Newdelhi , 22 ജൂലൈ (H.S.)

ന്യൂഡൽഹി: തലസ്ഥാനത്ത് തുടരുന്ന വൻ പ്രതിഷേധങ്ങളുടെയും സുരക്ഷാ മുൻകരുതലുകളുടെയും പശ്ചാത്തലത്തിൽ ഡൽഹി മെട്രോയുടെ 16 പ്രധാന സ്റ്റേഷനുകൾ താൽക്കാലികമായി അടച്ചുപൂട്ടിയതായി ഡൽഹി മെട്രോ റെയിൽ കോർപ്പറേഷൻ (DMRC) അറിയിച്ചു. രാജീവ് ചൗക്ക്, പട്ടേൽ ചൗക്ക്, സെൻട്രൽ സെക്രട്ടേറിയറ്റ് തുടങ്ങിയ അതീവ സുരക്ഷാ മേഖലകളിലെ സ്റ്റേഷനുകളാണ് അടച്ചത്. അടുത്ത അറിയിപ്പ് ഉണ്ടാകുന്നതുവരെ ഈ സ്റ്റേഷനുകളിൽ യാത്രക്കാർക്ക് പ്രവേശനമോ എക്സിറ്റോ ഉണ്ടായിരിക്കില്ലെന്ന് ഔദ്യോഗിക പത്രക്കുറിപ്പിൽ വ്യക്തമാക്കിയിട്ടുണ്ട്.

ജന്തർ മന്തർ കേന്ദ്രീകരിച്ച് സിജെപി (Cockroach Janta Party) നടത്തുന്ന 'സൻസദ് ചലോ' മാർച്ചിന്റെയും പ്രതിഷേധങ്ങളുടെയും പശ്ചാത്തലത്തിൽ ഡൽഹി പൊലീസിന്റെയും സുരക്ഷാ ഏജൻസികളുടെയും നിർദ്ദേശപ്രകാരമാണ് ഡിഎംആർസി ഈ നടപടിയെടുത്തത്. പാർലമെന്റിന്റെ മൺസൂൺ സെഷൻ നടക്കുന്നതിനാൽ നഗരത്തിലുടനീളം കടുത്ത സുരക്ഷാ നിയന്ത്രണങ്ങൾ നിലനിൽക്കുന്നുണ്ട്.

തടസ്സമില്ലാതെ ട്രെയിൻ സർവീസുകളും ഇന്റർചേഞ്ച് സൗകര്യവും

മെട്രോ സ്റ്റേഷനുകൾ അടച്ചെങ്കിലും ട്രെയിൻ സർവീസുകൾ പൂർണ്ണമായി നിർത്തിവെച്ചിട്ടില്ല. അടച്ചിട്ട സ്റ്റേഷനുകളിൽ ട്രെയിനുകൾ നിർത്തില്ലെങ്കിലും പ്രധാന ഇന്റർചേഞ്ച് സ്റ്റേഷനുകളായ രാജീവ് ചൗക്ക്, മണ്ഡി ഹൗസ്, സെൻട്രൽ സെക്രട്ടേറിയറ്റ് എന്നിവിടങ്ങളിൽ മറ്റ് ലൈനുകളിലേക്ക് ട്രെയിൻ മാറി കയറാനുള്ള (Interchange) സൗകര്യം ലഭ്യമാണ്. എന്നാൽ ഈ സ്റ്റേഷനുകൾ വഴി പുറത്തേക്ക് പോകാനോ ഉള്ളിലേക്ക് പ്രവേശിക്കാനോ യാത്രക്കാരെ അനുവദിക്കില്ല.

അടച്ചിട്ട 16 മെട്രോ സ്റ്റേഷനുകളുടെ പട്ടിക:

-

ലോക കല്യാൺ മാർഗ് (Lok Kalyan Marg)

-

രാജീവ് ചൗക്ക് (Rajiv Chowk)

-

പട്ടേൽ ചൗക്ക് (Patel Chowk)

-

രാമകൃഷ്ണ ആശ്രമം മാർഗ് (Ramakrishna Ashram Marg)

-

ബരാഖംബ റോഡ് (Barakhambha Road)

-

സുപ്രീം കോർട്ട് (Supreme Court)

-

സേവാ തീർത്ഥ് (Seva Teerth)

-

ജൻപഥ് (Janpath)

-

മണ്ഡി ഹൗസ് (Mandi House)

-

സെൻട്രൽ സെക്രട്ടേറിയറ്റ് (Central Secretariat)

-

ഐടിഒ (ITO)

-

ഡൽഹി ഗേറ്റ് (Delhi Gate)

-

ഇന്ദ്രപ്രസ്ഥ (Indraprastha)

-

ഖാൻ മാർക്കറ്റ് (Khan Market)

-

ജോർ ബാഗ് (Jor Bagh)

-

ശിവജി സ്റ്റേഡിയം (Shivaji Stadium)

യാത്രക്കാർക്ക് ഡിഎംആർസിയുടെ നിർദ്ദേശം

മെട്രോ സ്റ്റേഷനുകൾ പെട്ടെന്ന് അടച്ചതോടെ ഓഫീസ് ജീവനക്കാരും വിദ്യാർത്ഥികളും ഉൾപ്പെടെ ആയിരക്കണക്കിന് യാത്രക്കാരാണ് ബുദ്ധിമുട്ടിലായത്. സെൻട്രൽ ഡൽഹിയിലേക്ക് യാത്ര ചെയ്യുന്നവർ മുൻകൂട്ടി ബദൽ മാർഗ്ഗങ്ങൾ ആസൂത്രണം ചെയ്യണമെന്ന് ഡിഎംആർസി അഭ്യർത്ഥിച്ചു. ട്രാഫിക് ഡൈവേർഷനുകളും വൻ പൊലീസ് സന്നാഹവും ഉള്ളതിനാൽ യാത്രയ്ക്ക് കൂടുതൽ സമയമെടുക്കാൻ സാധ്യതയുണ്ട്. സുരക്ഷാ ഏജൻസികളുടെ പച്ചക്കൊടി ലഭിച്ചാലുടൻ സർവീസുകൾ സാധാരണ നിലയിലാക്കുമെന്നും തത്സമയ വിവരങ്ങൾക്ക് ഡിഎംആർസിയുടെ സോഷ്യൽ മീഡിയ അക്കൗണ്ടുകൾ ശ്രദ്ധിക്കണമെന്നും അധികൃതർ അറിയിച്ചു.

---------------

Hindusthan Samachar / Roshith K