Thiruvananthapuram , 13 ജൂലൈ (H.S.)

തിരുവനന്തപുരം കോർപ്പറേഷനിലെ വാഴോട്ടുകോണം വാർഡ് കൗൺസിലറും കാപ്പാ (KAAPA) കേസ് പ്രതിയുമായ ആർ. സുഗതന് വിയ്യൂർ ജയിലിൽ വെച്ച് പുനഃസത്യപ്രതിജ്ഞ ചെയ്യാൻ അനുമതി നൽകിയ ഹൈക്കോടതി വിധിയെ സ്വാഗതം ചെയ്ത് മേയർ വി.വി രാജേഷ്. തിരുവനന്തപുരം നഗരസഭയിൽ തെരഞ്ഞെടുക്കപ്പെട്ട 101 കൗൺസിലർമാരിൽ ആരും തന്നെ അയോഗ്യരാകില്ലെന്നും ജനങ്ങൾ നൽകിയ വിധി മാനിച്ചുകൊണ്ട് അഞ്ച് വർഷവും ബിജെപി തന്നെ ഭരണം നടത്തുമെന്നും മേയർ മാധ്യമങ്ങളോട് വ്യക്തമാക്കി.

തിരഞ്ഞെടുക്കപ്പെട്ട ഒരു ജനപ്രതിനിധിയുടെ സ്ഥാനം സംരക്ഷിക്കപ്പെടണമെന്ന കൃത്യമായിട്ടുള്ള കോടതി നിലപാടുകൾ ഉള്ളതുകൊണ്ടാണ് ആരോഗ്യകരമായ ഇത്തരം വിധികൾ ഉണ്ടാകുന്നത്. ജനാധിപത്യത്തിൽ ജനകീയ കൽപ്പന മാനിക്കപ്പെടണമെന്നും ജനവിധി സംരക്ഷിക്കേണ്ടത് കോടതിയുടെ കടമയാണെന്നുമുള്ള വിലയിരുത്തലോടെയാണ് ഹൈക്കോടതിയുടെ ഈ അസാധാരണ ഉത്തരവ് വന്നിരിക്കുന്നത്. കോടതി നിർദേശിച്ച സമയത്ത് തന്നെ കൃത്യമായി സത്യപ്രതിജ്ഞ ചടങ്ങുകൾ നടത്തുമെന്നും ഇതിനായി താൻ ഇന്ന് തന്നെ വിയ്യൂരിലേക്ക് തിരിക്കുമെന്നും മേയർ കൂട്ടിച്ചേർത്തു.

വിയ്യൂർ സെൻട്രൽ ജയിലിൽ ചരിത്ര സത്യപ്രതിജ്ഞ

സംസ്ഥാന ചരിത്രത്തിൽ തന്നെ ഇതാദ്യമായാണ് കരുതൽ തടങ്കലിൽ കഴിയുന്ന ഒരു ജനപ്രതിനിധിക്ക് ജയിലിനുള്ളിൽ വെച്ച് സത്യപ്രതിജ്ഞ ചെയ്യാൻ കോടതി അനുമതി നൽകുന്നത്. നാളെ രാവിലെ 11 മണിക്ക് വിയ്യൂർ സെൻട്രൽ ജയിലിലെ സൂപ്രണ്ട് ഓഫീസിൽ വെച്ചാണ് ആർ. സുഗതന്റെ പുനഃസത്യപ്രതിജ്ഞ നടക്കുക. ചടങ്ങിനാവശ്യമായ സൗകര്യങ്ങൾ ഒരുക്കാൻ സർക്കാരിന് ഹൈക്കോടതി നിർദേശം നൽകിയിട്ടുണ്ട്. മേയർക്കും വളരെ പരിമിതമായ നഗരസഭാ ഉദ്യോഗസ്ഥർക്കും പുറമെ, അക്രഡിറ്റേഷനുള്ള മാധ്യമപ്രവർത്തകർക്കും ജയിലിനുള്ളിലെ ഈ ചടങ്ങിൽ സംബന്ധിക്കാൻ കോടതി പ്രത്യേക അനുമതി നൽകിയിട്ടുണ്ട്.

