Shrinagar, 12 ജൂലൈ (H.S.)

ശ്രീനഗർ: ജമ്മു കശ്മീരിലെ ഭരണകക്ഷിയായ നാഷണൽ കോൺഫറൻസിനെ (എൻസി) പിളർത്താൻ ബിജെപി കടുത്ത കുതിരക്കച്ചവടത്തിന് ശ്രമിക്കുന്നുവെന്ന ഗുരുതര ആരോപണവുമായി മുഖ്യമന്ത്രി ഒമർ അബ്ദുള്ള. തങ്ങളുടെ എംഎൽഎമാരെ ലക്ഷക്കണക്കിന് രൂപയും മന്ത്രിസ്ഥാനവും, ഒപ്പം ജമ്മു കശ്മീരിന് സംസ്ഥാന പദവി തിരികെ നൽകാമെന്ന വാഗ്ദാനവും നൽകി ചാക്കിട്ടുപിടിക്കാൻ ബിജെപി ശ്രമിക്കുന്നുവെന്നാണ് ഒമർ അബ്ദുള്ള ശനിയാഴ്ച നടന്ന ഒരു പാർട്ടി പ്രവർത്തകരുടെ സമ്മേളനത്തിൽ തുറന്നടിച്ചത്. എന്നാൽ ആരോപണം പൂർണ്ണമായും തള്ളിയ ബിജെപി, ഒമർ അബ്ദുള്ള ആരോപണങ്ങൾ തെളിയിക്കണമെന്നും അല്ലാത്തപക്ഷം പരസ്യമായി മാപ്പ് പറയണമെന്നും ആവശ്യപ്പെട്ട് അന്ത്യശാസനം നൽകി.

ഒരു സുപ്രീം കോടതി അഭിഭാഷകനും ബിജെപിയുടെ ഉന്നത ഭാരവാഹിയുമായ വ്യക്തിയാണ് നാഷണൽ കോൺഫറൻസ് എംഎൽഎമാരെ നേരിട്ട് ബന്ധപ്പെട്ടതെന്ന് ഒമർ അബ്ദുള്ള ആരോപിച്ചു. പാർട്ടി പ്രവർത്തകരെ അഭിസംബോധന ചെയ്തുകൊണ്ട് മുഖ്യമന്ത്രി പറഞ്ഞത് ഇങ്ങനെയാണ്:

നാഷണൽ കോൺഫറൻസിനെ തകർക്കാനുള്ള വലിയ നീക്കങ്ങളാണ് ഇപ്പോൾ നടക്കുന്നത്. പണത്തോടുള്ള ആർത്തിയും മന്ത്രിസ്ഥാനവും കാണിച്ച് ഞങ്ങളുടെ എംഎൽഎമാരെ വീഴ്ത്താൻ കഴിയാതെ വന്നപ്പോൾ, അടച്ചിട്ട മുറികൾക്കുള്ളിൽ ബിജെപി അവരോട് പറയുന്നത് 'ഞങ്ങളോടൊപ്പം വരൂ, ഞങ്ങൾ നിങ്ങൾക്ക് സംസ്ഥാന പദവി നൽകാം' എന്നാണ്. ജമ്മുവിൽ നിന്നുള്ള എന്റെ ഒരു എംഎൽഎ എന്നോട് വെളിപ്പെടുത്തിയത്, ബിജെപിയുടെ ഭാരവാഹിയും സുപ്രീം കോടതി അഭിഭാഷകനുമായ ഒരാൾ തനിക്ക് 20 മുതൽ 30 കോടി രൂപ വരെയും മന്ത്രിസ്ഥാനവും കശ്മീരിന് സംസ്ഥാന പദവിയും വാഗ്ദാനം ചെയ്തു എന്നാണ്. ജനങ്ങളുടെ വിശ്വാസത്തെ ഇത്ര വിലകുറച്ചാണ് അവർ കാണുന്നത്.

