Newdelhi, 22 ജൂലൈ (H.S.)

ന്യൂഡൽഹി: രാജ്യതലസ്ഥാനത്ത് തിങ്കളാഴ്ച നടന്ന പ്രതിഷേധ മാർച്ചിന് നേരെയുണ്ടായ കടുത്ത പോലീസ് നടപടിയെക്കുറിച്ചുള്ള ഹർജി അടിയന്തരമായി ലിസ്റ്റ് ചെയ്യാൻ വിസമ്മതിച്ച് സുപ്രീം കോടതി. ഹർജിക്കാരനോട് കോടതിയുടെയും സ്വന്തം സമയവും പാഴാക്കരുതെന്ന് നിർദ്ദേശിച്ച ചീഫ് ജസ്റ്റിസ് സൂര്യകാന്ത്, പോലീസ് അതിക്രമത്തിന്റെ വീഡിയോ ദൃശ്യങ്ങൾ പരിശോധിക്കാൻ തങ്ങൾക്ക് താല്പര്യമില്ലെന്നും അതിനായി മാറ്റിവെക്കാൻ സമയമില്ലെന്നും വ്യക്തമാക്കി.

തിങ്കളാഴ്ച പാർലമെന്റിലേക്ക് നടന്ന 'സൻസദ് ചലോ' മാർച്ചിനിടെ വിദ്യാർത്ഥികൾക്കും പ്രതിഷേധക്കാർക്കും നേരെ പോലീസ് ക്രൂരമായ അടിച്ചമർത്തൽ അഴിച്ചുവിട്ടുവെന്ന് ചൂണ്ടിക്കാട്ടി അഭിഭാഷകൻ ചീഫ് ജസ്റ്റിസ് അധ്യക്ഷനായ ബെഞ്ചിന് മുന്നിൽ വിഷയം ഉന്നയിക്കുകയായിരുന്നു. പ്രതിഷേധക്കാർക്ക് നേരെ ലാത്തിച്ചാർജ്ജ്, കണ്ണീർവാതകം, പെല്ലറ്റ് ഗണ്ണുകൾ എന്നിവ ഉപയോഗിച്ചതിന് തെളിവായി വീഡിയോ ദൃശ്യങ്ങൾ കൈവശമുണ്ടെന്ന് ഹർജിക്കാരൻ ബെഞ്ചിനെ അറിയിച്ചു. എന്നാൽ, തങ്ങൾക്ക് ഇത്തരം വീഡിയോകൾ കാണാൻ താല്പര്യമില്ല, അതിനുള്ള സമയവുമില്ല എന്ന് ചീഫ് ജസ്റ്റിസ് സൂര്യകാന്ത് ഉറപ്പിച്ചു പറയുകയായിരുന്നു.

സംഘർഷഭരിതമായി രാജ്യതലസ്ഥാനം; സുരക്ഷ ശക്തമാക്കി

തിങ്കളാഴ്ചത്തെ സംഭവവികാസങ്ങളുടെ പശ്ചാത്തലത്തിൽ ഡൽഹിയിലുടനീളം സുരക്ഷാ ക്രമീകരണങ്ങൾ വൻതോതിൽ ശക്തമാക്കിയിട്ടുണ്ട്. തുടർച്ചയായ പ്രതിഷേധ സാധ്യതകൾ കണക്കിലെടുത്ത് സുരക്ഷാ മുൻകരുതലിന്റെ ഭാഗമായി തലസ്ഥാനത്തെ പ്രധാന മെട്രോ സ്റ്റേഷനുകൾ ഇന്നും അടച്ചിട്ടു. രാജീവ് ചൗക്ക്, ജൻപഥ് ഉൾപ്പെടെയുള്ള പ്രമുഖ സ്റ്റേഷനുകളിലാണ് നിയന്ത്രണം ഏർപ്പെടുത്തിയിട്ടുള്ളത്.

