Thiruvananthapuram, 17 ജൂലൈ (H.S.)

രുവനന്തപുരം: സംസ്ഥാനത്ത് പവർ കട്ടിനെ തുടർന്ന് ഓക്സിജൻ ലഭിക്കാതെ രോഗി മരണമടഞ്ഞ സംഭവം അങ്ങേയറ്റം ദുഃഖകരവും അതീവ ഗൗരവതരവുമാണെന്ന് മുൻ ആരോഗ്യ വകുപ്പ് മന്ത്രിയും സി.പി.എം സംസ്ഥാന കമ്മിറ്റി അംഗവുമായ വീണാ ജോർജ്. സർക്കാരിന്റെ ഭാഗത്തുനിന്നുള്ള കടുത്ത അനാസ്ഥയാണ് ഇത്തരം സാഹചര്യങ്ങളിലൂടെ നിരപരാധികളായ മനുഷ്യരുടെ ജീവൻ നഷ്ടപ്പെടുന്നതിന് കാരണമാകുന്നതെന്നും വീണാ ജോർജ് കുറ്റപ്പെടുത്തി.

വീടുകളിൽ ഓക്സിജൻ കോൺസെൻട്രേറ്ററിന്റെ സഹായത്തോടെ ജീവൻ നിലനിർത്തിയിരുന്ന രോഗിയാണ് അപ്രതീക്ഷിതമായി ഉണ്ടായ വൈദ്യുതി തടസ്സത്തെ തുടർന്ന് മരണത്തിന് കീഴടങ്ങിയത്. കറണ്ട് പോയതോടെ മെഷീന്റെ പ്രവർത്തനം നിലയ്ക്കുകയും രോഗിയുടെ ശരീരത്തിലെ ഓക്സിജൻ സാച്ചുറേഷൻ വലിയ തോതിൽ കുറയുകയുമായിരുന്നു.

കെ.എസ്.ഇ.ബിക്കെതിരെ കടുത്ത വിമർശനം

രോഗിയുടെ നില വഷളായതോടെ പരിഭ്രാന്തരായ കുടുംബാംഗങ്ങൾ സഹായത്തിനായി കെ.എസ്.ഇ.ബി. (KSEB) ഓഫീസിലേക്ക് വിളിച്ച് ബന്ധപ്പെട്ടിരുന്നു. എന്നാൽ അവിടെ നിന്നും ഉണ്ടായ പ്രതികരണം മനുഷ്യത്വരഹിതവും ഞെട്ടിപ്പിക്കുന്നതുമായിരുന്നുവെന്ന് വീണാ ജോർജ് ചൂണ്ടിക്കാട്ടി. 'രോഗിയുള്ള വീട്ടിൽ എന്തുകൊണ്ട് ഒരു ഇൻവെർട്ടർ വാങ്ങി വെച്ചില്ല' എന്ന തരത്തിലാണ് കെ.എസ്.ഇ.ബി ജീവനക്കാർ കുടുംബത്തോട് തിരിച്ച് ചോദിച്ചതത്രേ.

വൈദ്യുതി വകുപ്പ് ഉദ്യോഗസ്ഥരുടെ ഈ നിലപാടിനെ മുൻ മന്ത്രി രൂക്ഷമായ ഭാഷയിലാണ് വിമർശിച്ചത്. ഒരു ഇൻവെർട്ടറോ ജനറേറ്ററോ സ്വന്തമായി വാങ്ങാൻ സാമ്പത്തിക ശേഷിയില്ലാത്ത അനേകം സാധാരണ കുടുംബങ്ങൾ നമ്മുടെ സമൂഹത്തിലുണ്ട് എന്ന പച്ചയായ യാഥാർത്ഥ്യം അധികാരികൾ മറക്കരുത്, അവർ ഓർമ്മിപ്പിച്ചു. അടിസ്ഥാന ആവശ്യങ്ങൾക്ക് പോലും ബുദ്ധിമുട്ടുന്ന ജനങ്ങളോട് ഇത്തരം ചോദ്യങ്ങൾ ചോദിക്കുന്നത് അവരുടെ ദയനീയാവസ്ഥയെ പരിഹസിക്കുന്നതിന് തുല്യമാണ്.

അനാസ്ഥയിൽ പൊലിയുന്ന ജീവനുകൾ

സംസ്ഥാനത്ത് തുടർച്ചയായി ഉണ്ടാകുന്ന അപ്രതീക്ഷിത പവർ കട്ടുകൾ ജനജീവിതത്തെ ഗുരുതരമായി ബാധിക്കുന്നുണ്ട്. എന്നാൽ അത്യാസന്ന നിലയിലുള്ള രോഗികളുടെ ജീവന് തന്നെ ഇത് ഭീഷണിയാകുന്ന സാഹചര്യം അതീവ ആശങ്കാജനകമാണ്. മുൻകൂട്ടി യാതൊരു അറിയിപ്പുമില്ലാതെ വൈദ്യുതി ബന്ധം വിച്ഛേദിക്കുന്നത് മൂലമാണ് ഓക്സിജൻ സപ്പോർട്ടിലുള്ള രോഗികൾക്ക് ബദൽ സംവിധാനങ്ങൾ ഒരുക്കാൻ പോലും സാധിക്കാതെ പോകുന്നത്.

ഇത്തരം ഗുരുതരമായ വിഷയങ്ങളിൽ സർക്കാരിന്റെ ഭാഗത്തുനിന്നുണ്ടാകുന്ന നിസംഗതയും അനാസ്ഥയും ഒട്ടും അംഗീകരിക്കാൻ കഴിയില്ലെന്ന് വീണാ ജോർജ് വ്യക്തമാക്കി. സാധാരണക്കാരായ മനുഷ്യരുടെ ജീവന് സുരക്ഷിതത്വം ഉറപ്പാക്കാൻ സർക്കാരിന് ബാധ്യതയുണ്ട്. ഈ വിഷയത്തിൽ അടിയന്തരമായി ഇടപെടണമെന്നും, കുറ്റക്കാരായ ഉദ്യോഗസ്ഥർക്കെതിരെ ശക്തമായ നടപടികൾ സ്വീകരിക്കണമെന്നും അവർ ആവശ്യപ്പെട്ടു.

ആരോഗ്യ പ്രവർത്തകരുടെ സോഷ്യൽ മീഡിയ കുറിപ്പുകളിലൂടെയാണ് ഈ ദാരുണമായ സംഭവം പുറംലോകം അറിഞ്ഞത്. അർദ്ധരാത്രിയിലുണ്ടായ പവർ കട്ടാണ് രോഗിയുടെ മരണത്തിലേക്ക് നയിച്ചത് എന്ന ആരോപണവുമായി ബന്ധുക്കളും രംഗത്തെത്തിയിട്ടുണ്ട്. സംഭവത്തെക്കുറിച്ച് സമഗ്രമായ അന്വേഷണം വേണമെന്ന ആവശ്യം ഇതിനോടകം ശക്തമായിക്കഴിഞ്ഞു

---------------

Hindusthan Samachar / Roshith K