നേരത്തെ കോർപ്പറേഷൻ അംഗമായി സത്യപ്രതിജ്ഞ ചെയ്തപ്പോൾ പല ദൈവങ്ങളുടെ പേരിൽ മാറി മാറി പ്രതിജ്ഞ ചൊല്ലിയതിനെ തുടർന്ന് സുഗതൻ ഉൾപ്പെടെയുള്ള ചില ബിജെപി കൗൺസിലർമാരുടെ സത്യപ്രതിജ്ഞ ഹൈക്കോടതി അസാധുവാക്കിയിരുന്നു. തുടർന്ന് പുനഃസത്യപ്രതിജ്ഞ ചെയ്യാൻ കോടതി നിർദേശിച്ചെങ്കിലും വധശ്രമം ഉൾപ്പെടെയുള്ള വിവിധ ക്രിമിനൽ കേസുകളിൽ പ്രതിയായ സുഗതനെതിരെ പോലീസ് കാപ്പാ നിയമപ്രകാരം കരുതൽ തടങ്കൽ ചുമത്തി വിയ്യൂർ ജയിലിലടയ്ക്കുകയായിരുന്നു.

രാഷ്ട്രീയ തർക്കങ്ങൾക്ക് മറുപടി

തുടർച്ചയായി മൂന്ന് കൗൺസിൽ യോഗങ്ങളിൽ പങ്കെടുക്കാതിരുന്നാൽ കൗൺസിലർ സ്ഥാനം നഷ്ടമാകുമെന്ന നിയമം നിലനിൽക്കെ, സുഗതനെ അയോഗ്യനാക്കാൻ പ്രതിപക്ഷം വലിയ രീതിയിൽ രാഷ്ട്രീയ സമ്മർദം ചെലുത്തിയിരുന്നു. ഈ പശ്ചാത്തലത്തിലാണ് ഹൈക്കോടതി വിധി തങ്ങൾക്ക് അനുകൂലമായ വലിയ ആശ്വാസമായി ബിജെപി നേതൃത്വം കാണുന്നത്.

രാഷ്ട്രീയത്തിൽ ഇത്തരം പ്രതിസന്ധികളും എതിർപ്പുകളും സ്വാഭാവികമാണ്. കൗൺസിൽ യോഗത്തിൽ പ്രതിപക്ഷം പറയുന്നതുപോലെ വളഞ്ഞിട്ട് ആക്രമിക്കുന്നതൊന്നും ഇവിടെ പ്രസക്തമല്ല. കൗൺസിൽ യോഗങ്ങളിൽ ഒപ്പുവെച്ചില്ലെങ്കിലും നിയമപരമായി ആർക്കും അയോഗ്യത ഉണ്ടാകാൻ പോകുന്നില്ല. കോർപ്പറേഷൻ ഭരണത്തിൽ ഞങ്ങൾക്ക് ഒന്നിനോടും വിയോജിപ്പില്ല, ജനങ്ങൾ ഏൽപ്പിച്ച ഭരണം അഞ്ച് വർഷവും പൂർത്തിയാക്കും.

— മേയർ വി.വി രാജേഷ്

സുഗതന് സത്യപ്രതിജ്ഞ ചെയ്യാനായി താൽക്കാലിക ജാമ്യം അനുവദിക്കുന്നതിനെ കോടതിയിൽ സർക്കാർ ശക്തമായി എതിർത്തിരുന്നു. കരുതൽ തടങ്കലിലുള്ള പ്രതിയെ പുറത്തുവിടാൻ കഴിയില്ലെന്ന സർക്കാർ നിലപാട് അംഗീകരിച്ച കോടതി, എന്നാൽ ജനപ്രതിനിധിയുടെ സ്ഥാനം നഷ്ടപ്പെടാതിരിക്കാൻ ജയിലിനുള്ളിൽ തന്നെ ചടങ്ങ് നടത്താനുള്ള അസാധാരണ വഴി സ്വീകരിക്കുകയായിരുന്നു. കോടതി വിധിയിലൂടെ പ്രതിസന്ധി ഒഴിഞ്ഞ ആത്മവിശ്വാസത്തിലാണ് നിലവിൽ തിരുവനന്തപുരം നഗരസഭയിലെ ബിജെപി നേതൃത്വം.

---------------

Hindusthan Samachar / Roshith K