Thiruvananthapuram, 18 ജൂലൈ (H.S.)

തിരുവനന്തപുരം: ഡിവൈഎഫ്ഐയുടെ നേതൃത്വത്തിൽ മെഡിക്കൽ കോളേജുകൾ കേന്ദ്രീകരിച്ച് നടത്തിവരുന്ന പൊതിച്ചോറ് വിതരണ പദ്ധതി ഒരു കാരണവശാലും നിർത്തലാക്കില്ലെന്ന് ഡിവൈഎഫ്ഐ സംസ്ഥാന പ്രസിഡൻ്റ് വി. വസീഫ്. ബാനറും കൊടിയും കെട്ടി പൊതിച്ചോറ് വിതരണം ചെയ്യാൻ പാടില്ലെന്ന ആരോഗ്യമന്ത്രി കെ. മുരളീധരൻ്റെ പ്രസ്താവനയ്ക്ക് മറുപടി നൽകുകയായിരുന്നു അദ്ദേഹം. ഭരണപക്ഷം ഡിവൈഎഫ്ഐയുടെ പദ്ധതികൾ നിർത്തലാക്കാൻ ശ്രമിക്കുകയാണെന്നും എന്നാൽ ജനക്ഷേമകരമായ ഈ പദ്ധതിയുമായി സംഘടന മുന്നോട്ട് തന്നെ പോകുമെന്നും വസീഫ് വ്യക്തമാക്കി.

എല്ലാം മുടക്കുക എന്നുള്ളതാണ് ഭരണപക്ഷത്തിൻ്റെ പാരമ്പര്യമെന്നും എന്നാൽ നല്ല കാര്യങ്ങൾ തുടർന്നുകൊണ്ടേയിരിക്കുക എന്നുള്ളതാണ് ഡിവൈഎഫ്ഐയുടെ രീതിയെന്നും അദ്ദേഹം മാധ്യമങ്ങളോട് പ്രതികരിച്ചു. നിലവിൽ സർക്കാർ മെഡിക്കൽ കോളേജുകളിൽ ആവശ്യത്തിന് കമ്മ്യൂണിറ്റി കിച്ചണുകൾ (സാമൂഹിക അടുക്കളകൾ) ഇല്ലാത്തതുകൊണ്ടാണ് ഡിവൈഎഫ്ഐ ഇങ്ങനെയൊരു പദ്ധതിയുമായി മുന്നോട്ടുപോകുന്നത്. ആശുപത്രികളിൽ എത്തുന്ന പാവപ്പെട്ട രോഗികൾക്കും അവരുടെ കൂട്ടിരിപ്പുകാർക്കും ഭക്ഷണം മുടങ്ങാതിരിക്കുക എന്നതാണ് സംഘടനയുടെ ലക്ഷ്യം.

സർക്കാരിന് വേണമെങ്കിൽ മെഡിക്കൽ കോളേജുകളിൽ കമ്മ്യൂണിറ്റി കിച്ചണുകൾ തുടങ്ങാമെന്നും പാവപ്പെട്ടവരുടെ ഭക്ഷണം മുടങ്ങാതിരുന്നാൽ മാത്രം മതിയെന്നും വസീഫ് പറഞ്ഞു. ബാനറും കൊടിയും വെച്ച് ഭക്ഷണം വിതരണം ചെയ്യുന്നതിൽ എന്താണ് തെറ്റെന്നും അദ്ദേഹം ചോദിച്ചു. സർക്കാർ സംവിധാനങ്ങൾ വരുന്നത് വരെ കാത്തിരുന്ന് ജനങ്ങളെ പട്ടിണിക്കിടാൻ കഴിയില്ല. എന്തിനാണ് ഡിവൈഎഫ്ഐയുടെ ഈ ജനകീയ പദ്ധതിയെ തകർക്കാൻ നോക്കുന്നതെന്ന് ഭരണപക്ഷം വ്യക്തമാക്കണം.

പൊതിച്ചോറ് വിതരണത്തിന് പിന്നിൽ ഡിവൈഎഫ്ഐക്ക് മറ്റ് രാഷ്ട്രീയ താല്പര്യങ്ങൾ ഒന്നുമില്ല. വിശക്കുന്നവന് മുന്നിൽ കൊടിയുടെ നിറം നോക്കിയല്ല സംഘടന ഭക്ഷണം നൽകുന്നത്. ആവശ്യക്കാരായ എല്ലാവർക്കും ഇത് ലഭ്യമാക്കുന്നുണ്ട്. ഡിവൈഎഫ്ഐ ചെയ്യുന്ന ഈ കാരുണ്യ പ്രവർത്തനം മറ്റുള്ളവരും മാതൃകയാക്കണമെന്നും വസീഫ് കൂട്ടിച്ചേർത്തു.

നേരത്തെ, ബാനറും കൊടിയും കെട്ടി മെഡിക്കൽ കോളേജുകളിൽ ഭക്ഷണം കൊടുക്കാൻ പാടില്ലെന്നും, അതിന് പകരം കമ്മ്യൂണിറ്റി കിച്ചൻ എന്ന രീതിയിലാക്കി ഭക്ഷണം നൽകണമെന്നുമായിരുന്നു ആരോഗ്യമന്ത്രി കെ. മുരളീധരൻ്റെ പ്രതികരണം. ഇതിനെതിരെയാണ് ഇപ്പോൾ ഡിവൈഎഫ്ഐ സംസ്ഥാന നേതൃത്വം ശക്തമായ വിയോജിപ്പുമായി രംഗത്തെത്തിയിരിക്കുന്നത്. സംഘടനയുടെ ഈ നിലപാടോടെ വരും ദിവസങ്ങളിലും പൊതിച്ചോറ് വിതരണത്തെ ചൊല്ലിയുള്ള രാഷ്ട്രീയ തർക്കങ്ങൾ തുടരുമെന്നാണ് സൂചന.

---------------

Hindusthan Samachar / Roshith K