Thiruvananthapuram, 28 ജൂലൈ (H.S.)

തിരുവനന്തപുരം: പിണറായി വിജയൻ സർക്കാരിന്റെ ഭരണകാലത്ത് സർക്കാരിന്മേൽ പാർട്ടിക്ക് കൃത്യമായ നിയന്ത്രണമോ മേൽനോട്ടമോ ഉണ്ടായിരുന്നില്ലെന്ന് തുറന്നുസമ്മതിച്ച് സിപിഐഎം കേന്ദ്ര കമ്മിറ്റിയുടെ തെരഞ്ഞെടുപ്പ് അവലോകന റിപ്പോർട്ട്. പാർട്ടി ഔദ്യോഗിക വെബ്സൈറ്റിൽ പ്രസിദ്ധീകരിച്ച റിപ്പോർട്ടിൽ സംസ്ഥാന നേതൃത്വത്തിന്റെ ശൈലിക്കെതിരെയും ഭരണപരമായ വീഴ്ചകൾക്കെതിരെയും രൂക്ഷവിമർശനമാണ് ഉയർന്നിട്ടുള്ളത്. നിയമസഭാ തെരഞ്ഞെടുപ്പ് പ്രചാരണം മുഖ്യമന്ത്രി പിണറായി വിജയനെ മാത്രം കേന്ദ്രീകരിച്ച് നടത്തിയത് പ്രതിപക്ഷത്തിന് വലിയ ആയുധമായെന്നും, ഇത് സംസ്ഥാനത്ത് ശക്തമായ ഭരണവിരുദ്ധ വികാരം രൂപപ്പെടുന്നതിലേക്ക് നയിച്ചെന്നും റിപ്പോർട്ടിൽ അടിവരയിടുന്നു.

സബ് കമ്മിറ്റികളുടെ അഭാവവും ഭരണപരമായ കടിഞ്ഞാൺ നഷ്ടപ്പെടലും

മുൻകാലങ്ങളിൽ പാർട്ടി ഭരണത്തിലിരുന്നപ്പോഴൊക്കെ സർക്കാരിന്റെ നയപരമായ തീരുമാനങ്ങളും പദ്ധതികളും നിരീക്ഷിക്കുന്നതിനും ആവശ്യമായ മാർഗനിർദേശങ്ങൾ നൽകുന്നതിനും സബ് കമ്മിറ്റികൾ സജീവമായിരുന്നു. എന്നാൽ കഴിഞ്ഞ സർക്കാരിന്റെ കാലയളവിൽ അത്തരം നിയന്ത്രണ സംവിധാനങ്ങൾ ഒന്നുംതന്നെ പ്രവർത്തിച്ചില്ല.

പാർട്ടിക്ക് സർക്കാരിന്മേൽ സ്വാധീനം നഷ്ടപ്പെട്ടത് അനാവശ്യ വിവാദങ്ങൾക്ക് വഴിതുറന്നു. പൊലീസിന്റെയും ബ്യൂറോക്രസിയുടെയും ഏകപക്ഷീയവും ആധിപത്യപരവുമായ സമീപനം പാർട്ടി പ്രവർത്തകരിലും പൊതുജനങ്ങളിലും കടുത്ത അമർഷമുണ്ടാക്കാനും ജനങ്ങളെ ഭരണത്തിൽ നിന്ന് അകറ്റാനും കാരണമായി.

കേന്ദ്ര കമ്മിറ്റി റിപ്പോർട്ടിലെ പ്രധാന കണ്ടെത്തൽ:

സർക്കാരിൽ പാർട്ടിയുടെ കടിഞ്ഞാൺ നഷ്ടപ്പെട്ടതും നേതാക്കളുടെ അഹങ്കാരവും ആഡംബര ജീവിതരീതികളും അഴിമതിയും പാർട്ടിയിലുള്ള ജനവിശ്വാസത്തിന് വലിയ മങ്ങലേൽപ്പിച്ചു. ചില നേതാക്കളുടെ ജാഗ്രതയില്ലാത്ത പരസ്യ പ്രതികരണങ്ങളും തിരിച്ചടിയുടെ വ്യാപ്തി കൂട്ടി.

പ്രധാന വിമർശനങ്ങളും നയപരമായ പാളിച്ചകളും

-

വ്യക്തികേന്ദ്രീകൃത പ്രചാരണം: പാർട്ടി രാഷ്ട്രീയം ചർച്ചയാക്കുന്നതിന് പകരം പിണറായി വിജയനെ മാത്രം മുൻനിർത്തി പ്രചാരണം നടത്തിയത് വിപരീതഫലം ചെയ്തു.

-

നേതാക്കളുടെ വീഴ്ചകളും പ്രതികരണങ്ങളും: ചില നേതാക്കളുടെ പൊതുവേദികളിലെ നിലപാടുകളും മാധ്യമങ്ങൾക്ക് മുന്നിലെ അനാവശ്യ പ്രതികരണങ്ങളും തിരിച്ചടിയായി.

-

മുന്നണി തർക്കങ്ങൾ: പിഎം ശ്രീ പദ്ധതി ഉൾപ്പെടെയുള്ള വിഷയങ്ങളിൽ ഘടകകക്ഷിയായ സിപിഐയുമായുള്ള അഭിപ്രായവ്യത്യാസങ്ങൾ യഥാസമയം പരിഹരിക്കുന്നതിൽ വീഴ്ച പറ്റി.

-

സ്ഥാനാർത്ഥി നിർണയം: ആവശ്യത്തിന് വനിതകൾക്കും യുവാക്കൾക്കും ന്യൂനപക്ഷ വിഭാഗങ്ങൾക്കും മുൻഗണന നൽകാൻ സ്ഥാനാർത്ഥി നിർണയത്തിൽ കഴിഞ്ഞില്ല.

സംസ്ഥാന സെക്രട്ടറിയേറ്റ് യോഗം ഇന്ന്

കേന്ദ്ര കമ്മിറ്റി റിപ്പോർട്ടിലെ കടുത്ത വിമർശനങ്ങളുടെയും കുറ്റസമ്മതങ്ങളുടെയും പശ്ചാത്തലത്തിൽ സിപിഐഎം സംസ്ഥാന സെക്രട്ടറിയേറ്റ് യോഗം ഇന്ന് തിരുവനന്തപുരത്ത് ചേരും. കേന്ദ്ര കമ്മിറ്റി ചൂണ്ടിക്കാണിച്ച പോരായ്മകളും അതിന്മേൽ എടുക്കേണ്ട തിരുത്തൽ നടപടികളും വരാനിരിക്കുന്ന സംസ്ഥാന സമിതി യോഗങ്ങളിലെ ചർച്ചകളും യോഗം വിലയിരുത്തും.

---------------

Hindusthan Samachar / Roshith K