Pathanamthitta, 13 ജൂലൈ (H.S.)

പത്തനംതിട്ട/അടൂർ: പത്തനംതിട്ടയിലെ കോൺഗ്രസ് ജില്ലാ പഞ്ചായത്തംഗം ശ്രീനാദേവി കുഞ്ഞമ്മയെ സമൂഹമാധ്യമങ്ങളിലൂടെ ആക്ഷേപിച്ച കേസിൽ അറസ്റ്റിലായ പ്രമുഖ യുട്യൂബർ രാജൻ ജോസഫിന് നേരെ അടൂർ പോലീസ് സ്റ്റേഷനിൽ വെച്ച് യൂത്ത് കോൺഗ്രസ് പ്രവർത്തകരുടെ കൈയേറ്റ ശ്രമം. പ്രതിയായ രാജൻ ജോസഫിനെ ശനിയാഴ്ച രാത്രി അറസ്റ്റ് ചെയ്ത് അടൂർ പോലീസ് സ്റ്റേഷനിൽ എത്തിച്ചപ്പോഴായിരുന്നു നാടകീയ സംഭവങ്ങൾ അരങ്ങേറിയത്. സ്റ്റേഷനിലേക്ക് ഇരച്ചുകയറിയ പ്രവർത്തകർ പ്രതിയെ ആക്രമിക്കാൻ ശ്രമിക്കുകയായിരുന്നു. പോലീസ് ഉദ്യോഗസ്ഥർ ഏറെ പണിപ്പെട്ടാണ് രാജനെ പ്രവർത്തകരുടെ കൈകളിൽ നിന്ന് രക്ഷപെടുത്തിയത്.

യൂത്ത് കോൺഗ്രസ് നേതാവ് ഫെന്നി നൈനാന്റെ നേതൃത്വത്തിൽ എത്തിയ ഒരു സംഘം പ്രവർത്തകരാണ് സ്റ്റേഷനിൽ വെച്ച് രാജൻ ജോസഫിന് നേരെ തിരിഞ്ഞത്. പോലീസിന്റെ സംരക്ഷണ വലയത്തിൽ നിന്നും പ്രതിയെ കൈയേറ്റം ചെയ്യാനുള്ള ശ്രമത്തിനിടയിൽ ഉണ്ടായ തള്ളിലും തിരക്കിലും പെട്ട് രാജൻ ജോസഫ് സ്റ്റേഷൻ വരാന്തയിൽ നിലത്തു വീണു. ഇതോടെ പോലീസ് ഉദ്യോഗസ്ഥർ കൂടുതൽ ജാഗ്രത പാലിക്കുകയും പ്രവർത്തകരെ സ്റ്റേഷന് പുറത്തേക്ക് മാറ്റി പ്രതിയെ സുരക്ഷിത മുറിയിലേക്ക് മാറ്റുകയുമായിരുന്നു. ഒരു ജനപ്രതിനിധിയെ വ്യക്തിപരമായി അധിക്ഷേപിച്ചതിലുള്ള കടുത്ത അമർഷമാണ് അക്രമത്തിലേക്ക് നയിച്ചതെന്ന് പ്രവർത്തകർ പറഞ്ഞു.

സംഭവത്തിന്റെ തുടർച്ചയായി ഞായറാഴ്ച രാവിലെ അടൂർ പോലീസ് സ്റ്റേഷന് മുന്നിൽ വൻ രാഷ്ട്രീയ പ്രതിഷേധവും സംഘർഷാവസ്ഥയും ഉടലെടുത്തു. മുൻ എംഎൽഎയും യൂത്ത് കോൺഗ്രസ് സംസ്ഥാന നേതാവുമായ രാഹുൽ മാങ്കുട്ടത്തിലിന്റെ നേതൃത്വത്തിൽ വൻതോതിൽ യൂത്ത് കോൺഗ്രസ് പ്രവർത്തകർ സ്റ്റേഷന് മുന്നിൽ തടിച്ചുകൂടി. സ്ത്രീത്വത്തെ അപമാനിച്ച പ്രതിക്കെതിരെ ശക്തമായ നിയമനടപടികൾ സ്വീകരിക്കണമെന്നും, പ്രതിയെ സംരക്ഷിക്കാൻ പോലീസ് ശ്രമിക്കരുതെന്നും ആവശ്യപ്പെട്ടായിരുന്നു കോൺഗ്രസ് നിലയുറപ്പിച്ചത്.

ഇതേസമയം, കോൺഗ്രസ് പ്രതിഷേധത്തിന് എതിർഭാഗത്തായി ഭരണകക്ഷിയായ സിപിഎം, ഡിവൈഎഫ്ഐ പ്രവർത്തകരും വലിയ രീതിയിൽ സംഘടിച്ചു. യുട്യൂബറെ പോലീസ് സ്റ്റേഷനിൽ കയറി ആക്രമിച്ച യൂത്ത് കോൺഗ്രസ് നടപടിയിൽ പ്രതിഷേധിച്ചും, പ്രതിക്ക് നിയമപരമായ സുരക്ഷ ഉറപ്പാക്കണമെന്ന് ആവശ്യപ്പെട്ടുമാണ് ഇടതുപക്ഷ പ്രവർത്തകർ രംഗത്തെത്തിയത്. ഇരുവിഭാഗവും നേർക്കുനേർ നിന്ന് മുദ്രാവാക്യം വിളികളുമായി നിലയുറപ്പിച്ചതോടെ അടൂർ ടൗണിൽ കടുത്ത സംഘർഷാവസ്ഥ നിലനിന്നിരുന്നു. എന്നാൽ പോലീസ് ഉന്നത ഉദ്യോഗസ്ഥർ സ്ഥലത്തെത്തി ഇരുവിഭാഗം നേതാക്കളുമായും ചർച്ച നടത്തുകയും കനത്ത സുരക്ഷയൊരുക്കുകയും ചെയ്തതിനാൽ അനിഷ്ട സംഭവങ്ങളോ തെരുവ് യുദ്ധമോ ഉണ്ടാകാതെ രംഗം ശാന്തമാക്കാൻ സാധിച്ചു.

---------------

Hindusthan Samachar / Roshith K