Thiruvananthapuram , 27 ജൂലൈ (H.S.)

തിരുവനന്തപുരം: സംസ്ഥാനത്ത് മൊബൈൽ ആപ്പുകളും സോഷ്യൽ മീഡിയയും കേന്ദ്രീകരിച്ച് വർദ്ധിച്ചുവരുന്ന ലഹരിവ്യാപാരത്തിന് തടയിടാൻ അത്യാധുനിക സംവിധാനങ്ങളുമായി എക്സൈസ് വകുപ്പ്. ലഹരി കടത്ത് തടയുന്നതിനും ഹൈടെക് രീതികളിൽ ഇടപാട് നടത്തുന്ന കുറ്റവാളികളെ അതിവേഗം പിടികൂടുന്നതിനുമായി എക്സൈസ് വകുപ്പിന് കീഴിൽ എക്സൈസ് സൈബർ സെന്റർ (Excise Cyber Centre) നിലവിൽ വരുന്നു.

ഐ.ടി ഹബ്ബായ കഴക്കൂട്ടം ടെക്നോപാർക്ക് കേന്ദ്രീകരിച്ചായിരിക്കും ഈ പ്രത്യേക സൈബർ സെന്റർ പ്രവർത്തിക്കുക. സാങ്കേതിക വിദ്യ ദുരുപയോഗം ചെയ്ത് നടക്കുന്ന ലഹരി ഇടപാടുകളെ നിരീക്ഷിക്കാനും തെളിവുകൾ ശേഖരിക്കാനും സൈബർ വിദഗ്ധരായ പ്രൊഫഷണലുകളുടെ ഒരു പ്രത്യേക സംഘത്തെ തന്നെ ഇതിനായി നിയോഗിക്കും.

ആപ്പ് വഴിയുള്ള ഇടപാടുകൾക്കും ഓൺലൈൻ ഡെലിവറിക്കും പൂട്ടുവീഴും

സമീപകാലത്തായി ലഹരിമാഫിയ പരമ്പരാഗത രീതികൾ ഉപേക്ഷിച്ച് എൻക്രിപ്റ്റഡ് ആപ്പുകൾ, ടെലഗ്രാം ഗ്രൂപ്പുകൾ, ഇൻസ്റ്റാഗ്രാം, ഡാർക്ക് വെബ് എന്നിവ വഴിയാണ് വൻതോതിൽ മയക്കുമരുന്ന് കച്ചവടം നടത്തുന്നത്. പോലീസിനും എക്സൈസിനും പെട്ടെന്ന് കണ്ടുപിടിക്കാൻ കഴിയാത്ത രീതിയിലാണ് ഇത്തരം ഓൺലൈൻ ശൃംഖലകളുടെ പ്രവർത്തനം.

പുതിയ സൈബർ സെന്റർ നിലവിൽ വരുന്നതോടെ ഇത്തരം ഡിജിറ്റൽ ഇടപാടുകൾ എളുപ്പത്തിൽ ട്രാക്ക് ചെയ്യാൻ സാധിക്കും.

സൈബർ സെന്ററിന്റെ പ്രധാന ചുമതലകൾ:

-

ഡിജിറ്റൽ സർവൈലൻസ്: ഇൻസ്റ്റാഗ്രാം, ടെലഗ്രാം, വാട്ട്സ്ആപ്പ് തുടങ്ങിയ സോഷ്യൽ മീഡിയ പ്ലാറ്റ്ഫോമുകൾ വഴിയുള്ള ലഹരി വിപണനം നിരീക്ഷിക്കൽ.

-

ടെക്നോപാർക്കിലെ വിദഗ്ധസംഘം: ഐ.ടി മേഖലയിലെ പ്രൊഫഷണലുകളുടെ സേവനം പ്രയോജനപ്പെടുത്തി ലഹരി ശൃംഖലകളുടെ ഓൺലൈൻ റൂട്ട് മാപ്പ് തയ്യാറാക്കൽ.

-

സാമ്പത്തിക ഇടപാടുകളുടെ പരിശോധന: യു.പി.ഐ (UPI) അക്കൗണ്ടുകളും ക്രിപ്റ്റോ കറൻസി ഇടപാടുകളും കേന്ദ്രീകരിച്ച് പരിശോധന ശക്തമാക്കൽ.

-

ത്വരിത അന്വേഷണം: ഫീൽഡിലുള്ള എക്സൈസ് ഉദ്യോഗസ്ഥർക്ക് ലൊക്കേഷൻ വിവരങ്ങളും ശാസ്ത്രീയ തെളിവുകളും തത്സമയം കൈമാറൽ.

-

എക്സൈസ് കമ്മീഷണർ രൂപരേഖ സർക്കാരിന് കൈമാറി

പദ്ധതിയുടെ സമഗ്രമായ രൂപരേഖ (Detailed Project Report) എക്സൈസ് കമ്മീഷണറുടെ നേതൃത്വത്തിൽ തയ്യാറാക്കി സംസ്ഥാന സർക്കാരിന് കൈമാറിയിട്ടുണ്ട്. ആഭ്യന്തര-നികുതി വകുപ്പുകളുടെ അനുമതിയും ആവശ്യമായ തുക വകയിരുത്തലും പൂർത്തിയാകുന്നതോടെ പദ്ധതിയുടെ നിർമ്മാണ പ്രവർത്തനങ്ങളിലേക്ക് കടക്കും.

സംസ്ഥാനത്ത് വിനാശകാരിയായ എം.ഡി.എം.എ പോലെയുള്ള രാസലഹരികളുടെ ഉപയോഗവും വിതരണവും ക്രമാതീതമായി വർദ്ധിച്ച സാഹചര്യത്തിലാണ് എക്സൈസ് വകുപ്പ് ഹൈടെക് പ്രതിരോധത്തിലേക്ക് തിരിയുന്നത്. വിദ്യാലയങ്ങളും കോളേജുകളും കേന്ദ്രീകരിച്ച് നടക്കുന്ന ഡിജിറ്റൽ ലഹരി വിതരണ ശൃംഖല തകർക്കാൻ പുതിയ സൈബർ സെന്റർ വലിയ അളവിൽ സഹായിക്കുമെന്നാണ് വിലയിരുത്തപ്പെടുന്നത്.

അതിവേഗത്തിലുള്ള സൈബർ അന്വേഷണങ്ങൾ സാധ്യമാകുന്നതോടെ ലഹരിക്കടത്തിലെ വൻസ്രാവുകളെയും അന്തർസംസ്ഥാന മാഫിയകളെയും നിയമത്തിന് മുന്നിൽ കൊണ്ടുവരാൻ സാധിക്കുമെന്ന പ്രതീക്ഷയിലാണ് എക്സൈസ് വകുപ്പ്.

---------------

Hindusthan Samachar / Roshith K