Thiruvananthapuram, 19 ജൂലൈ (H.S.)

തിരുവനന്തപുരം: കേരളത്തിന്റെ വികസന സ്വപ്നങ്ങൾക്ക് ചിറകേകി വിഴിഞ്ഞം അന്താരാഷ്ട്ര തുറമുഖം സമ്പൂർണ കയറ്റുമതി-ഇറക്കുമതി (എക്സിം - EXIM) തുറമുഖമായി മാറുന്നു. ഇതിന്റെ ഔദ്യോഗികമായ തുടക്കം കുറിച്ചുകൊണ്ട്, വിഴിഞ്ഞത്തുനിന്നുള്ള ആദ്യ കയറ്റുമതി കണ്ടെയ്നർ ഓഗസ്റ്റ് 18-ാം തീയതി മുഖ്യമന്ത്രി വി.ഡി. സതീശൻ ഫ്ലാഗ്ഓഫ് ചെയ്യും. അന്താരാഷ്ട്ര കപ്പൽ ചാലുകളോട് ചേർന്നുകിടക്കുന്ന വിഴിഞ്ഞത്തിന്റെ ചരിത്രത്തിലെ ഏറ്റവും നിർണായകമായ നാഴികക്കല്ലാവും ഈ ചടങ്ങ്.

ഇതുവരെ കേവലം ഒരു ട്രാൻസ്ഷിപ്പ്മെന്റ് ഹബ്ബായി മാത്രം പ്രവർത്തിച്ചിരുന്ന വിഴിഞ്ഞം തുറമുഖം, ഇതോടെ രാജ്യത്തെ പ്രമുഖമായ ഒരു 'ഗേറ്റ് വേ' പോർട്ടായി (Gateway Port) പുതിയ ഭാവത്തിലേക്ക് മാറും. വലിയ മദർ ഷിപ്പുകളിൽ (വലിയ കപ്പലുകളിൽ) കൊണ്ടുവരുന്ന കണ്ടെയ്നറുകൾ വിഴിഞ്ഞത്തിറക്കി വെക്കുകയും, അവിടെനിന്ന് ചെറിയ ഫീഡർ കപ്പലുകളിലേക്ക് മാറ്റി കയറ്റി മറ്റ് പ്രാദേശിക തുറമുഖങ്ങളിലേക്ക് വിതരണം ചെയ്യുകയും ചെയ്യുന്ന ട്രാൻസ്ഷിപ്പ്മെന്റ് ബിസിനസാണ് നിലവിൽ വിഴിഞ്ഞത്ത് സജീവമായി നടക്കുന്നത്. ഇതിൽ നിന്നൊരു വലിയ ചുവടുവെപ്പാണ് പുതിയ മാറ്റത്തിലൂടെ സാധ്യമാകുന്നത്.

നിലവിൽ കേരളത്തിൽ നിന്നടക്കമുള്ള ഇന്ത്യൻ വ്യാപാരികളുടെ കയറ്റുമതി പ്രധാനമായും കൊളംബോ, സിംഗപ്പൂർ തുടങ്ങിയ വിദേശ തുറമുഖങ്ങളെ ആശ്രയിച്ചാണ് നടക്കുന്നത്. ഇവിടുത്തെ ഉത്പന്നങ്ങൾ ചെറിയ കപ്പലുകളിൽ വിദേശ തുറമുഖങ്ങളിൽ എത്തിച്ച്, അവിടെനിന്നാണ് ആഗോള വിപണിയിലേക്ക് വലിയ കപ്പലുകളിൽ കയറ്റി അയക്കുന്നത്. എന്നാൽ വിഴിഞ്ഞം സമ്പൂർണ എക്സിം തുറമുഖമാകുന്നതോടെ, ഇന്ത്യയിൽ നിന്നുള്ള കയറ്റുമതിയും ഇറക്കുമതിയും വിദേശ രാജ്യങ്ങളെ ആശ്രയിക്കാതെ നേരിട്ട് വിഴിഞ്ഞം വഴി സാധ്യമാകും. ഇത് വ്യാപാരികളുടെ സമയവും വലിയ സാമ്പത്തികച്ചെലവും ലാഭിക്കാൻ സഹായിക്കും.

ഈ വലിയ മാറ്റത്തോടെ തിരുവനന്തപുരം വരും നാളുകളിൽ ഒരു ആഗോള ബിസിനസ് ഹബ്ബായി (Global Business Hub) രൂപാന്തരപ്പെടുമെന്നാണ് വിലയിരുത്തപ്പെടുന്നത്. അന്താരാഷ്ട്ര തലത്തിലുള്ള വമ്പൻ കപ്പൽ കമ്പനികൾ വിഴിഞ്ഞത്തേക്ക് തങ്ങളുടെ സർവീസുകൾ വ്യാപിപ്പിക്കാൻ ഇതോടെ താല്പര്യം പ്രകടിപ്പിക്കും. കൂടുതൽ കപ്പലുകൾ എത്തുന്നതോടെ തുറമുഖ അനുബന്ധ വ്യവസായങ്ങളും വാണിജ്യ സംരംഭങ്ങളും തലസ്ഥാനത്ത് സജീവമാകും.

തുറമുഖത്തിന്റെ വികസനം സമ്പൂർണമാകുന്നതോടെ ഇതിന്റെ യഥാർത്ഥ ഗുണഫലം തദ്ദേശീയരായ ജനങ്ങളിലേക്ക് നേരിട്ട് ലഭ്യമായിത്തുടങ്ങുമെന്നതാണ് ഏറ്റവും വലിയ സവിശേഷത. വലിയ തോതിലുള്ള തൊഴിലവസരങ്ങളാണ് ഈ മേഖലയിൽ സൃഷ്ടിക്കപ്പെടാൻ പോകുന്നത്. കേരളത്തിലെയും പ്രത്യേകിച്ച് തിരുവനന്തപുരത്തെയും യുവാക്കൾക്ക് സ്വന്തം നാട്ടിൽ തന്നെ അന്താരാഷ്ട്ര നിലവാരമുള്ളതും മികച്ച ശമ്പളമുള്ളതുമായ ജോലികൾ കണ്ടെത്താൻ ഇത് വലിയ അവസരമൊരുക്കും. വിഴിഞ്ഞം തുറമുഖത്തിന്റെ ഈ ചരിത്രപരമായ മാറ്റം കേരളത്തിന്റെ സാമ്പത്തിക രംഗത്ത് വൻ കുതിച്ചുചാട്ടത്തിന് കാരണമാകുമെന്നാണ് പ്രതീക്ഷിക്കുന്നത്.

---------------

Hindusthan Samachar / Roshith K