Newdelhi, 02 ജൂലൈ (H.S.)

ന്യൂഡൽഹി: സാമ്പത്തിക ഇടപാടുകളിൽ സുതാര്യതയും ഉത്തരവാദിത്തവും ഉറപ്പുവരുത്തുന്നതിന്റെ ഭാഗമായി ഡൽഹിയിലെ വൈദ്യുതി വിതരണ കമ്പനികളിൽ (ഡിസ്കോം) ചരിത്രത്തിലാദ്യമായി കംപ്ട്രോളർ ആൻഡ് ഓഡിറ്റർ ജനറൽ (സി.എ.ജി) ഓഡിറ്റിങ് നടത്താൻ ഡൽഹി സർക്കാർ ഉത്തരവിട്ടു. മൂന്ന് മാസത്തിനകം ഈ ഓഡിറ്റ് നടപടികൾ പൂർത്തിയാക്കണമെന്നാണ് സർക്കാർ നിർദ്ദേശം നൽകിയിരിക്കുന്നത്. ഡൽഹി ഊർജ്ജ വകുപ്പ് അഡീഷണൽ സെക്രട്ടറി ഇത് സംബന്ധിച്ച ഔദ്യോഗിക ഉത്തരവ് പുറപ്പെടുവിച്ചു.

വൈദ്യുതി വിതരണ കമ്പനികളുടെ അക്കൗണ്ടുകൾ ഒരു സ്വതന്ത്ര ഏജൻസിയെക്കൊണ്ട് ഓഡിറ്റ് ചെയ്യിക്കണമെന്ന് വർഷങ്ങളായി ഉയർന്നുവരുന്ന ആവശ്യമാണ് ഇതോടെ യാഥാർത്ഥ്യമാകുന്നത്. മുൻപ് മുൻ മുഖ്യമന്ത്രി അരവിന്ദ് കെജ്രിവാളിന്റെ കാലത്ത് ഈ ആവശ്യം ശക്തമായി ഉന്നയിച്ചിരുന്നെങ്കിലും പലവിധ തടസ്സങ്ങളാൽ അത് നടപ്പായിരുന്നില്ല. സി.എ.ജി ഓഡിറ്റിനെതിരെ വൈദ്യുതി കമ്പനികൾ നിരന്തരം രംഗത്തുവരികയും കോടതികളെ സമീപിക്കുകയും ചെയ്തിരുന്നു. എന്നാൽ കോടതികളിൽ നിന്നും അനുകൂലമായ വിധി സമ്പാദിക്കാൻ കമ്പനികൾക്ക് കഴിയാതെ വന്നതോടെയാണ് മുഖ്യമന്ത്രി രേഖാ ഗുപ്തയുടെ നേതൃത്വത്തിലുള്ള ഡൽഹി സർക്കാർ ഓഡിറ്റ് ഉത്തരവുമായി മുന്നോട്ടുപോയത്.

വൈദ്യുതി കമ്പനികളുടെ യഥാർത്ഥ സാമ്പത്തിക സ്ഥിതിയും, അവർ അവകാശപ്പെടുന്ന 38,000 കോടി രൂപയുടെ കുടിശ്ശികയുമാണ് സി.എ.ജി പ്രധാനമായും പരിശോധിക്കുക. കമ്പനികൾ എല്ലാ വർഷവും വലിയ ലാഭത്തിലാണ് പ്രവർത്തിക്കുന്നതെന്നും ഡൽഹി സർക്കാരിന് കൃത്യമായി ഡിവിഡന്റ് (ലാഭവിഹിതം) നൽകുന്നുണ്ടെന്നുമാണ് ഔദ്യോഗിക കണക്കുകൾ വ്യക്തമാക്കുന്നത്. എന്നാൽ, ഇത്രയും ലാഭത്തിൽ പോകുന്ന കമ്പനികൾക്ക് എങ്ങനെയാണ് ഇത്രയും ഭീമമായ തുകയുടെ സാമ്പത്തിക ബാധ്യതയും കുടിശ്ശികയും ഉണ്ടായതെന്നാണ് ഡൽഹി സർക്കാർ ചോദിക്കുന്നത്.

ഈ സാമ്പത്തിക വൈരുദ്ധ്യമാണ് ഇത്തരമൊരു ഓഡിറ്റിലേക്ക് സർക്കാരിനെ നയിച്ചത്. കമ്പനികൾ അവകാശപ്പെടുന്ന കുടിശ്ശിക എത്രത്തോളം ന്യായമാണെന്നും, ഇത് കണക്കാക്കിയതിൽ എന്തെങ്കിലും തരത്തിലുള്ള അപാകതകളോ അക്കൗണ്ടിങ് കൃത്രിമങ്ങളോ നടന്നിട്ടുണ്ടോ എന്നും പരിശോധിക്കും. കൂടാതെ ഈ പ്രക്രിയയിലൂടെ സാധാരണക്കാരായ ഉപഭോക്താക്കൾക്കോ പൊതുഖജനാവിനോ എന്തെങ്കിലും തരത്തിലുള്ള സാമ്പത്തിക നഷ്ടം സംഭവിച്ചിട്ടുണ്ടോ എന്ന കാര്യത്തിലും സി.എ.ജി ഓഡിറ്റിലൂടെ വ്യക്തത വരുമെന്നാണ് സർക്കാർ പ്രതീക്ഷിക്കുന്നത്.

ഡൽഹിയുടെ ഊർജ്ജ മേഖലയിൽ വലിയ മാറ്റങ്ങൾക്ക് വഴിതുറക്കുന്ന ഒന്നായിരിക്കും ഈ സി.എ.ജി ഓഡിറ്റ്. സാധാരണക്കാരായ ജനങ്ങളെ ബാധിക്കുന്ന വൈദ്യുതി നിരക്കുകളെയും ഈ ഓഡിറ്റ് റിപ്പോർട്ട് സ്വാധീനിക്കാൻ സാധ്യതയുണ്ട്. വരും ദിവസങ്ങളിൽ ഇന്ത്യയിലെ തന്നെ ഏറ്റവും ശ്രദ്ധേയമായ സാമ്പത്തിക പരിശോധനകളിൽ ഒന്നായി ഡൽഹിയിലെ വൈദ്യുതി മേഖലയിലെ സി.എ.ജി ഓഡിറ്റിങ് മാറും എന്ന കാര്യത്തിൽ തർക്കമില്ല.

---------------

Hindusthan Samachar / Roshith K