കടുത്ത പ്രതികരണവുമായി ബിജെപി; നിയമനടപടിക്ക് ഒരുക്കം

അതേസമയം, മുഖ്യമന്ത്രിയുടെ ആരോപണങ്ങൾക്കെതിരെ ബിജെപി കടുത്ത ഭാഷയിൽ രംഗത്തെത്തി. ഒമർ അബ്ദുള്ളയുടെ ആരോപണങ്ങൾ തികച്ചും അടിസ്ഥാനരഹിതമാണെന്നും സ്വന്തം സർക്കാരിന്റെ പരാജയങ്ങളിൽ നിന്നും ജനശ്രദ്ധ തിരിച്ചുവിടാനാണ് ഇത്തരം പുകമറകൾ സൃഷ്ടിക്കുന്നതെന്നും ബിജെപി വക്താവും എംഎൽഎയുമായ ആർ.എസ്. പഥാനിയ കുറ്റപ്പെടുത്തി.

പണം വാഗ്ദാനം ചെയ്തു എന്ന് പറയുന്ന എംഎൽഎമാരുടെ പേരുകൾ വെളിപ്പെടുത്താൻ ഒമർ അബ്ദുള്ള തയ്യാറാകണമെന്ന് പഥാനിയ വെല്ലുവിളിച്ചു. ഇതിന് പിന്നിൽ പ്രവർത്തിച്ച ബിജെപി നേതാക്കൾ ആരാണെന്നും, എവിടെ വെച്ചാണ് ഈ ചർച്ചകൾ നടന്നതെന്നും വ്യക്തമാക്കണം. തിരഞ്ഞെടുക്കപ്പെട്ട ഒരു മുഖ്യമന്ത്രി ഇത്രയും ഗുരുതരമായ ഒരു സംഭവം നടന്നിട്ടും എന്തുകൊണ്ടാണ് അത് അന്വേഷണ ഏജൻസികൾക്ക് മുന്നിൽ റിപ്പോർട്ട് ചെയ്യാതിരുന്നതെന്നും അദ്ദേഹം ചോദിച്ചു. കൃത്യമായ തെളിവുകൾ അധികാരികൾക്ക് മുന്നിൽ ഹാജരാക്കാതെ ഒരു മുഖ്യമന്ത്രിയും ഇത്തരത്തിൽ സംസാരിക്കാൻ പാടില്ലെന്നും പഥാനിയ കൂട്ടിച്ചേർത്തു.

നാഷണൽ കോൺഫറൻസിന് അഞ്ച് വർഷത്തെ ഭരണകാലാവധിയാണ് ജനങ്ങൾ നൽകിയതെങ്കിലും ഒന്നാം വർഷം പൂർത്തിയാകുന്നതിന് മുൻപ് തന്നെ സർക്കാരിന്റെ യഥാർത്ഥ മുഖം പുറത്തുവന്നിരിക്കുകയാണെന്ന് ബിജെപി ആരോപിച്ചു. സംസ്ഥാനത്ത് അഴിമതി വർദ്ധിച്ചതായും ഉദ്യോഗസ്ഥരുടെ ട്രാൻസ്ഫർ ഒരു വലിയ വ്യവസായമായി മാറിയതായും പഥാനിയ കുറ്റപ്പെടുത്തി. ഒമർ അബ്ദുള്ള ആരോപണങ്ങൾ തെളിയിക്കാൻ തയ്യാറായില്ലെങ്കിൽ പരസ്യമായി മാപ്പ് പറയണം. അല്ലാത്തപക്ഷം തെറ്റിദ്ധാരണാജനകമായ പ്രസ്താവനകൾ നടത്തി പാർട്ടിയെ അപകീർത്തിപ്പെടുത്തിയതിന് ഒമർ അബ്ദുള്ളയ്ക്കെതിരെ ബിജെപി കോടതിയെ സമീപിച്ച് അപകീർത്തിക്കേസ് ഫയൽ ചെയ്യുമെന്നും അദ്ദേഹം മുന്നറിയിപ്പ് നൽകി.

---------------

Hindusthan Samachar / Roshith K