Lucknow , 18 ജൂലൈ (H.S.)

ലഖ്നൗ: വരാനിരിക്കുന്ന 2027-ലെ ഉത്തർപ്രദേശ് നിയമസഭാ തിരഞ്ഞെടുപ്പിൽ ഭാരതീയ ജനതാ പാർട്ടിയെ (ബിജെപി) പരാജയപ്പെടുത്താൻ അഖിലേഷ് യാദവിൻ്റെ സമാജ്വാദി പാർട്ടിയുമായോ മായാവതിയുടെ ബഹുജൻ സമാജ് പാർട്ടിയുമായോ (ബിഎസ്പി) സഖ്യം രൂപീകരിക്കാൻ തങ്ങളുടെ പാർട്ടി തയ്യാറാണെന്ന് ഓൾ ഇന്ത്യ മജ്ലിസ്-ഇ-ഇത്തേഹാദുൽ മുസ്ലിമീൻ (എഐഎംഐഎം) അധ്യക്ഷൻ അസദുദ്ദീൻ ഒവൈസി. ഇന്ത്യ ടിവിക്ക് നൽകിയ പ്രത്യേക അഭിമുഖത്തിലാണ് ഹൈദരാബാദിൽ നിന്നുള്ള ലോക്സഭാ എംപി കൂടിയായ ഒവൈസി ഇക്കാര്യം വ്യക്തമാക്കിയത്. ബിജെപിയെ തോൽപ്പിക്കാൻ പ്രതിപക്ഷ പാർട്ടികൾക്ക് ആത്മാർത്ഥമായ താല്പര്യമുണ്ടെങ്കിൽ സഖ്യത്തിന് മുൻകൈ എടുക്കണമെന്നും തീരുമാനം ഇനി അവരുടെ കോർട്ടിലാണെന്നും അദ്ദേഹം പറഞ്ഞു.

ഉത്തർപ്രദേശ് തിരഞ്ഞെടുപ്പിൽ എഐഎംഐഎം മത്സരിക്കുന്നതിനെ ചോദ്യം ചെയ്യുന്ന പ്രതിപക്ഷ പാർട്ടികൾക്കെതിരെ അദ്ദേഹം രൂക്ഷമായ വിമർശനം ഉന്നയിച്ചു. തങ്ങൾ തിരഞ്ഞെടുപ്പിൽ മത്സരിക്കുന്നതിൽ മറ്റുള്ളവർക്ക് എന്താണ് ഇത്ര ബുദ്ധിമുട്ടെന്ന് ഒവൈസി ചോദിച്ചു. ബിജെപിയെ തടയുക എന്ന ലക്ഷ്യത്തിൽ തങ്ങളുടെ പാർട്ടി ഉറച്ചുനിൽക്കുകയാണ്. സഖ്യത്തിനായി തങ്ങൾ എന്നും വാതിൽ തുറന്നിട്ടിരിക്കുകയാണെന്നും പ്രതിപക്ഷ പാർട്ടികൾ അതിന് തയ്യാറാണെങ്കിൽ സീറ്റ് വിഭജന ചർച്ചകളിലേക്ക് കടക്കാൻ തങ്ങൾക്ക് യാതൊരു മടിയുമില്ലെന്നും ഒവൈസി കൂട്ടിച്ചേർത്തു.

മുൻകാല അനുഭവങ്ങൾ പങ്കുവെച്ചുകൊണ്ട് പ്രതിപക്ഷത്തിൻ്റെ മനോഭാവത്തെ ഒവൈസി കുറ്റപ്പെടുത്തി. ബീഹാർ നിയമസഭാ തിരഞ്ഞെടുപ്പ് സമയത്ത് സഖ്യത്തിനായി വെറും ആറ് സീറ്റുകൾ മാത്രമാണ് തങ്ങൾ ആവശ്യപ്പെട്ടത്. എന്നാൽ പ്രതിപക്ഷ പാർട്ടികൾ അതിന് തയ്യാറായില്ല. യുപിയിലെ മുൻ തിരഞ്ഞെടുപ്പുകളിൽ സമാജ്വാദി പാർട്ടി അധ്യക്ഷൻ അഖിലേഷ് യാദവ് തങ്ങൾക്കെതിരെ പ്രചാരണം നടത്തുകയും തങ്ങളുടെ സ്ഥാനാർത്ഥികളെ പരാജയപ്പെടുത്താൻ ശ്രമിക്കുകയും ചെയ്തു. എങ്കിലും, ബിജെപിയെ ഒന്നിച്ച് നിന്ന് പരാജയപ്പെടുത്തേണ്ടതുണ്ട്. തങ്ങളെ മതേതരവാദികളായി കണക്കാക്കുന്ന എല്ലാവരുമായും സഖ്യമുണ്ടാക്കാൻ തങ്ങൾ ഇപ്പോഴും തയ്യാറാണെന്നും അദ്ദേഹം പറഞ്ഞു.

