Tehran , 23 ജൂലൈ (H.S.)

വാഷിംഗ്ടൺ/ടെഹ്റാൻ: ഇറാനിലെ സൈനിക കേന്ദ്രങ്ങൾക്ക് നേരെ അമേരിക്കൻ വ്യോമസേന നടത്തുന്ന ആക്രമണം കൂടുതൽ ശക്തമാകുന്നു. തുടർച്ചയായ 12-ാം രാത്രിയിലും യുഎസ് സേന ഇറാനിൽ വ്യാപക വ്യോമാക്രമണം നടത്തിയതായി യുഎസ് സെൻട്രൽ കമാൻഡ് (CENTCOM) സ്ഥിരീകരിച്ചു. പേർഷ്യൻ ഗൾഫിലെ ഹോർമൂസ് കടലിടുക്കിലൂടെ (Strait of Hormuz) സഞ്ചരിക്കുന്ന വാണിജ്യ കപ്പലുകൾക്കും നാവികർക്കും നേരെ ഇറാൻ ഉയർത്തുന്ന ഭീഷണികൾ പൂർണ്ണമായും ഇല്ലാതാക്കുകയാണ് ഈ ഘട്ടത്തിലെ ആക്രമണങ്ങളുടെ പ്രധാന ലക്ഷ്യമെന്ന് അമേരിക്കൻ സൈന്യം അറിയിച്ചു.

ട്രംപിന്റെ ശക്തമായ മുന്നറിയിപ്പ്

ഹോർമൂസ് കടലിടുക്കിലൂടെ കടന്നുപോകുന്ന കപ്പലുകൾക്ക് നേരെ ഇറാൻ ആക്രമണം നടത്തിയാൽ കടുത്ത പ്രത്യാഘാതം നേരിടേണ്ടി വരുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. ഇറാൻ ഏതെങ്കിലും തരത്തിൽ വാണിജ്യ കപ്പലുകളെ ലക്ഷ്യമിട്ടാൽ ഇറാന്റെ അടിസ്ഥാന സൗകര്യങ്ങൾ തകർക്കുമെന്നാണ് ട്രംപിന്റെ ഭീഷണി.

ഇനി മുതൽ, മിസൈലോ, റോക്കറ്റോ, ഡ്രോണോ അല്ലെങ്കിൽ മറ്റേതെങ്കിലും ആയുധമോ ഉപയോഗിച്ച് ഹോർമൂസ് കടലിടുക്കിലെ കപ്പലുകൾക്ക് നേരെ ഇറാൻ ആക്രമണം നടത്തുന്ന ഓരോ തവണയും, അമേരിക്ക ഇറാനിലെ ഒരു പാലമോ അല്ലെങ്കിൽ ഒരു വൈദ്യുത നിലയമോ ബോംബിട്ട് തകർക്കും, എന്ന് ട്രംപ് സോഷ്യൽ മീഡിയയിലൂടെ വ്യക്തമാക്കി.

'കണ്ണിന് കണ്ണ്' തിരിച്ചടിയെന്ന് ഇറാൻ

അമേരിക്കയുടെ ഭീഷണിയോട് കടുത്ത ഭാഷയിലാണ് ടെഹ്റാൻ പ്രതികരിച്ചത്. രാജ്യത്തിന്റെ സ്വയംഭരണത്തിനോ അടിസ്ഥാന സൗകര്യങ്ങൾക്കോ നേരെയുണ്ടാകുന്ന ഏത് ആക്രമണത്തിനും വൻ തിരിച്ചടി നൽകുമെന്ന് ഇറാൻ വിദേശകാര്യ മന്ത്രി സയ്യിദ് അബ്ബാസ് അരാഗ്ചി മുന്നറിയിപ്പ് നൽകി.

ഞങ്ങളുടെ പ്രതിരോധ നയം വ്യക്തമാണ്: കണ്ണിന് കണ്ണ്. ഇറാനെതിരെയോ ഞങ്ങളുടെ അടിസ്ഥാന സൗകര്യങ്ങൾക്കെതിരെയോ ഉണ്ടാകുന്ന ഏത് അധിനിവേശത്തിനും ശക്തവും നിർണ്ണായകവുമായ മറുപടി നൽകാൻ ഞങ്ങൾ നിർബന്ധിതരാകും. അമേരിക്കയുടെ ഇത്തരം ആക്രമണങ്ങൾക്ക് ഏതെങ്കിലും തരത്തിൽ പിന്തുണയോ സഹായമോ നൽകുന്നവരെയും ഞങ്ങളുടെ നിയമാനുസൃത ലക്ഷ്യസ്ഥാനങ്ങളായി (legitimate targets) കണക്കാക്കും, അരാഗ്ചി പറഞ്ഞു.

അതേസമയം, മേഖലയിൽ ഇറാന്റെ എണ്ണ വ്യാപാരം തടസ്സപ്പെട്ടാൽ മറ്റാരെയും എണ്ണ വിൽക്കാൻ അനുവദിക്കില്ലെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഗർ ഘാലിബാഫ് വ്യക്തമാക്കി. ഞങ്ങൾക്ക് എണ്ണ വിൽക്കാൻ കഴിയാത്ത ഒരു മേഖലയിൽ മറ്റാർക്കും എണ്ണ വിൽക്കാൻ കഴിയില്ല. ഇറാന്റെ സുരക്ഷ ഉറപ്പാക്കിയില്ലെങ്കിൽ മേഖലയിലെ ഒരു അടിസ്ഥാന സൗകര്യവും സുരക്ഷിതമായിരിക്കില്ല, എന്ന് അദ്ദേഹം കൂട്ടിച്ചേർത്തു.

ആഗോള സാമ്പത്തിക മേഖലയിൽ കടുത്ത ആശങ്ക

ഇരുരാജ്യങ്ങളും തമ്മിലുള്ള യുദ്ധസമാനമായ അന്തരീക്ഷം ലോക സമ്പദ്വ്യവസ്ഥയെ വലിയ തോതിൽ ബാധിച്ചിട്ടുണ്ട്. ലോകത്തിലെ ആകെ എണ്ണ-വാതക വ്യാപാരത്തിന്റെ അഞ്ചിലൊന്ന് ഭാഗവും കടന്നുപോകുന്ന പ്രധാന പാതയായ ഹോർമൂസ് കടലിടുക്കിലെ സംഘർഷം ഇന്ധനവില കുത്തനെ ഉയർത്തി. അന്താരാഷ്ട്ര വിപണിയിൽ ബ്രെന്റ് ക്രൂഡ് ഓയിൽ (Brent Crude Oil) വില ബാരലിന് 93 ഡോളറിന് മുകളിലെത്തി. മാസത്തിന്റെ തുടക്കത്തിൽ ബാരലിന് 72 ഡോളറിൽ താഴെയായിരുന്ന വിലയാണ് ഇപ്പോൾ കുതിച്ചുയർന്നിരിക്കുന്നത്. ചെങ്കടൽ പാതയിലൂടെയുള്ള കപ്പലുകളെ ആക്രമിക്കുമെന്ന് യെമനിലെ ഹൂത്തി വിമതരും മുന്നറിയിപ്പ് നൽകിയതോടെ ആഗോള ഇന്ധന വിതരണം കടുത്ത പ്രതിസന്ധിയിലേക്ക് നീങ്ങുകയാണ്.

---------------

Hindusthan Samachar / Roshith K