക്കുന്ന രാഷ്ട്രീയ വിരോധം എന്ന വാദം നിലനിൽക്കില്ലെന്നാണ് ബിജെപി വക്താക്കൾ തിരിച്ചടിക്കുന്നത്. കേസിൽ കൂടുതൽ അറസ്റ്റുകൾ ഉണ്ടാകുമെന്നാണ് സൂചന.

---------------

Hindusthan Samachar / Roshith K