Thiruvananthapuram, 22 ജൂലൈ (H.S.)

തിരുവനന്തപുരം: കെഎസ്യു (KSU) നേതാക്കൾക്ക് കാണാൻ അനുമതി നിഷേധിച്ചു എന്ന രീതിയിൽ പ്രചരിക്കുന്ന മാധ്യമ വാർത്തകൾ പൂർണ്ണമായും നിഷേധിച്ച് മുഖ്യമന്ത്രി വി. ഡി. സതീശൻ. താൻ ആർക്കും കൂടിക്കാഴ്ചയ്ക്കുള്ള അനുമതി നിഷേധിച്ചിട്ടില്ലെന്നും പ്രതിദിനം ആയിരക്കണക്കിന് ആളുകളെ നേരിൽ കാണുകയും സംസാരിക്കുകയും ചെയ്യുന്നയാളാണ് താനെന്നും അദ്ദേഹം വ്യക്തമാക്കി. അടിസ്ഥാനരഹിതമായ ഇത്തരം വാർത്തകൾ നൽകരുതെന്ന് അദ്ദേഹം മാധ്യമങ്ങളോട് അഭ്യർത്ഥിച്ചു.

തേവര കോളേജിൽ വെച്ച് കെഎസ്യു സംസ്ഥാന പ്രസിഡന്റ് അലോഷ്യസ് സേവ്യറിനെ കണ്ടിട്ടും സംസാരിക്കാതെ പോയെന്ന പ്രചാരണത്തോടും മുഖ്യമന്ത്രി പ്രതികരിച്ചു. കോളേജിൽ വെച്ച് അലോഷ്യസിനെ താൻ കണ്ടിരുന്നില്ലെന്ന് അദ്ദേഹം വ്യക്തമാക്കി. പരിപാടിയുടെ വലിയ തിരക്കിലായതിനാൽ അങ്ങോട്ട് മാറുകയായിരുന്നുവെന്നും, പിന്നീട് മാധ്യമങ്ങളിലൂടെയാണ് തന്നെ കണ്ടിട്ടും 'മൈൻഡ് ചെയ്തില്ല' എന്ന തരത്തിലുള്ള വാര്ത്ത ശ്രദ്ധയിൽപ്പെട്ടതെന്നും അദ്ദേഹം കൂട്ടിച്ചേർത്തു.

സന്ദർശന സമയത്തെക്കുറിച്ചും അദ്ദേഹം വ്യക്തത വരുത്തി. അന്ന് രാവിലെ 10 മണി മുതൽ ഉച്ചയ്ക്ക് 1 മണി വരെ എറണാകുളം ഗസ്റ്റ് ഹൗസിൽ താൻ ഉണ്ടായിരുന്നുവെന്നും, കാണണമെന്ന് ആഗ്രഹമുണ്ടായിരുന്നവർക്ക് ആ സമയത്ത് വന്ന് കാണാൻ യാതൊരു തടസ്സവും ഉണ്ടായിരുന്നില്ലെന്നും വി. ഡി. സതീശൻ ചൂണ്ടിക്കാട്ടി.

കഴിഞ്ഞ കുറച്ചു ദിവസങ്ങളായി മുഖ്യമന്ത്രിയും കെഎസ്യു നേതൃത്വവും തമ്മിൽ അകൽച്ചയിലാണെന്നും കെഎസ്യു ഭാരവാഹികൾക്ക് മുഖ്യമന്ത്രി അനുമതി നിഷേധിക്കുന്നുവെന്നും ചില മാധ്യമങ്ങളിൽ റിപ്പോർട്ടുകൾ വന്നിരുന്നു. ഈ വാർത്തകൾ വലിയ രാഷ്ട്രീയ ചർച്ചകൾക്ക് വഴിതുറന്ന പശ്ചാത്തലത്തിലാണ് വിശദീകരണവുമായി മുഖ്യമന്ത്രി തന്നെ നേരിട്ട് രംഗത്തെത്തിയത്.