നീറ്റ്-യുജി (NEET-UG) പരീക്ഷാ ക്രമക്കേടുകൾ, നാഷണൽ ടെസ്റ്റിംഗ് ഏജൻസിയുടെ (NTA) പരിഷ്കരണം തുടങ്ങിയ ആവശ്യങ്ങൾ ഉന്നയിച്ച് സിജെപി (Cockroach Janta Party)-യുടെ നേതൃത്വത്തിലായിരുന്നു തിങ്കളാഴ്ച പാർലമെന്റ് മാർച്ച് സംഘടിപ്പിച്ചത്. മാർച്ചിൽ ആയിരക്കണക്കിന് വിദ്യാർത്ഥികളും യുവാക്കളുമാണ് പങ്കെടുത്തത്.

പെല്ലറ്റ് ഗൺ പ്രയോഗിച്ചതായി ആരോപണം; നിഷേധിച്ച് പോലീസ്

സമരക്കാർക്ക് നേരെ പോലീസ് അതിക്രൂരമായ ബലപ്രയോഗം നടത്തിയെന്നാണ് പ്രതിഷേധക്കാരുടെ പ്രധാന ആരോപണം. അക്രമം തടയാൻ എന്ന പേരിൽ പോലീസ് പെല്ലറ്റ് ഗണ്ണുകൾ ഉപയോഗിച്ചതായും നിരവധി വിദ്യാർത്ഥികൾക്ക് പരിക്കേറ്റതായും ആരോപണങ്ങൾ ഉയരുന്നുണ്ട്.

എന്നാൽ ഈ ആരോപണങ്ങൾ ഡൽഹി പോലീസ് ശക്തമായി നിഷേധിച്ചു. പ്രതിഷേധക്കാർ ബാരിക്കേഡുകൾ തകർത്ത് സുരക്ഷാ മേഖലയിലേക്ക് കടക്കാൻ ശ്രമിച്ചെന്നും കല്ലേറ് നടത്തിയതിനെത്തുടർന്ന് ജനക്കൂട്ടത്തെ പിരിച്ചുവിടാൻ മാത്രമാണ് സാധാരണ രീതിയിലുള്ള ബലപ്രയോഗവും കണ്ണീർവാതകവും ഉപയോഗിച്ചതെന്നുമാണ് പോലീസിന്റെ വിശദീകരണം.

ഉയർന്ന പ്രതിഷേധവും രാഷ്ട്രീയ ചലനങ്ങളും

വിദ്യാർത്ഥികൾക്ക് നേരെയുണ്ടായ പോലീസ് നടപടിയിൽ രാജ്യതലസ്ഥാനത്ത് രാഷ്ട്രീയ പ്രതിഷേധം കനക്കുകയാണ്. കേന്ദ്ര വിദ്യാഭ്യാസ മന്ത്രിയുടെ രാജി ആവശ്യപ്പെട്ടും പരിക്കേറ്റ വിദ്യാർത്ഥികൾക്ക് നീതി ആവശ്യപ്പെട്ടും പ്രതിപക്ഷ പാർട്ടികളും വിദ്യാർത്ഥി സംഘടനകളും രംഗത്തെത്തിയിട്ടുണ്ട്. ഇതിനിടെ, വിഷയം അടിയന്തരമായി പരിഗണിക്കണമെന്ന് ആവശ്യപ്പെട്ട് നൽകിയ ഹർജി ഡൽഹി ഹൈക്കോടതിയും നേരത്തെ തള്ളിയിരുന്നു. കോടതിയെ ഇത്തരം വിഷയങ്ങളിലേക്ക് വലിച്ചിഴയ്ക്കരുത് എന്നായിരുന്നു ഹൈക്കോടതിയുടെ നിരീക്ഷണം.

പോലീസ് നടപടിയെക്കുറിച്ചുള്ള ഹർജി പരിഗണിക്കാൻ സുപ്രീം കോടതിയും വിസമ്മതിച്ചതോടെ, തെരുവിൽ പ്രതിഷേധം കൂടുതൽ ശക്തമാക്കാനാണ് സമരാനുകൂലികളുടെ തീരുമാനം.

---------------

Hindusthan Samachar / Roshith K