Thiruvananthapuram, 17 ജൂലൈ (H.S.)

തിരുവനന്തപുരം: കോറോഹെൽത്ത് കമ്പനിയിലെ കൂട്ടപ്പിരിച്ചുവിടലിന് ഇരയായ ജീവനക്കാർക്ക് ഐടി കമ്പനികളുടെ കൂട്ടായ്മയായ ജി.ടെക് (GTech) വഴി ബദൽ ജോലി ലഭ്യമാക്കുമെന്ന സംസ്ഥാന സർക്കാരിന്റെ പ്രഖ്യാപനം അനുചിതമാണെന്ന് ജീവനക്കാർ. സർക്കാരിന്റെ ഈ നീക്കം കോറോഹെൽത്ത് അധികൃതരുമായി നടക്കാനിരിക്കുന്ന നിർണായക ചർച്ചകളെ പ്രതികൂലമായി ബാധിക്കുമെന്നാണ് ജീവനക്കാരുടെ പ്രധാന വാദം. നിലവിലുള്ള ജോലി സംരക്ഷിക്കാനും കോറോഹെൽത്തിൽ തന്നെ തുടരാനുമുള്ള നിയമപരമായ നടപടികളാണ് സർക്കാർ സ്വീകരിക്കേണ്ടതെന്നും അവർ ആവശ്യപ്പെട്ടു.

കഴിഞ്ഞ ദിവസമാണ് കോറോഹെൽത്ത് കമ്പനിയിൽ നിന്ന് അപ്രതീക്ഷിതമായി പുറത്താക്കപ്പെട്ട ജീവനക്കാരുടെ പുനരധിവാസത്തിനായി സർക്കാർ അടിയന്തര ഇടപെടൽ നടത്തിയത്. വ്യവസായ-ഐടി വകുപ്പ് മന്ത്രിയുടെ നേതൃത്വത്തിൽ ജി.ടെക് പ്രതിനിധികളുമായി നടത്തിയ ചർച്ചയിലാണ്, ജോലി നഷ്ടപ്പെട്ടവരുടെ പ്രൊഫൈലുകൾ മറ്റ് ഐടി കമ്പനികൾക്ക് കൈമാറി പരമാവധി പേർക്ക് പുനർനിയമനം നൽകാൻ ധാരണയായത്. എന്നാൽ ഈ പ്രഖ്യാപനം തങ്ങളെ സഹായിക്കാനല്ല, മറിച്ച് മാനേജ്മെന്റിന് അനുകൂലമായ സാഹചര്യം ഒരുക്കാനേ ഉപകരിക്കൂ എന്നാണ് ജീവനക്കാരുടെ പക്ഷം.

ജീവനക്കാരുടെ പ്രധാന ആശങ്കകൾ

-

ചർച്ചകളുടെ ആനുകൂല്യം നഷ്ടപ്പെടും: തൊഴിൽ വകുപ്പിന്റെ നേതൃത്വത്തിൽ മാനേജ്മെന്റുമായി ചർച്ചകൾ നടക്കാനിരിക്കെ, സർക്കാർ മറ്റൊരു ജോലി വാഗ്ദാനം ചെയ്യുന്നത് കോറോഹെൽത്ത് അധികൃതർക്ക് തങ്ങളുടെ നിലപാടിൽ ഉറച്ചുനിൽക്കാൻ ധൈര്യം നൽകും. തങ്ങൾക്ക് മറ്റ് ജോലി ലഭിക്കുമെന്നായൽ നിലവിലെ കമ്പനി ബാധ്യതകളിൽ നിന്ന് എളുപ്പത്തിൽ കൈയൊഴിയും.

-

കോറോഹെൽത്തിൽ തന്നെ തുടരണം: യാതൊരു മുൻകൂർ നോട്ടീസും നൽകാതെയുള്ള പിരിച്ചുവിടൽ നിയമവിരുദ്ധമാണ്. അതിനാൽ ബദൽ സംവിധാനമല്ല, മറിച്ച് ഇതേ കമ്പനിയിൽ തന്നെ ജോലിയിൽ തുടരാൻ അനുവദിക്കുകയോ അല്ലെങ്കിൽ അർഹമായ നിയമപരമായ ആനുകൂല്യങ്ങൾ ഉറപ്പാക്കുകയോ ആണ് വേണ്ടത്.

-

വേതന വ്യത്യാസവും സീനിയോറിറ്റിയും: ജി.ടെക് വഴി ലഭിക്കുന്ന പുതിയ ജോലികളിൽ നിലവിലെ വേതനമോ സീനിയോറിറ്റിയോ ലഭിക്കണമെന്നില്ല. ഇത് ജീവനക്കാരുടെ സാമ്പത്തിക ഭദ്രതയെയും കരിയറിനെയും ബാധിക്കും.

-

നോട്ടീസ് പോലുമില്ലാതെ ഞങ്ങളെ തെരുവിലിറക്കിയ മാനേജ്മെന്റിനെതിരെ ശക്തമായ നടപടിയെടുക്കുന്നതിന് പകരം, അവർക്ക് രക്ഷപ്പെടാൻ സർക്കാർ വഴിതുറന്നു കൊടുക്കുകയാണ്. ജി.ടെക് വഴി ജോലി തരാമെന്ന പ്രഖ്യാപനം വന്നതോടെ കമ്പനി അധികൃതർക്ക് ചർച്ചകളിൽ മേൽക്കൈ ലഭിക്കും. ഞങ്ങൾക്ക് ഈ സ്ഥാപനത്തിൽ തന്നെ ജോലി ചെയ്യാനുള്ള സാഹചര്യം ഒരുക്കുകയാണ് സർക്കാർ ചെയ്യേണ്ടത്, പ്രതിഷേധിക്കുന്ന ജീവനക്കാർ വ്യക്തമാക്കി.

കൊച്ചി, കോഴിക്കോട് കേന്ദ്രങ്ങളിലായി എണ്ണൂറിലധികം ജീവനക്കാരെയാണ് കോറോഹെൽത്ത് പെട്ടെന്ന് പിരിച്ചുവിട്ടത്. പുതിയ തൊഴിൽ നിയമങ്ങളുടെ മറപിടിച്ചാണ് കമ്പനിയുടെ നടപടിയെങ്കിലും കേരളത്തിൽ ഇത് നടപ്പിലാക്കിയിട്ടില്ലെന്ന് തൊഴിൽ വകുപ്പ് വ്യക്തമാക്കിയിരുന്നു. സമരം ശക്തമാകുന്ന സാഹചര്യത്തിൽ വരും ദിവസങ്ങളിൽ തൊഴിൽ വകുപ്പിന്റെ മധ്യസ്ഥതയിൽ നടക്കുന്ന ചർച്ചകൾ അതീവ നിർണായകമാകും. എന്നാൽ ജീവനക്കാരുടെ ശക്തമായ എതിർപ്പോടെ സർക്കാരിന്റെ പുനരധിവാസ പാക്കേജ് ഇപ്പോൾ അനിശ്ചിതത്വത്തിലായിരിക്കുകയാണ്.

---------------

Hindusthan Samachar / Roshith K