Enter your Email Address to subscribe to our newsletters
Thiruvananthapuram , 18 ജൂലൈ (H.S.)
തിരുവനന്തപുരം: സംസ്ഥാനത്ത് നിലവിലുള്ള കടുത്ത വൈദ്യുതി പ്രതിസന്ധിയെ തുടർന്ന് പ്രഖ്യാപിച്ചിട്ടുള്ള താൽക്കാലിക വൈദ്യുതി നിയന്ത്രണം ഇന്നും തുടരുമെന്ന് കേരള സ്റ്റേറ്റ് ഇലക്ട്രിസിറ്റി ബോർഡ് അറിയിച്ചു. ഉപഭോഗം വൻതോതിൽ ഉയർന്നതും ആഭ്യന്തര ഉൽപ്പാദനത്തിലെ കുറവുമാണ് കടുത്ത തീരുമാനത്തിലേക്ക് നയിച്ചത്. നിലവിലെ പ്രതിസന്ധി മറികടക്കാൻ വൈദ്യുതി നിയന്ത്രണം ഏർപ്പെടുത്തുകയല്ലാതെ മറ്റ് മാർഗ്ഗങ്ങളില്ലെന്ന കർശന നിലപാടിലാണ് അധികൃതർ.
കഴിഞ്ഞ ദിവസങ്ങളിൽ സംസ്ഥാനത്തിന്റെ വിവിധ ഭാഗങ്ങളിൽ പീക്ക് അവറുകളിൽ അനുഭവപ്പെട്ട അപ്രതീക്ഷിത വൈദ്യുതി തടസ്സം ജനങ്ങളെ കടുത്ത ദുരിതത്തിലാഴ്ത്തിയിരുന്നു. ഇന്നലെയും പല സ്ഥലങ്ങളിലും അരമണിക്കൂറിലധികം സമയമാണ് വൈദ്യുതി മുടങ്ങിയത്. മുൻകൂട്ടി അറിയിക്കാതെയുള്ള ഈ നിയന്ത്രണം ജനജീവിതത്തെയും വ്യാപാര മേഖലകളെയും ഒരുപോലെ ബാധിച്ചിട്ടുണ്ട്. ആവശ്യത്തിന് വൈദ്യുതി വിപണിയിൽ നിന്ന് ലഭ്യമാകാത്ത സാഹചര്യത്തിലാണ് പവർ ഗ്രിഡിന്റെ സുരക്ഷിതത്വം മുൻനിർത്തി നിയന്ത്രണം കർശനമാക്കുന്നത്.
അന്തരീക്ഷ താപനിലയിലുണ്ടായ മാറ്റവും ഉയർന്ന ഉപയോഗവും കാരണം മുൻ ദിവസങ്ങളെ അപേക്ഷിച്ച് 400 മുതൽ 500 മെഗാ വാട്ട് വരെ വൈദ്യുതിയുടെ അധിക ആവശ്യകതയാണ് സംസ്ഥാനത്ത് നിലവിലുള്ളത്. കടുത്ത വേനലിന് സമാനമായ സാഹചര്യമായതിനാൽ വീടുകളിലും സ്ഥാപനങ്ങളിലും എയർ കണ്ടീഷണറുകളുടെയും ഫാനുകളുടെയും ഉപയോഗം ക്രമാതീതമായി ഉയർന്നു. ഇത് പീക്ക് സമയങ്ങളിലെ ലോഡ് വൻതോതിൽ വർധിപ്പിക്കാൻ കാരണമായി. തദ്ദേശീയമായ ഉൽപ്പാദനവും പുറത്തുനിന്ന് വാങ്ങുന്ന വൈദ്യുതിയും കൊണ്ട് മാത്രം ഈ അധിക ആവശ്യകത പൂർണ്ണമായി പരിഹരിക്കാൻ നിലവിൽ സാധിക്കുന്നില്ല.
ഇപ്പോഴുള്ള വൈദ്യുതി നിയന്ത്രണവുമായി മുന്നോട്ട് പോയാൽ മാത്രമേ ഗ്രിഡ് തകരാറിലാകാതെ ഈ വലിയ പ്രതിസന്ധി താൽക്കാലികമായെങ്കിലും പരിഹരിക്കാൻ കഴിയൂ എന്ന നിലപാടിലാണ് സംസ്ഥാന സർക്കാരുള്ളത്. വൈദ്യുതി പാഴാക്കുന്നത് ഒഴിവാക്കണമെന്നും, വൈകുന്നേരങ്ങളിൽ എസിയുടെ ഉപയോഗം നിയന്ത്രിച്ചും അനാവശ്യമായ ലൈറ്റുകൾ അണച്ചും ഉപഭോക്താക്കൾ സഹകരിക്കണമെന്നും സർക്കാർ അഭ്യർത്ഥിച്ചു. വരും ദിവസങ്ങളിലും മഴയുടെ ലഭ്യത കുറയുകയും ഉപഭോഗം ഉയർന്നുതന്നെ നിൽക്കുകയും ചെയ്താൽ നിയന്ത്രണം കൂടുതൽ സമയത്തേക്ക് നീട്ടേണ്ടി വരുമെന്നാണ് സൂചന. വൻതോതിലുള്ള വൈദ്യുതി പ്രതിസന്ധി മുന്നിൽക്കണ്ട് വരും ദിവസങ്ങളിൽ കൂടുതൽ ശക്തമായ നടപടികളിലേക്ക് കടക്കാനാണ് അധികൃതരുടെ തീരുമാനം.
---------------
Hindusthan Samachar / Roshith K
