Enter your Email Address to subscribe to our newsletters
Kottayam, 20 ജൂലൈ (H.S.)
സംസ്ഥാനത്തെ വൈദ്യുത നിയന്ത്രണങ്ങളില് വിമര്ശനം കടുപ്പിച്ച് പ്രതിപക്ഷം. വൈദ്യുതി പ്രതിസന്ധി കൃത്രിമമായി ക്ഷണിച്ച് വരുത്തിയതാണെന്നും ഉത്തരവാദിത്തങ്ങളില് നിന്ന് സര്ക്കാര് ഒളിച്ചോടരുതെന്നും സിപിഎം നേതാവ് വിഎന് വാസവന് പറഞ്ഞു. സംസ്ഥാനത്ത് നിലനില്ക്കുന്ന കടുത്ത വൈദ്യുതി പ്രതിസന്ധിയും ലോഡ്ഷെഡിങ്ങും സര്ക്കാരിന്റെയും വൈദ്യുതി വകുപ്പിന്റെയും അനാസ്ഥയും കെടുകാര്യസ്ഥതയും കാരണം കൃത്രിമമായി ക്ഷണിച്ച് വരുത്തിയതാണ്. അത്യന്തം വിഷമകരമായ ഈ സാഹചര്യത്തില് ഭരണകൂടം തങ്ങളുടെ ഉത്തരവാദിത്തങ്ങളില് നിന്ന് ഒളിച്ചോടാതെ സമയബന്ധിതമായി അടിയന്തര നടപടികള് സ്വീകരിച്ച് പ്രശ്നത്തിന് പരിഹാരം കാണണമെന്ന് അദ്ദേഹം ആവശ്യപ്പെട്ടു.
മുമ്പൊരിക്കലും അനുഭവപ്പെടാത്ത വിധം സംസ്ഥാനത്തെ അന്ധകാരത്തിലേക്ക് തള്ളിവിട്ട സര്ക്കാര് ഇരുട്ടിന്റെ മറവില് നടക്കുന്ന വലിയ തോതിലുള്ള കവര്ച്ചകള്ക്കും സാമൂഹിക വിരുദ്ധ പ്രവര്ത്തനങ്ങള്ക്കും വഴിമരുന്നിടുകയാണ്. മാര്ച്ച്-ഏപ്രില് മാസങ്ങളില് പ്രതിദിന ഉപയോഗം 103 ദശലക്ഷം യൂണിറ്റ് വരെ ഉയര്ന്നപ്പോഴും തടസമില്ലാതെ വൈദ്യുതി വിതരണം നടത്താന് സാധിച്ചിരുന്നു. എന്നാല് ഉപയോഗം 93 ദശലക്ഷം യൂണിറ്റായി കുറഞ്ഞ സമയത്താണ് നിലവിലെ വൈദ്യുതി തടസങ്ങളും പവര് കട്ടുകളും ഉണ്ടായിരിക്കുന്നത്.
പുറത്ത് നിന്ന് വൈദ്യുതി വാങ്ങുന്നതിന് റെഗുലേറ്ററി കമ്മിഷന്റെ അനുമതി തേടുന്നതില് വൈദ്യുതി വകുപ്പിന് വലിയ വീഴ്ച പറ്റി. ബിഡ് ഓപ്പണ് ചെയ്ത 14 ദിവസം കഴിഞ്ഞിട്ടും വിവരം റെഗുലേറ്ററി കമ്മിഷനെ അറിയിക്കാന് വൈദ്യുതി വകുപ്പോ സര്ക്കാരോ തയ്യാറായില്ലെന്ന കമ്മിഷന്റെ വിശദീകരണം സര്ക്കാരിന്റെ വീഴ്ച തുറന്നുകാട്ടുന്നതാണ്.
സ്ട്രീറ്റ് ലൈറ്റുകള് കത്താത്തതും തുടര്ച്ചയായ പവര്കട്ടും കാരണം മീനടം, വെളിയന്നൂര് തുടങ്ങി വിവിധ പഞ്ചായത്തുകളില് വീടുകള് കുത്തിത്തുറന്ന് വന് മോഷണങ്ങളാണ് കഴിഞ്ഞ ദിവസങ്ങളില് നടന്നത്.കഴിഞ്ഞ ഒരു പതിറ്റാണ്ട് കാലം പവര്കട്ടോ ലോഡ്ഷെഡിങ്ങോ എന്തെന്നറിയാത്ത ഒരു തലമുറയ്ക്ക് മുമ്പിലേക്കാണ് വൈദ്യുതി എപ്പോഴെങ്കിലും വന്നുപോകുന്ന ഒരു അതിഥിയെപ്പോലെ മാറ്റിയെടുത്തിരിക്കുന്നത്.
വല്ലപ്പോഴും മാത്രം വെളിച്ചം തരുന്ന മിന്നല് വെളിച്ചമായി വൈദ്യുതി മാറി. സ്ട്രീറ്റ് ലൈറ്റുകള് കത്താതായതോടെ രാത്രികാലങ്ങളില് വീടുകള് കുത്തിത്തുറന്ന് മോഷണം നടത്തുന്ന സംഘങ്ങള് സജീവമായിരിക്കുകയാണ്. സര്ക്കാരിന്റെയും വകുപ്പിന്റെയും ഭാഗത്ത് നിന്നുണ്ടായ ഈ അനാസ്ഥ അങ്ങേയറ്റം പ്രതിഷേധാര്ഹമാണ്. ഉത്തരവാദിത്തങ്ങളില് നിന്ന് മാറിനില്ക്കാതെ സമയബന്ധിതമായി ഇടപെട്ട് ജനങ്ങളുടെ ഈ ദുരിതത്തിന് ഉടനടി പരിഹാരം കാണണമെന്നും വിഎന് വാസവന് പറഞ്ഞു.