ബിഎസ്പിയുമായും ചന്ദ്രശേഖർ ആസാദിൻ്റെ ആസാദ് സമാജ് പാർട്ടിയുമായും (എഎസ്പി) എഐഎംഐഎം സഖ്യ ചർച്ചകൾ നടത്തുന്നുണ്ടെന്ന തരത്തിൽ പ്രചരിക്കുന്ന വാർത്തകൾ ഒവൈസി തള്ളി. ഇത്തരം പ്രചാരണങ്ങളിൽ അടിസ്ഥാനമില്ലെന്ന് പറഞ്ഞ അദ്ദേഹം, എന്നാൽ ബിജെപിയെ പരാജയപ്പെടുത്താൻ പ്രതിജ്ഞാബദ്ധരായ ആരുമായും കൈകോർക്കാൻ തങ്ങൾക്ക് മടിയില്ലെന്നും വ്യക്തമാക്കി.

അഭിമുഖത്തിൽ ബിജെപിക്കെതിരെയും കേന്ദ്ര സർക്കാരിനെതിരെയും കടുത്ത രാഷ്ട്രീയ വിമർശനങ്ങളാണ് ഒവൈസി ഉന്നയിച്ചത്. മുസ്ലിം ജനവിഭാഗങ്ങൾ വിദ്യാഭ്യാസം നേടുന്നതിനെ ബിജെപിയും അവരുടെ ആശയപരമായ മാതൃസംഘടനയായ ആർഎസ്എസും ഭയപ്പെടുന്നുവെന്ന് അദ്ദേഹം ആരോപിച്ചു. അസം ഖാൻ്റെ ജൗഹർ സർവ്വകലാശാലയ്ക്കെതിരെയുള്ള ബുൾഡോസർ നടപടിയെ പരാമർശിച്ചുകൊണ്ട് സംസാരിക്കവേ, മുസ്ലീങ്ങൾക്ക് വിദ്യാഭ്യാസം നൽകുന്നത് രാജ്യത്തിൻ്റെ വികസനത്തിന് (വികസിത് ഭാരത്) സഹായിക്കുകയേ ഉള്ളൂവെന്ന് അദ്ദേഹം ഓർമ്മിപ്പിച്ചു. മുസ്ലീങ്ങളെ ലക്ഷ്യമിട്ടാണ് ബിജെപി ഏകീകൃത സിവിൽ കോഡ് (യുസിസി) കൊണ്ടുവരാൻ ശ്രമിക്കുന്നതെന്നും പാർലമെൻ്റിൻ്റെ വരാനിരിക്കുന്ന വർഷകാല സമ്മേളനത്തിൽ ഇത്തരം ബില്ലുകൾ ധൃതിപിടിച്ച് പാസാക്കാനാണ് സർക്കാർ ശ്രമിക്കുന്നതെന്നും അദ്ദേഹം ആരോപിച്ചു.

അതോടൊപ്പം തൃണമൂൽ കോൺഗ്രസിൽ (ടിഎംസി) നിലനിൽക്കുന്ന ആഭ്യന്തര തർക്കങ്ങളെക്കുറിച്ചും അദ്ദേഹം പ്രതികരിച്ചു. 15 വർഷത്തോളം അധികാരത്തിൽ ഇരുന്നിട്ടും എന്തുകൊണ്ടാണ് നേതാക്കൾ പാർട്ടി വിട്ടുപോകുന്നതെന്ന് പശ്ചിമ ബംഗാൾ മുഖ്യമന്ത്രി മമത ബാനർജിയോട് ചോദിക്കണം. അവർ നുണയന്മാരാണെന്നും ബംഗാൾ തിരഞ്ഞെടുപ്പിൽ അവർക്ക് തിരിച്ചടിയുണ്ടാകുമെന്ന് താൻ നേരത്തെ മുന്നറിയിപ്പ് നൽകിയിരുന്നതാണെന്നും ഒവൈസി ഇന്ത്യ ടിവിയോട് പറഞ്ഞു. വരാനിരിക്കുന്ന യുപി തിരഞ്ഞെടുപ്പിൽ പ്രതിപക്ഷ നിരയിൽ എഐഎംഐഎമ്മിൻ്റെ സാന്നിധ്യം നിർണായകമാകുമെന്ന സൂചന നൽകിക്കൊണ്ടാണ് ഒവൈസി അഭിമുഖം അവസാനിപ്പിച്ചത്.

---------------

Hindusthan Samachar / Roshith K