Newdelhi , 19 ജൂലൈ (H.S.)

ന്യൂഡൽഹി: അയോധ്യയിലെ ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റുമായി ബന്ധപ്പെട്ട് ഉയർന്നുവന്ന കോടികളുടെ സാമ്പത്തിക ക്രമക്കേടുകളിലും പണം കവർന്നുവെന്ന ആരോപണങ്ങളിലും കടുത്ത നടപടി ആവശ്യപ്പെട്ട് പ്രതിപക്ഷം. വിഷയത്തിൽ പ്രധാനമന്ത്രി നരേന്ദ്ര മോദിയുടെ നിശബ്ദത ചോദ്യം ചെയ്തുകൊണ്ട് ലോക്സഭയിലെ പ്രതിപക്ഷ നേതാവ് രാഹുൽ ഗാന്ധിയും രാജ്യസഭയിലെ പ്രതിപക്ഷ നേതാവ് മല്ലികാർജുൻ ഖാർഗെയും പ്രധാനമന്ത്രിക്ക് സംയുക്തമായി കത്തയച്ചു. ലക്ഷക്കണക്കിന് ഭക്തർ തങ്ങളുടെ കഠിനാധ്വാനത്തിലൂടെ സമ്പാദിച്ച പണം വിശ്വാസത്തോടെ നൽകിയതാണെന്നും, ഈ കവർച്ചയിലൂടെ അവർ വഞ്ചിക്കപ്പെട്ടിരിക്കുകയാണെന്നും കോൺഗ്രസ് നേതാക്കൾ കത്തിൽ ചൂണ്ടിക്കാട്ടി.

ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റിന്റെ എല്ലാ സാമ്പത്തിക ഇടപാടുകളെക്കുറിച്ചും നിഷ്പക്ഷവും സമഗ്രവുമായ അന്വേഷണം വേണമെന്നാണ് പ്രതിപക്ഷത്തിന്റെ പ്രധാന ആവശ്യം.

പ്രധാനമന്ത്രിയുടെ മൗനം അംഗീകരിക്കാനാവില്ല

സുപ്രീം കോടതിയുടെ നിർദ്ദേശപ്രകാരം പാർലമെന്റിൽ വെച്ചാണ് പ്രധാനമന്ത്രി നരേന്ദ്ര മോദി ഈ ട്രസ്റ്റ് രൂപീകരണം പ്രഖ്യാപിച്ചതെന്ന് കത്തിൽ ഓർമ്മിപ്പിക്കുന്നു. എന്നാൽ ട്രസ്റ്റിലെ അംഗങ്ങളെ മുഴുവൻ നിയമിച്ചത് കേന്ദ്ര സർക്കാരാണ്. ട്രസ്റ്റ് അംഗങ്ങൾക്ക് ആർ.എസ്.എസ്, വി.എച്ച്.പി തുടങ്ങിയ സംഘടനകളുമായി വ്യക്തമായ ബന്ധമുണ്ടെന്നത് പരസ്യമായ കാര്യമാണ്. അതുകൊണ്ടുതന്നെ, ഇത്രയും വലിയൊരു ക്രമക്കേട് പുറത്തുവന്നിട്ടും പ്രധാനമന്ത്രി പുലർത്തുന്ന മൗനം അംഗീകരിക്കാൻ കഴിയുന്നതല്ലെന്ന് രാഹുൽ ഗാന്ധിയും ഖാർഗെയും വ്യക്തമാക്കി.

ആയിരക്കണക്കിന് കോടി രൂപയുടെ തട്ടിപ്പാണ് ട്രസ്റ്റിൽ നടന്നിരിക്കുന്നത്. ഭക്തിയോടും വിശ്വാസത്തോടും കൂടി തങ്ങളുടെ സമ്പാദ്യം ദാനമായി നൽകിയ ഭാരതത്തിലെ ലക്ഷക്കണക്കിന് ഭക്തരെ ഈ കവർച്ച വേദനിപ്പിക്കുന്നു. ഇത്തരം ഒരു കുറ്റകൃത്യത്തിന് മുന്നിൽ അങ്ങയുടെ ഭാഗത്തുനിന്നുണ്ടാകുന്ന നിശബ്ദത സ്വീകാര്യമല്ല. ഇതിൽ കൃത്യമായ ഉത്തരവാദിത്തം ഉറപ്പാക്കേണ്ടത് അങ്ങയുടെ ചുമതലയാണ്, കോൺഗ്രസ് നേതാക്കൾ കത്തിൽ കുറിച്ചു.