കുട്ടികളുടെ പഠനത്തെയും ആശുപത്രികളുടെ പ്രവര്ത്തനങ്ങളെയും വൈദ്യുതി മുടക്കം രൂക്ഷമായി ബാധിച്ചിട്ടുണ്ട്. അനാസ്ഥയും അനാവശ്യ വൈകലും കാരണം നാടിനെ ഇരുട്ടിലാക്കിയ വൈദ്യുതി വകുപ്പും സര്ക്കാരും ജനങ്ങളോട് മറുപടി പറയാന് ബാധ്യസ്ഥരാണെന്നും അടിയന്തരമായി പ്രശ്നം പരിഹരിക്കണമെന്നും വിഎന് വാസവന് പറഞ്ഞു.
മെഡിക്കല് കോളജ് വളപ്പില് സന്നദ്ധ സംഘടനകള് നടത്തുന്ന സൗജന്യ ഭക്ഷണ വിതരണത്തിന് നിയന്ത്രണം ഏര്പ്പെടുത്തുകയും പിന്നീട് തിരുത്തുകയും ചെയ്യുന്ന സര്ക്കാരിന്റെ 'യു-ടേണ്' നിലപാടുകളെയും വാസവന് വിമര്ശിച്ചു. തീരുമാനം പ്രഖ്യാപിച്ച ശേഷം അതിനെതിരെ പ്രതിഷേധം ഉയരുമ്പോള് അങ്ങനെയല്ല പറഞ്ഞതെന്ന് തിരുത്തി പറയുന്ന നിലപാടാണ് സര്ക്കാരും ആരോഗ്യ മന്ത്രിയും തുടക്കം മുതല് സ്വീകരിക്കുന്നത്. മെഡിക്കല് കോളജുകളില് ആശുപത്രി അധികൃതര് തന്നെ കമ്മ്യൂണിറ്റി കിച്ചണ് ആരംഭിക്കുമെന്ന ആരോഗ്യ മന്ത്രിയുടെ പുതിയ നിര്ദേശം തികച്ചും അപ്രായോഗികവും അശാസ്ത്രീയവുമാണ്.
വിശക്കുന്നവന്റെ രാഷ്ട്രീയമോ ജാതിയോ മതമോ നോക്കിയല്ല സന്നദ്ധ സംഘടനകള് ഭക്ഷണ വിതരണം നടത്തുന്നതെന്നും ഇത്തരം ജനകീയ പ്രവര്ത്തനങ്ങള്ക്ക് തടയിടുന്നത് ആതുരസേവന രംഗത്ത് പ്രവര്ത്തിക്കുന്ന ആര്ക്കും ചേര്ന്നതല്ലെന്നും അദ്ദേഹം പറഞ്ഞു. ആദ്യമൊരു പ്രഖ്യാപനം നടത്തുക, അത് വലിയ എതിര്പ്പിന് വഴിവയ്ക്കുമ്പോള് അങ്ങനെ ആയിരുന്നില്ല ഉദ്ദേശിച്ചതെന്ന് പറഞ്ഞ് തിരുത്തുക-ഇതാണ് ഈ ഗവണ്മെന്റിന്റെ രീതി.
ആദ്യം മുതല് നമ്മള് കാണുന്നൊരു യു-ടേണ് നയമാണിത്. മെഡിക്കല് കോളജിലെ രോഗികള്ക്കും കൂട്ടിരിപ്പുകാര്ക്കും ഭക്ഷണത്തിന് ഒറ്റ പരിഗണന മാത്രമേയുള്ളൂ. ഡിവൈഎഫ്ഐ, അഭയം ചാരിറ്റബിള് സൊസൈറ്റി, നവജീവന്, എന്റെ ഗ്രാമം സൊസൈറ്റി തുടങ്ങി നിരവധി ചാരിറ്റബിള് സംഘടനകള് യാതൊരു ലാഭേച്ഛയുമില്ലാതെയാണ് ഇവിടെ സൗജന്യ ഭക്ഷണം എത്തിക്കുന്നത്.
വിതരണം ചെയ്യുന്നവരുടെ ബോര്ഡുകള് വച്ച് കൃത്യമായ മേല്നോട്ടത്തില് ഭക്ഷണം നല്കുന്നത് പിഴവുകള് കണ്ടുപിടിക്കാനും തിരുത്താനും സഹായിക്കും. മന്ത്രിയുടെ സ്വന്തം ജില്ലയില് പോലും ഇത്തരത്തില് ബോര്ഡ് വച്ച് സംഘടനകള് ഭക്ഷണം നല്കുന്നുണ്ട്. ഡിവൈഎഫ്ഐ വീടുകളില് നിന്ന് സമാഹരിച്ച് നല്കുന്ന പോതിച്ചോറ് വിതരണമടക്കം നാടിന് വലിയ ആശ്വാസമാണ് നല്കുന്നത്. ഇത്തരം സേവനങ്ങളെ തടയുകയും പിന്നീട് വാക്കുമാറ്റി പറയുകയും ചെയ്യുന്നത് സര്ക്കാരിന്റെ അസ്ഥിരതയാണ് കാണിക്കുന്നതെന്നും അദ്ദേഹം ചൂണ്ടിക്കാട്ടി.
---------------
Hindusthan Samachar / Sreejith S
