Guwahati , 28 ജൂലൈ (H.S.)

അസമിലെ വിവിധ ജില്ലകളിൽ പ്രളയസാഹചര്യം അതീവ ഗുരുതരമായി തുടരുന്നതിനിടെ, സ്ഥിതിഗതികൾ നേരിടാൻ കേന്ദ്ര സർക്കാർ സംസ്ഥാന സർക്കാരുമായി ചേർന്ന് സജീവമായി പ്രവർത്തിച്ചുവരികയാണെന്ന് പ്രധാനമന്ത്രി നരേന്ദ്ര മോദി അറിയിച്ചു. അസമിൽ നിന്നുള്ള പാർലമെന്റ് അംഗങ്ങളുമായി നടത്തിയ കൂടിക്കാഴ്ചയിലാണ് പ്രധാനമന്ത്രി പ്രളയബാധിത പ്രദേശങ്ങളിലെ അവസ്ഥകൾ നേരിട്ട് വിലയിരുത്തിയത്. പ്രളയത്തിൽപ്പെട്ട ജനങ്ങളുടെ സുരക്ഷയ്ക്കും ക്ഷേമത്തിനുമായി പ്രാർത്ഥിക്കുന്നതായി വ്യക്തമാക്കിയ അദ്ദേഹം, ദുരിതബാധിതർക്ക് ആവശ്യമായ എല്ലാ അടിയന്തര സഹായങ്ങളും ഉറപ്പാക്കുമെന്നും വ്യക്തമാക്കി.

നിലവിൽ സംസ്ഥാനത്തെ പ്രളയ സ്ഥിതിഗതികൾ ഏറെ സങ്കീർണ്ണമായി തുടരുകയാണ്. പ്രത്യേകിച്ചും ശിവസാഗർ, ചരായ്ദേവ് എന്നീ ജില്ലകളിലാണ് വെള്ളപ്പൊക്കം ഏറ്റവും കൂടുതൽ നാശം വിതച്ചിരിക്കുന്നത്. ഈ പ്രദേശങ്ങളിലെ നാഉജാൻ ഉൾപ്പെടെയുള്ള ഗ്രാമങ്ങളിൽ വീടുകളിലും പ്രധാന റോഡുകളിലും വെള്ളം കയറിയതിനെ തുടർന്ന് നൂറുകണക്കിന് കുടുംബങ്ങളാണ് ഭക്ഷണമോ സുരക്ഷിതമായ പാർപ്പിടമോ ഇല്ലാതെ വലയുന്നത്. പ്രളയജലത്തിലൂടെ വച്ചടിച്ച് നടന്നു നീങ്ങിയാണ് പല ഗ്രാമവാസികളും അവശ്യസാധനങ്ങളും കുടിവെള്ളവും ശേഖരിക്കുന്നത്.

അസം സംസ്ഥാന ദുരന്തനിവാരണ അതോറിറ്റിയുടെ ഏറ്റവും പുതിയ കണക്കുകൾ പ്രകാരം ആറിലധികം ജില്ലകളിലായി 4.45 ലക്ഷത്തിലധികം ആളുകളെയാണ് പ്രളയം നേരിട്ട് ബാധിച്ചിരിക്കുന്നത്. 631 ഓളം ഗ്രാമങ്ങൾ പൂർണ്ണമായോ ഭാഗികമായോ വെള്ളത്തിനടിയിലായിട്ടുണ്ട്. ദുരിതബാധിതർക്കായി 184 ദുരിതാശ്വാസ ക്യാമ്പുകളും സാധന വിതരണ കേന്ദ്രങ്ങളും നിലവിൽ സജ്ജമാക്കിയിട്ടുണ്ട്. ഈ ക്യാമ്പുകളിലായി ഇരുപത്തെണ്ണായിരത്തി എഴുന്നൂറിലധികം ആളുകളാണ് നിലവിൽ അഭയം പ്രാപിച്ചിരിക്കുന്നത്.

ഇതുവരെ പ്രളയവുമായി ബന്ധപ്പെട്ട് ആളപായമൊന്നും റിപ്പോർട്ട് ചെയ്തിട്ടില്ല എന്നത് ആശ്വാസകരമാണെങ്കിലും ജനവാസ മേഖലകളിലും കൃഷിയിടങ്ങളിലും കനത്ത നാശനഷ്ടമാണ് ഉണ്ടായിട്ടുള്ളത്. വ്യാപകമായി വീടുകൾ തകരുകയും റോഡുകളും പാലങ്ങളും തകരുകയും ചെയ്തിട്ടുണ്ട്. കൂടാതെ നിരവധി സ്കൂളുകൾക്കും പൊതുസ്വത്തുക്കൾക്കും നാശനഷ്ടങ്ങൾ സംഭവിക്കുകയും നൂറുകണക്കിന് വളർത്തുമൃഗങ്ങൾ പ്രളയത്തിൽ അകപ്പെടുകയും ചെയ്തിട്ടുണ്ട്.

പ്രദേശങ്ങളിൽ ദുരിതാശ്വാസ വിതരണം ശക്തമായി നടക്കുന്നുണ്ടെങ്കിലും പല വിദൂര ഗ്രാമങ്ങളിലും ശുദ്ധമായ കുടിവെള്ളത്തിന്റെ ദൗർലഭ്യം വലിയ വെല്ലുവിളിയായി തുടരുന്നുണ്ട്. ദുരന്തബാധിത മേഖലകൾ സന്ദർശിച്ച ജനപ്രതിനിധികളും സാമൂഹിക പ്രവർത്തകരും അടിയന്തരമായി കുടിവെള്ളവും മരുന്നുകളും എത്തിക്കണമെന്ന് ആവശ്യപ്പെട്ടിട്ടുണ്ട്. പ്രളയബാധിതർക്ക് സഹായമെത്തിക്കാൻ വിവിധ സംഘടനകളുടെ സന്നദ്ധ പ്രവർത്തകരും സജീവമായി രംഗത്തുണ്ട്.

കേന്ദ്ര സംസ്ഥാന സർക്കാരുകളുടെയും ദുരന്തനിവാരണ സേനയുടെയും (NDRF) മേൽനോട്ടത്തിൽ രക്ഷാപ്രവർത്തനങ്ങൾ ത്വരിതഗതിയിൽ പുരോഗമിക്കുകയാണ്. വരുന്ന ദിവസങ്ങളിലും സംസ്ഥാനത്തെ നദികളിൽ ജലനിരപ്പ് ഉയർന്ന നിലയിൽ തുടരാൻ സാധ്യതയുള്ളതിനാൽ ജാഗ്രത പാലിക്കാനും ആവശ്യമായ മുൻകരുതലുകൾ സ്വീകരിക്കാനും പ്രാദേശിക ഭരണകൂടങ്ങൾക്ക് നിർദ്ദേശം നൽകിയിട്ടുണ്ട്.

---------------

Hindusthan Samachar / Roshith K