Enter your Email Address to subscribe to our newsletters
New delhi, 16 ജൂലൈ (H.S.)
അനധികൃത കയ്യേറ്റങ്ങളും കെട്ടിടങ്ങള് പൊളിക്കുന്നതുമായി ബന്ധപ്പെട്ട് ബുള്ഡോസര് നടപടികലിലെ കോടതിയലക്ഷ്യ ഹര്ജികള് പരിഗണിക്കാന് സുപ്രീം കോടതി വിസമ്മതിച്ചു. സുപ്രീം കോടതി ഉത്തരവുകള് ലംഘിച്ചെന്നാരോപിച്ചുള്ള ഒരു കൂട്ടം കോടതിയലക്ഷ്യ ഹര്ജികള് പരിഗണിക്കാനാണ് സുപ്രീം കോടതി വ്യാഴാഴ്ച വിസമ്മതിച്ചത്. പരാതിക്കാര് ബന്ധപ്പെട്ട ഹൈക്കോടതിയെ സമീപിക്കാനും ഹര്ജിക്കാര്ക്ക് നിര്ദേശം നല്കി.
മുംബൈ, സോമനാഥ് പള്ളികളുടെ തകര്ച്ച ഉള്പ്പെടെയുള്ള വിഷയങ്ങളിലെ കോടതിയലക്ഷ്യ ഹര്ജികള് അതത് ഹൈക്കോടതികളുടെ പരിഗണനയ്ക്ക് വിട്ടു. വസ്തുതകളുടെ അടിസ്ഥാനത്തില് പരിഗണിക്കേണ്ട ഒന്നിലധികം ചോദ്യങ്ങളുണ്ടെന്ന് ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി, ജസ്റ്റിസ് വി മോഹന എന്നിവരടങ്ങിയ ബെഞ്ച് ചൂണ്ടിക്കാട്ടി. ഈ നടപടികളുടെ രേഖകള് ബന്ധപ്പെട്ട ഹൈക്കോടതികള്ക്ക് കൈമാറുമെന്നും പ്രസക്തമായ രേഖകള് ആവശ്യപ്പെടണമെന്നും ആവശ്യമെങ്കില്, എല്ലാ വസ്തുതാപരമായ പ്രശ്നങ്ങളും നിര്ണയിക്കാന് ജില്ലാ കോടതികള് വഴി തെളിവുകള് നേടണമെന്നും സുപ്രീം കോടതി പറഞ്ഞു.
ഹൈക്കോടതികള്ക്ക് മുമ്പാകെയുള്ള നടപടികള് തീര്പ്പാക്കുന്ന സമയം വരെ അത് നല്കുന്ന ഇടക്കാല സംരക്ഷണം തുടരണമെന്നും നിര്ദേശിച്ചു. നാല് മാസത്തിനുള്ളില് ഹൈക്കോടതികള് ഇക്കാര്യം പരിഗണിക്കണമെന്നും ബെഞ്ച് നിര്ദേശിച്ചു. വാദം കേള്ക്കുന്നതിനിടെ, സോമനാഥിലെ പള്ളികള് പൊളിച്ചുമാറ്റുന്നതുമായി ബന്ധപ്പെട്ട കേസില് ഹാജരായ സെനര് അഭിഭാഷകന് ഹുസേഫ അഹ്മദി, ഈ കേസില് പൊതു ഭൂമി കയ്യേറ്റം നടന്നിട്ടില്ലെന്ന് അവകാശപ്പെട്ടു.
സുപ്രീം കോടതിയുടെ ഉത്തരവുകളുടെ അതിശക്തമായ ലംഘനങ്ങള് ആരോപിച്ചു. കോടതി നിര്ദേശങ്ങള്ക്ക് വിരുദ്ധമായി അധികാരികള് പ്രവര്ത്തിച്ചുവെന്നും അദ്ദേഹം പറഞ്ഞു. പ്രാദേശിക രാഷ്ട്രീയക്കാര് 'ബുള്ഡോസര് നടപടി' സ്വീകരിക്കുമെന്ന പരസ്യ പ്രഖ്യാപനത്തെ തുടര്ന്നാണ് പല പൊളിച്ചുമാറ്റലുകളും നടക്കുന്നതെന്ന് മഹാരാഷ്ട്രയില് നിന്നുള്ള ഒരു കോടതിയലക്ഷ്യ കേസില് ഹാജരായ മുതിര്ന്ന അഭിഭാഷകന് ചന്ദര് ഉദയ് സിംഗ് വാദിച്ചു. സുപ്രീം കോടതി നിര്ദ്ദേശിച്ച നടപടിക്രമങ്ങള് പ്രത്യേക വിഷയത്തില് പാലിച്ചിട്ടില്ലെന്ന് സംസ്ഥാനം തന്നെ സമര്പ്പിച്ച സത്യവാങ്മൂലം കാണിക്കുമെന്ന് ഉദയ് സിംഗ് പറഞ്ഞു.
അത്തരം പൊളിച്ചുമാറ്റലുകള് ശിക്ഷാ നടപടിയായി വ്യക്തമായി കണക്കാക്കുന്ന നിരവധി സന്ദര്ഭങ്ങളുണ്ടെന്നും അദ്ദേഹം പറഞ്ഞു. പൊളിക്കല് നടപടികള് നിയമപരമാണോ അതോ ശിക്ഷാ നടപടിയാണോ എന്ന് തീരുമാനിക്കാന് വസ്തുതകളുടെ പരിശോധന ആവശ്യമാണെന്ന് സുപ്രീം കോടതി വ്യക്തമാക്കി. അതത് സംസ്ഥാനങ്ങളിലെ ഹൈക്കോടതിയുടെ പരിധിയില് വിട്ടു നല്കുന്നതായി സുപ്രീം കോടതി അറിയിച്ചു.
---------------
Hindusthan Samachar / Sreejith S