തന്റെ ഓഫീസോ വാതിലുകളോ പൊതുജനങ്ങൾക്കോ വിദ്യാർത്ഥി നേതാക്കൾക്കോ മുന്നിൽ ഒരിക്കലും അടഞ്ഞിട്ടില്ലെന്നും, തിരക്കുകൾക്കിടയിൽ സംഭവിക്കുന്ന ആശയക്കുഴപ്പങ്ങളെ തെറ്റായ രീതിയിൽ വ്യാഖ്യാനിച്ച് വാർത്തയാക്കരുതെന്നും അദ്ദേഹം അഭ്യർത്ഥിച്ചു. പാർട്ടിക്കുള്ളിലോ വിദ്യാർത്ഥി സംഘടനയുമായോ യാതൊരുവിധ അഭിപ്രായവ്യത്യാസങ്ങളുമില്ലെന്ന് വ്യക്തമാക്കുന്നതായിരുന്നു മുഖ്യമന്ത്രിയുടെ പ്രതികരണം.

വി.ഡി. സതീശനും കേരള സ്റ്റുഡന്റ്സ് യൂണിയനും (കെ.എസ്.യു.) തമ്മിലുള്ള സമീപകാല തർക്കത്തിന്റെ പ്രധാന വിവരങ്ങൾ താഴെ പറയുന്നവയാണ്:

പ്രധാന വിവരങ്ങളും സംഭവവികാസങ്ങളും:

- വിവാദം: ആർ.എസ്.എസ്., എസ്.എഫ്.ഐ. ബന്ധമുള്ളവരെ സർക്കാർ പ്ലീഡർമാരായി നിയമിച്ചതിനെതിരെ കോൺഗ്രസിന്റെ വിദ്യാർത്ഥി സംഘടനയായ കെ.എസ്.യു. ശക്തമായ എതിർപ്പ് പ്രകടിപ്പിച്ചു. 31 സീനിയർ ഗവൺമെന്റ് പ്ലീഡർമാരുടെ പട്ടികയിലെ ചില പേരുകളെ ചൊല്ലിയായിരുന്നു തർക്കം.

- സതീശന്റെ നിലപാട്: സർക്കാർ പ്ലീഡർമാരുടെ നിയമനത്തിൽ കെ.എസ്.യു.വിന് എന്ത് കാര്യമാണെന്ന് പരസ്യമായി ചോദിച്ച സതീശൻ, ഇത്തരം തീരുമാനങ്ങളിൽ അവർക്ക് പങ്കില്ലെന്ന് വ്യക്തമാക്കി സംഘടനയുടെ ആക്ഷേപങ്ങൾ തള്ളി.

- കൂടിക്കാഴ്ച നിരസിക്കൽ: കെ.എസ്.യു. സംസ്ഥാന പ്രസിഡന്റ് അലോഷ്യസ് സേവ്യറിന് സതീശന്റെ ഓഫീസ് കൂടിക്കാഴ്ചയ്ക്കുള്ള അനുമതി നിഷേധിച്ചുഎന്നരീതിയിൽആരോപണങ്ങൾഉയർന്നു. തുടർന്ന് കൊച്ചി സേക്രഡ് ഹാർട്ട് കോളേജിൽ നടന്ന ഒരു പൊതുപരിപാടിക്കിടെ സതീശൻ അലോഷ്യസ് സേവ്യറിനെ പരസ്യമായി അവഗണിച്ചതോടെ തർക്കം കൂടുതൽ രൂക്ഷമായി.

- പാർട്ടി പ്രതികരണം: ഈ വിഷയം കേരള കോൺഗ്രസിനുള്ളിൽ പുതിയ ചർച്ചകൾക്ക് വഴിതുറന്നു. കെ.സി. വേണുഗോപാൽ, രമേശ് ചെന്നിത്തല തുടങ്ങിയ നേതാക്കൾ പ്രശ്നം ലഘൂകരിച്ച് കാണിക്കാൻ ശ്രമിച്ചപ്പോൾ, മുതിർന്ന നേതാവ് വി.എം. സുധീരൻ കെ.എസ്.യു.വിന്റെ പ്രതിഷേധിക്കാനുള്ള അവകാശത്തെ പിന്തുണച്ച് രംഗത്തെത്തി

---------------

Hindusthan Samachar / Roshith K