Enter your Email Address to subscribe to our newsletters
New delhi, 15 ജൂലൈ (H.S.)
മഥുര ക്ഷേത്ര തര്ക്കത്തില് സുപ്രീംകോടതിയുടെ ഇടപെടല്. കൃഷ്ണ ജന്മഭൂമി-ഷാഹി ഈദ്ഗാഹ് മസ്ജിദ് തര്ക്കവുമായി ബന്ധപ്പെട്ട ഹര്ജികള് പരിഗണിക്കുന്നത് സുപ്രീം കോടതി മാറ്റിവെച്ചു. വിവിധ ഹിന്ദു പക്ഷങ്ങളില് ആരുടെ ഹര്ജിയാണ് പ്രധാന ഹര്ജിയായി പരിഗണിക്കേണ്ടതെന്ന കാര്യത്തില് അവര് തമ്മില് അനൗദ്യോഗിക ചര്ച്ചകള് നടക്കുകയാണെന്ന് കോടതിയെ അറിയിച്ചതിനെ തുടര്ന്നാണ് ഈ തീരുമാനം.
മറ്റൊരു ഹിന്ദു പക്ഷത്തെ എല്ലാ ഭക്തരുടേയും പ്രതിനിധിയായി കണക്കാക്കിക്കൊണ്ടുള്ള അലഹബാദ് ഹൈക്കോടതിയുടെ 2025-ലെ ഉത്തരവിനെ ചോദ്യം ചെയ്ത് സമര്പ്പിച്ച ഹര്ജിയാണ് സുപ്രീം കോടതി പരിഗണിച്ചത്. ജസ്റ്റിസുമാരായ സഞ്ജയ് കുമാര്, സഞ്ജീവ് സച്ച്ദേവ എന്നിവരടങ്ങിയ ബെഞ്ചാണ് ഈ കേസ് വരും ദിവസങ്ങളില് വിശദമായി വാദം കേള്ക്കുന്നതിനായി ആഗസ്റ്റ് 12-ലേക്ക് മാറ്റിയത്.
ഹര്ജിക്കാര്ക്കിടയില് നിലവില് കോടതിക്ക് പുറത്ത് ചില ചര്ച്ചകള് നടക്കുന്നുണ്ടെന്ന് ഹിന്ദു കക്ഷികളിലൊന്നിന്റെ അഭിഭാഷകന് കോടതിയെ അറിയിക്കുകയായിരുന്നു. കേസ് പരിഗണിക്കാന് തുടങ്ങിയപ്പോള് തന്നെ, ഹിന്ദു പക്ഷങ്ങളെ പ്രതിനിധീകരിക്കുന്ന അഭിഭാഷകരായ വിഷ്ണു ശങ്കര് ജെയിന്, പി. വി. യോഗേശ്വരന് എന്നിവരോട് അവര് തമ്മില് എന്തെങ്കിലും ചര്ച്ചകള് നടക്കുന്നുണ്ടോ എന്ന് കോടതി ആരാഞ്ഞിരുന്നു. കക്ഷികള് തമ്മില് ചര്ച്ചകള് നടക്കുന്നുണ്ടെങ്കില് കേസ് മാറ്റിവെക്കാമെന്ന് ജസ്റ്റിസ് കുമാര് വ്യക്തമാക്കുകയുണ്ടായി.
എന്നാല് ഈ ചര്ച്ചകള് തികച്ചും അനൗദ്യോഗികമായതിനാല് കോടതി ഉത്തരവില് ഇതിനെക്കുറിച്ച് പരാമര്ശിക്കേണ്ടതില്ലെന്ന് അഭിഭാഷകന് യോഗേശ്വരന് അഭ്യര്ഥിച്ചു. കേസ് ഇതിനോടകം പലതവണ മാറ്റിവെച്ചതാണെന്നും, കക്ഷികള് തമ്മില് ചര്ച്ചകള് നടക്കുന്നുണ്ടെങ്കില് മാത്രമേ ഇനിയും മാറ്റിവെക്കാന് സാധിക്കുകയുള്ളൂ എന്നും കോടതി നിലപാടെടുത്തു. ചര്ച്ചകളെക്കുറിച്ച് കോടതി ഉത്തരവില് രേഖപ്പെടുത്തുന്നതില് തെറ്റില്ലെന്നും കോടതി വ്യക്തമാക്കി.
മഥുര കോടതിയുടെ പരിഗണനയിലുണ്ടായിരുന്ന തര്ക്കവുമായി ബന്ധപ്പെട്ട എല്ലാ കേസുകളും തങ്ങളിലേക്ക് മാറ്റിക്കൊണ്ടുള്ള അലഹബാദ് ഹൈക്കോടതിയുടെ 2023 മെയ് 26 ലെ ഉത്തരവിനെതിരെ മസ്ജിദ് കമ്മിറ്റിയും ഹിന്ദു പക്ഷവും നല്കിയ ഹര്ജികള് ഉള്പ്പെടെയുള്ളവ ഇതിനകം തന്നെ സുപ്രീം കോടതിയുടെ പരിഗണനയിലുണ്ട്. മഥുരയിലെ തര്ക്കസ്ഥലത്തുനിന്ന് ഷാഹി ഈദ്ഗാഹ് മസ്ജിദ് നീക്കം ചെയ്യണമെന്ന് ആവശ്യപ്പെട്ട് പ്രത്യേക ഹര്ജി നല്കിയ ഒരു ഹിന്ദു പക്ഷത്തെ മുഴുവന് ഭക്തരുടേയും പ്രതിനിധിയായി കണക്കാക്കാന് കഴിഞ്ഞ വര്ഷം ജൂലൈ 18-ന് അലഹബാദ് ഹൈക്കോടതി അനുമതി നല്കിയിരുന്നു.
2023-ലെ 17-ാം നമ്പര് സിവില് ഹര്ജിയിലെ വാദിയുടെ അപേക്ഷ സ്വീകരിച്ചുകൊണ്ടായിരുന്നു ഹൈക്കോടതിയുടെ ഈ നടപടി. ഇതോടെ 17-ാം നമ്പര് ഹര്ജി പ്രധാന ഹര്ജിയായി പരിഗണിച്ച് ആദ്യം വാദം കേള്ക്കുമെന്നാണ് ഹൈക്കോടതി വ്യക്തമാക്കിയത്. എന്നാല് എല്ലാ സിവില് കേസുകളും ഹൈക്കോടതിയിലേക്ക് മാറ്റിയതിന് ശേഷം തന്റെ ഹര്ജിയാണ് പ്രധാന ഹര്ജിയായി പരിഗണിച്ചിരുന്നതെന്നും, മറ്റൊരു കക്ഷിയെ ഭക്തരുടെ പ്രതിനിധിയായി പ്രഖ്യാപിച്ച ഹൈക്കോടതി നടപടി തെറ്റാണെന്നും ചൂണ്ടിക്കാണിച്ചാണ് പരാതിക്കാരനായ ഹിന്ദു കക്ഷി സുപ്രീം കോടതിയെ സമീപിച്ചത്. ഈ വിഷയത്തില് വിശദമായ പരിശോധന ആവശ്യമാണെന്നും അതിനാല് ഇരുപക്ഷവും വാദമുഖങ്ങളുമായി തയാറായി വരണമെന്നും ജസ്റ്റിസ് കുമാറിന്റെ നേതൃത്വത്തിലുള്ള ബെഞ്ച് മുന്പ് ആവശ്യപ്പെട്ടിരുന്നു.
---------------
Hindusthan Samachar / Sreejith S
