Newdelhi, 22 ജൂലൈ (H.S.)

-

'ചലോ സംസദ്' മാർച്ചിനിടെ പെല്ലറ്റ് പ്രയോഗം നടത്തിയെന്ന ആരോപണം തള്ളി പൊലീസ്

-

വ്യജ വാർത്തകൾ പങ്കുവെക്കുന്നവർക്കെതിരെ കർശന നിയമനടപടി സ്വീകരിക്കുമെന്ന് മുന്നറിയിപ്പ്

ന്യൂദൽഹി: ദൽഹിയിൽ നടന്ന 'ചലോ സംസദ്' മാർച്ചിനിടെ സമരം ചെയ്ത സി.ജെ.പി (Cockroach Janta Party) പ്രവർത്തകർക്കെതിരെ സുരക്ഷാ സേന പെല്ലറ്റ് തോക്കുകൾ ഉപയോഗിച്ചെന്ന പ്രചാരണം പൂർണ്ണമായും തെറ്റും വസ്തുതാവിരുദ്ധവുമാണെന്ന് വ്യക്തമാക്കി ദൽഹി പൊലീസ്. സമാധാനപരമായി പ്രതിഷേധിച്ചവർക്കു നേരെ പെല്ലറ്റ് പ്രയോഗം നടന്നു എന്ന രീതിയിൽ സോഷ്യൽ മീഡിയയിൽ പ്രചരിക്കുന്ന വാർത്തകൾ അടിസ്ഥാനരഹിതമാണെന്ന് പൊലീസ് അറിയിച്ചു.

പ്രതിഷേധത്തിനിടെ പരിക്കേറ്റ് ആശുപത്രിയിൽ ചികിത്സയിൽ കഴിയുന്ന വ്യക്തിയുടെ ദൃശ്യങ്ങൾ പങ്കുവെച്ചുകൊണ്ട് ചില സംഘടനകളും വ്യക്തികളും നടത്തിയ ആരോപണങ്ങളെ തുടർന്നാണ് ദൽഹി പൊലീസ് ഔദ്യോഗിക പ്രതികരണവുമായി രംഗത്തെത്തിയത്. തങ്ങളുടെ ഔദ്യോഗിക എക്സ് (X) ഹാൻഡിലിലൂടെ 'ഫേക്ക് ന്യൂസ് അലേർട്ട്' (Fake News Alert) നൽകിക്കൊണ്ടാണ് പൊലീസ് ഈ കാര്യത്തിൽ വ്യക്തത വരുത്തിയത്.

പൊലീസിന്റെ മുന്നറിയിപ്പ്

സമാധാനപരമായി നടന്ന പ്രതിഷേധങ്ങൾക്ക് നേരെ പെല്ലറ്റ് തോക്കുകൾ ഉപയോഗിച്ചു എന്ന പ്രചാരണം പൂർണ്ണമായും വ്യാജവും ജനങ്ങളെ തെറ്റിദ്ധരിപ്പിക്കുന്നതുമാണെന്ന് ദൽഹി പൊലീസ് പുറപ്പെടുവിച്ച പ്രസ്താവനയിൽ പറയുന്നു. ഇത്തരം ഉറവിടമില്ലാത്ത വാർത്തകളും ദൃശ്യങ്ങളും സമൂഹമാധ്യമങ്ങളിലൂടെ പ്രചരിപ്പിക്കരുതെന്നും, വിവരങ്ങളുടെ സത്യാവസ്ഥ ഔദ്യോഗിക സ്രോതസ്സുകളിൽ നിന്ന് മാത്രം ഉറപ്പുവരുത്തിയ ശേഷം മാത്രം പങ്കുവെക്കണമെന്നും പൊതുജനങ്ങളോട് ദൽഹി പൊലീസ് അഭ്യർത്ഥിച്ചു. വ്യാജവാർത്തകളും തെറ്റിദ്ധരിപ്പിക്കുന്ന വിവരങ്ങളും പ്രചരിപ്പിക്കുന്ന വ്യക്തികൾക്കെതിരെ കർശനമായ നിയമനടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി.

പാർലമെന്റിലേക്ക് സംഘടിപ്പിച്ച 'ചലോ സംസദ്' മാർച്ചിനിടെ പോലീസും പ്രതിഷേധക്കാരും തമ്മിൽ സംഘർഷമുണ്ടാവുകയും ഇതിൽ നിരവധി സമരക്കാർക്കും പോലീസ് ഉദ്യോഗസ്ഥർക്കും പരിക്കേൽക്കുകയും ചെയ്തിരുന്നു. എന്നാൽ അക്രമം നിയന്ത്രിക്കുന്നതിനായി പെല്ലറ്റ് തോക്കുകൾ ഉപയോഗിച്ചിട്ടില്ലെന്നും അത്തരം പ്രചാരണങ്ങൾ തള്ളിക്കളയണമെന്നും പൊലീസ് ആവർത്തിച്ചു. PIB Fact Check ഉം ഇത്തരത്തിലുള്ള വാർത്തകൾ വ്യാജമാണെന്ന് സ്ഥിരീകരിച്ചിട്ടുണ്ട്.

---------------

Hindusthan Samachar / Roshith K