Thiruvananthapuram , 18 ജൂലൈ (H.S.)

തിരുവനന്തപുരം/കൊച്ചി: കെഎസ്യു സംസ്ഥാന അധ്യക്ഷൻ അലോഷ്യസ് സേവ്യറിന് മുഖ്യമന്ത്രി പിണറായി വിജയൻ കൂടിക്കാഴ്ച നിഷേധിച്ചെന്ന വാർത്തകൾ തള്ളി മുഖ്യമന്ത്രിയുടെ ഓഫീസ് രംഗത്ത്. അലോഷ്യസ് സേവ്യറിന് കൂടിക്കാഴ്ചയ്ക്കുള്ള അനുമതി നിഷേധിച്ചിട്ടില്ലെന്നും, വസ്തുതകൾ മറച്ചുവെച്ചാണ് പ്രചാരണം നടക്കുന്നതെന്നും മുഖ്യമന്ത്രിയുടെ ഓഫീസ് വാർത്താക്കുറിപ്പിലൂടെ വ്യക്തമാക്കി. പ്രതിപക്ഷ നേതാവ് വി.ഡി. സതീശന്റെ ഓഫീസും വിഷയത്തിൽ സമാനമായ വിശദീകരണവുമായി രംഗത്തെത്തിയിട്ടുണ്ട്.

മുഖ്യമന്ത്രിയുമായി കൂടിക്കാഴ്ചയ്ക്ക് സമയം തേടിയ വ്യാഴാഴ്ച അദ്ദേഹം തിരുവനന്തപുരത്ത് ഉണ്ടായിരുന്നില്ലെന്നും കൊല്ലം ജില്ലയിലെ ഔദ്യോഗിക പരിപാടികളിൽ പങ്കെടുക്കുകയായിരുന്നു എന്നുമാണ് മുഖ്യമന്ത്രിയുടെ ഓഫീസ് അറിയിച്ചത്. ഈ വിവരം അലോഷ്യസ് സേവ്യറിനെ കൃത്യമായി ധരിപ്പിച്ചിരുന്നു. കൂടാതെ, തൊട്ടടുത്ത ദിവസമായ വെള്ളിയാഴ്ച മുഖ്യമന്ത്രി കൊച്ചിയിലെ വിവിധ പരിപാടികളിൽ പങ്കെടുക്കാൻ പോകുകയാണെന്ന വിവരവും അദ്ദേഹത്തെ അറിയിച്ചിരുന്നു. എന്നാൽ ഇതിന് ശേഷം മുഖ്യമന്ത്രിയുടെ ഓഫീസുമായി ബന്ധപ്പെടാനോ, മറ്റേതെങ്കിലും ദിവസങ്ങളിൽ കൂടിക്കാഴ്ചയ്ക്കായി സമയം തേടാനോ കെഎസ്യു അധ്യക്ഷൻ തയ്യാറായിട്ടില്ലെന്നും മുഖ്യമന്ത്രിയുടെ ഓഫീസ് പുറത്തുവിട്ട വിശദീകരണത്തിൽ പറയുന്നു.

അതേസമയം, ഈ വിഷയത്തിൽ വി.ഡി. സതീശന്റെ ഓഫീസും നിലപാട് വ്യക്തമാക്കിയിട്ടുണ്ട്. വ്യാഴാഴ്ച കൊല്ലത്തും വെള്ളിയാഴ്ച കൊച്ചിയിലുമായിരുന്നു മുഖ്യമന്ത്രിയുടെ പരിപാടികളെന്നും ഈ വിവരങ്ങൾ അലോഷ്യസിനെ മുൻകൂട്ടി അറിയിച്ചിരുന്നുവെന്നും പ്രതിപക്ഷ നേതാവിന്റെ ഓഫീസും സ്ഥിരീകരിച്ചു.

കൊച്ചിയിൽ പോസ്റ്റർ പ്രതിഷേധം

വിഷയം രാഷ്ട്രീയമായി ചർച്ച ചെയ്യപ്പെടുന്നതിനിടെ കെഎസ്യു സംസ്ഥാന അധ്യക്ഷൻ അലോഷ്യസ് സേവ്യറിന് പിന്തുണ പ്രഖ്യാപിച്ച് കൊച്ചി നഗരത്തിന്റെ വിവിധ ഭാഗങ്ങളിൽ പോസ്റ്ററുകൾ പ്രത്യക്ഷപ്പെട്ടു. മുഖ്യമന്ത്രി കെഎസ്യു അധ്യക്ഷന് കൂടിക്കാഴ്ച നിഷേധിച്ചു എന്ന വാർത്തകൾക്ക് പിന്നാലെയാണ് അലോഷ്യസിനെ അനുകൂലിച്ചും സർക്കാരിനെ വിമർശിച്ചും പോസ്റ്ററുകൾ പതിച്ചിരിക്കുന്നത്.

വിദ്യാർത്ഥി സംഘടനയുടെ നേതാവിനോട് മുഖ്യമന്ത്രി കാണിക്കുന്നത് രാഷ്ട്രീയ അസഹിഷ്ണുതയാണെന്നാണ് പോസ്റ്ററുകളിലെ ആരോപണം. കെഎസ്യു പ്രവർത്തകരുടെ നേതൃത്വത്തിലാണ് പോസ്റ്ററുകൾ പതിച്ചിട്ടുള്ളത് എന്നാണ് സൂചന. വരും ദിവസങ്ങളിൽ ഈ വിഷയമുയർത്തി ശക്തമായ സമരപരിപാടികളുമായി മുന്നോട്ട് പോകാനാണ് കെഎസ്യുവിന്റെ നീക്കം. എന്നാൽ കൂടിക്കാഴ്ചയ്ക്കുള്ള സാങ്കേതികമായ തടസ്സങ്ങളെ രാഷ്ട്രീയവൽക്കരിക്കാനാണ് കോൺഗ്രസും കെഎസ്യുവും ശ്രമിക്കുന്നതെന്ന് ഇടത് സംഘടനകളും ആരോപിക്കുന്നു.

---------------

Hindusthan Samachar / Roshith K