Mumbai, 27 ജൂലൈ (H.S.)

മുംബൈ: ഇ20 (20% ഈഥനോൾ കലർത്തിയ പെട്രോൾ) ഇന്ധന നയവുമായി ബന്ധപ്പെടുത്തി തനിക്കും കുടുംബത്തിനുമെതിരെ സമൂഹമാധ്യമങ്ങളിൽ നടക്കുന്ന വ്യാജ പ്രചാരണങ്ങൾക്കും ഡിജിറ്റൽ സാങ്കേതികവിദ്യ ഉപയോഗിച്ച് നിർമ്മിച്ച വ്യാജ വീഡിയോകൾക്കുമെതിരെ (ഡീപ് ഫേക്ക്) കേന്ദ്ര റോഡ് ഗതാഗത-ദേശീയപാത മന്ത്രി നിതിൻ ഗഡ്കരി ബോംബെ ഹൈക്കോടതിയെ സമീപിച്ചു. ഗഡ്കരിക്കും കുടുംബത്തിനും ഈഥനോൾ നിർമ്മാണത്തിലൂടെയും ഇ20 പദ്ധതിയിലൂടെയും വൻ സാമ്പത്തിക ലാഭമുണ്ടാകുന്നു എന്ന തരത്തിൽ സമൂഹമാധ്യമങ്ങളിൽ പ്രചരിക്കുന്ന അപകീർത്തികരമായ വിവരങ്ങൾക്കെതിരെയാണ് അദ്ദേഹം നിയമനടപടി സ്വീകരിച്ചത്.

മറ്റാ മെറ്റാ (Meta), ഗൂഗിൾ (Google) തുടങ്ങിയ പ്രമുഖ ഡിജിറ്റൽ പ്ലാറ്റ്ഫോമുകൾക്കും വ്യാജ സന്ദേശങ്ങൾ നിർമ്മിച്ച് പ്രചരിപ്പിക്കുന്ന അജ്ഞാത വ്യക്തികൾക്കുമെതിരെ സിവിൽ ഹർജി ഫയൽ ചെയ്യാൻ ബോംബെ ഹൈക്കോടതി ഗഡ്കരിക്ക് അനുമതി നൽകി.

ആരോപണങ്ങൾ വസ്തുതാവിരുദ്ധമെന്ന് ഗഡ്കരി

ഹൈക്കോടതിയിൽ സമർപ്പിച്ച ഹർജിയിൽ, സമൂഹമാധ്യമങ്ങളിൽ പ്രചരിക്കുന്ന ആരോപണങ്ങൾ പൂർണ്ണമായും അസത്യവും തെറ്റിദ്ധരിപ്പിക്കുന്നതുമാണെന്ന് നിതിൻ ഗഡ്കരി ചൂണ്ടിക്കാട്ടി. രാജ്യത്തെ ഈഥനോൾ മിശ്രിത പരിപാടിയും (Ethanol Blending Programme) ഇ20 നയവും നടപ്പിലാക്കുന്നതും മേൽനോട്ടം വഹിക്കുന്നതും കേന്ദ്ര പെട്രോളിയം സ്വാഭാവിക വാതക മന്ത്രാലയമാണ് (Ministry of Petroleum and Natural Gas). ഈ പദ്ധതിയുടെ നിയന്ത്രണം തനിക്കോ തന്റെ മന്ത്രാലയത്തിനോ അല്ലെന്നും അദ്ദേഹം വ്യക്തമാക്കി.

തന്റെയും കുടുംബത്തിന്റെയും പ്രതിച്ഛായയെ മോശമാക്കുക എന്ന ലക്ഷ്യത്തോടെയാണ് നിർമ്മിത ബുദ്ധി (AI) ഉപയോഗിച്ചുള്ള വ്യാജ ഡീപ് ഫേക്ക് വീഡിയോകളും തെറ്റായ സന്ദേശങ്ങളും ഉണ്ടാക്കി പ്രചരിപ്പിക്കുന്നതെന്നും ഹർജിയിൽ പറയുന്നു. ഇത്തരം വ്യാജ ഉള്ളടക്കങ്ങളും പോസ്റ്റുകളും റീലുകളും വീഡിയോകളും സമൂഹമാധ്യമങ്ങളിൽ നിന്ന് പൂർണ്ണമായി നീക്കം ചെയ്യണമെന്നും, ഇനിമുതൽ ഇത്തരം ഉള്ളടക്കങ്ങൾ പ്രചരിപ്പിക്കുന്നത് തടയുന്നതിനായി സ്ഥിരമായ വിലക്ക് (Permanent Injunction) ഏർപ്പെടുത്തണമെന്നും ഗഡ്കരി ആവശ്യപ്പെട്ടു.

ഇ20 ഇന്ധന നയവും വിവാദവും

കേന്ദ്ര സർക്കാർ നിർദ്ദേശപ്രകാരം രാജ്യത്തെ എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും പെട്രോളിൽ 20 ശതമാനം വരെ ഈഥനോൾ കലർത്തി വിൽക്കുന്നത് പ്രാബല്യത്തിൽ വന്നിട്ടുണ്ട്. വാഹന എൻജിനുകളുടെ സുഗമമായ പ്രവർത്തനത്തിനും തകരാറുകൾ ഒഴിവാക്കാനും മിനിമം 95 റിസർച്ച് ഒക്ടേൻ നമ്പർ (RON) ഉള്ള ഇന്ധനമാണ് വിതരണം ചെയ്യുന്നത്.

കരിമ്പ്, ചോളം, മറ്റ് ധാന്യങ്ങൾ എന്നിവയിൽ നിന്നാണ് ഈഥനോൾ വേർതിരിച്ചെടുക്കുന്നത്. ഇത് പരിസ്ഥിതി സൗഹൃദവും ആഭ്യന്തരമായി ഉൽപ്പാദിപ്പിക്കാൻ സാധിക്കുന്നതുമാണ്. എന്നാൽ, ഇതിന്റെ മറവിൽ മന്ത്രി വ്യക്തിഗത ലാഭമുണ്ടാക്കുന്നുവെന്ന രീതിയിലുള്ള അപവാദ പ്രചാരണങ്ങളാണ് ഇപ്പോൾ ബോംബെ ഹൈക്കോടതിയുടെ പരിഗണനയിലെത്തിയിരിക്കുന്നത്. ഹർജിയിൽ കോടതി തുടർനടപടികൾ സ്വീകരിച്ചു വരികയാണ്.

---------------

Hindusthan Samachar / Roshith K