Newyork , 20 ജൂലൈ (H.S.)

ന്യൂയോർക്ക്: ലോക ഫുട്ബോളിന്റെ പുതിയ രാജാക്കന്മാരായി സ്പെയിൻ. ആവേശകരമായ ഫിഫ ലോകകപ്പ് ഫൈനലിൽ നിലവിലെ ചാമ്പ്യന്മാരായ അർജന്റീനയെ എക്സ്ട്രാ ടൈമിൽ ഏകപക്ഷീയമായ ഒരു ഗോളിന് പരാജയപ്പെടുത്തിയാണ് സ്പെയിൻ തങ്ങളുടെ രണ്ടാം ലോകകപ്പ് കിരീടം സ്വന്തമാക്കിയത്. ആവേശം അണപൊട്ടിയൊഴുകിയ മത്സരത്തിന്റെ 107-ാം മിനിറ്റിൽ ഫെറാൻ ടോറസ് നേടിയ തകർപ്പൻ ഗോളാണ് സ്പെയിനിന് ചരിത്ര വിജയം സമ്മാനിച്ചത്. 2010-ൽ ദക്ഷിണാഫ്രിക്കയിൽ കിരീടം നേടിയതിന് ശേഷം സ്പെയിൻ സ്വന്തമാക്കുന്ന ആദ്യ ലോകകപ്പ് കിരീടമാണിത്.

ന്യൂയോർക്ക് ന്യൂജേഴ്സി സ്റ്റേഡിയത്തിൽ നടന്ന മത്സരത്തിലുടനീളം പന്തടക്കത്തിൽ സ്പെയിൻ വ്യക്തമായ ആധിപത്യം പുലർത്തിയിരുന്നു. എന്നാൽ അർജന്റീനയുടെ കരുത്തുറ്റ പ്രതിരോധം തകർക്കാൻ അവർക്ക് ഏറെ വിയർപ്പൊഴുക്കേണ്ടി വന്നു. നിശ്ചിത സമയത്തിന്റെ ഇഞ്ചുറി ടൈമിൽ അർജന്റീനൻ മധ്യനിര താരം എൻസോ ഫെർണാണ്ടസ് രണ്ടാമത്തെ മഞ്ഞക്കാർഡും തുടർന്ന് ചുവപ്പ് കാർഡും കണ്ട് പുറത്തായതോടെയാണ് മത്സരത്തിന്റെ ഗതി മാറിയത്. ഇതോടെ അവസാന മിനിറ്റുകളിൽ 10 പേരുമായാണ് അർജന്റീന കളിച്ചത്.

മത്സരത്തിലുടനീളം സ്പെയിൻ 60 ശതമാനത്തിലധികം പന്തടക്കം നിലനിർത്തിയപ്പോൾ, അർജന്റീനൻ മുന്നേറ്റങ്ങൾക്ക് സ്പാനിഷ് ഗോൾമുഖത്ത് കാര്യമായ ചലനങ്ങൾ ഉണ്ടാക്കാൻ കഴിഞ്ഞില്ല. മത്സരത്തിലുടനീളം ലക്ഷ്യത്തിലേക്ക് ഒരു ഷോട്ട് പോലും ഉതിർക്കാൻ അർജന്റീനയ്ക്ക് സാധിച്ചില്ല എന്നത് സ്പാനിഷ് പ്രതിരോധത്തിന്റെ കരുത്ത് വിളിച്ചോതുന്നു. സൂപ്പർ താരം ലയണൽ മെസ്സിക്ക് സ്പാനിഷ് പ്രതിരോധക്കോട്ട തകർക്കാൻ സാധിച്ചില്ല. മെസ്സിയെ സ്പാനിഷ് താരങ്ങൾ കൃത്യമായി മാർക്ക് ചെയ്ത് നിർത്തിയതോടെ അർജന്റീനൻ ആക്രമണങ്ങളുടെ മൂർച്ച കുറഞ്ഞു. മത്സരം പെനാൽറ്റി ഷൂട്ടൗട്ടിലേക്ക് നീട്ടുക എന്ന ലക്ഷ്യത്തോടെയാണ് അർജന്റീന അവസാന ഘട്ടത്തിൽ കളിച്ചത്.

അർജന്റീനയുടെ ഗോൾകീപ്പർ എമിലിയാനോ മാർട്ടിനെസിന്റെ അവിശ്വസനീയമായ പ്രകടനമാണ് മത്സരത്തെ എക്സ്ട്രാ ടൈം വരെ എത്തിച്ചത്. ഫൈനൽ ചരിത്രത്തിൽ ഒരു ഗോൾകീപ്പർ നടത്തുന്ന ഏറ്റവും ഉയർന്ന സേവുകളായ 11 രക്ഷപെടുത്തലുകളാണ് മാർട്ടിനെസ് നടത്തിയത്. ഒന്നാം പകുതിയുടെ അവസാനത്തിൽ മാർക്ക് കുക്കുറെല്ലയുടെ ഷോട്ടും, നിശ്ചിത സമയത്തിന്റെ ഇഞ്ചുറി ടൈമിൽ ലാമിൻ യമാലിന്റെ ഫ്രീകിക്കും തടുത്തിട്ട മാർട്ടിനെസ് അർജന്റീനയുടെ രക്ഷകനായി മാറി. നിക്കോ വില്യംസ്, പെഡ്രി, പോ കുബാർസി എന്നിവരുടെ ഗോളുറച്ച ശ്രമങ്ങളും മാർട്ടിനെസ് വിഫലമാക്കി.

മത്സരത്തിന്റെ 96-ാം മിനിറ്റിൽ നിക്കോ വില്യംസിലൂടെ സ്പെയിൻ പന്ത് വലയിലെത്തിച്ചിരുന്നെങ്കിലും, അതിന് തൊട്ടുമുമ്പ് നടന്ന ഫൗളിനെ തുടർന്ന് റഫറി ഗോൾ നിഷേധിച്ചു. എന്നാൽ പത്തുപേരുമായി ചുരുങ്ങിയ അർജന്റീനയെ സ്പെയിൻ നിരന്തരമായ ആക്രമണങ്ങളിലൂടെ സമ്മർദ്ദത്തിലാക്കി. ഒടുവിൽ 107-ാം മിനിറ്റിൽ കാത്തിരുന്ന നിമിഷമെത്തി. ബോക്സിലേക്ക് വന്ന ഒരു ആഴത്തിലുള്ള ക്രോസ് നിക്കോ വില്യംസ് ഹെഡ്ഡ് ചെയ്ത് നൽകിയപ്പോൾ, കൃത്യമായി നിലയുറപ്പിച്ച ഫെറാൻ ടോറസ് പന്ത് അർജന്റീനയുടെ വലയിലേക്ക് പായിച്ചു. മാർട്ടിനെസിന് ഇത്തവണ രക്ഷകനാകാൻ കഴിഞ്ഞില്ല. ഈ ഒരൊറ്റ ഗോളിന്റെ ബലത്തിൽ സ്പെയിൻ ലോകകിരീടം വീണ്ടെടുത്തു. റണ്ണേഴ്സ് അപ്പായെങ്കിലും പോരാട്ടവീര്യം കൈവിടാതെയാണ് അർജന്റീന ടൂർണമെന്റ് അവസാനിപ്പിച്ചത്.

---------------

Hindusthan Samachar / Roshith K