ട്രസ്റ്റിന്റെ അക്കൗണ്ടുകൾ പരസ്യപ്പെടുത്തണം

ട്രസ്റ്റിലേക്ക് ഭക്തർ സമർപ്പിച്ച പണം, സ്വർണം, വെള്ളി എന്നിവയുൾപ്പെടെയുള്ള എല്ലാ വഴിപാടുകളും എങ്ങനെ കൈകാര്യം ചെയ്തു എന്നതിനെക്കുറിച്ച് സ്വതന്ത്രമായ അന്വേഷണം പ്രഖ്യാപിക്കണമെന്ന് കത്തിൽ ആവശ്യപ്പെടുന്നു. അന്വേഷണ റിപ്പോർട്ടും ട്രസ്റ്റിന്റെ സാമ്പത്തിക അക്കൗണ്ടുകളും പൊതുജനങ്ങൾക്കായി പരസ്യപ്പെടുത്തണം. എങ്കിൽ മാത്രമേ തങ്ങൾ സമർപ്പിച്ച വഴിപാടുകൾ എന്തിനാണ് ഉപയോഗിച്ചതെന്ന് ഓരോ ഭക്തനും കൃത്യമായി മനസ്സിലാക്കാൻ സാധിക്കൂ.

പദവിയോ സ്വാധീനമോ നോക്കാതെ, ഈ തട്ടിപ്പിൽ പങ്കാളികളായ മുഴുവൻ പേരെയും നിയമത്തിന് മുന്നിൽ കൊണ്ടുവരണമെന്നും കത്തിൽ പറയുന്നു. ഈ വിഷയത്തിൽ എത്രത്തോളം സുതാര്യമായും വേഗത്തിലും സർക്കാർ നടപടി സ്വീകരിക്കുന്നു എന്നതിനെ ആശ്രയിച്ചിരിക്കും കേന്ദ്ര സർക്കാരിന്റെയും ട്രസ്റ്റിന്റെയും വിശ്വാസ്യതയെന്നും നേതാക്കൾ കൂട്ടിച്ചേർത്തു.

എന്താണ് വിവാദം?

അയോധ്യയിലെ രാമക്ഷേത്ര നിർമ്മാണത്തിനും മേൽനോട്ടത്തിനുമായി രൂപീകരിച്ച ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റിന് ലഭിച്ച സംഭാവനകളിൽ വലിയ രീതിയിലുള്ള സാമ്പത്തിക ക്രമക്കേടുകൾ നടന്നുവെന്ന ആരോപണം കഴിഞ്ഞ മാസമാണ് പുറത്തുവന്നത്. ട്രസ്റ്റിന്റെ അന്തസ്സിന് കളങ്കമുണ്ടാകാതിരിക്കാൻ ഈ കവർച്ചാ വിവരം ആദ്യം മൂടിവെക്കാൻ ശ്രമിച്ചതായും റിപ്പോർട്ടുകളുണ്ട്. തുടർന്ന് ഉത്തർപ്രദേശ് സർക്കാർ ജൂൺ 13-ന് കേസ് അന്വേഷിക്കാൻ പ്രത്യേക അന്വേഷണ സംഘത്തെ (SIT) നിയോഗിച്ചിരുന്നു. നിലവിൽ സുപ്രീം കോടതിയുടെ മേൽനോട്ടത്തിലാണ് എസ്.ഐ.ടി അന്വേഷണം പുരോഗമിക്കുന്നത്. ഇതിനിടയിലാണ് രാജ്യത്തെ പ്രമുഖ പ്രതിപക്ഷ നേതാക്കൾ നേരിട്ട് പ്രധാനമന്ത്രിക്ക് കത്തയച്ചുകൊണ്ട് രംഗത്തെത്തിയിരിക്കുന്നത്.

---------------

Hindusthan Samachar / Roshith K