Newdelhi , 28 ജൂലൈ (H.S.)

ചോദ്യപേപ്പർ ചോർച്ച തടയുന്നതിനുള്ള പൊതുപരീക്ഷാ (അനഭിലഷണീയ മാർഗ്ഗങ്ങൾ തടയൽ) ഭേദഗതി ബിൽ 2026 ലോകസഭ പരിഗണിച്ചു. രാജ്യത്തെ കോടിക്കണക്കിന് വരുന്ന ഉദ്യോഗാർത്ഥികളുടെയും വിദ്യാർത്ഥികളുടെയും ഭാവി സുരക്ഷിതമാക്കുന്നതിനായി അവതരിപ്പിച്ച ബില്ലിന്മേൽ ആവശ്യമെങ്കിൽ 10 മണിക്കൂർ വരെ നീളുന്ന വിശദമായ ചർച്ചയ്ക്ക് സർക്കാർ തയ്യാറാണെന്ന് പാർലമെന്ററി കാര്യ മന്ത്രി കിരൺ റിജിജു സഭയെ അറിയിച്ചു.

തുടക്കത്തിൽ ആറ് മണിക്കൂർ ചർച്ചയ്ക്കാണ് സമയം അനുവദിച്ചിരുന്നതെങ്കിലും പ്രതിപക്ഷ കക്ഷികളായ കോൺഗ്രസ്, സമാജ്വാദി പാർട്ടി, ഡി.എം.കെ, എൻ.സി.പി തുടങ്ങിയ കക്ഷികളുടെ ചീഫ് വിപ്പുമാരുമായി സംസാരിച്ച ശേഷം സമയം എട്ട് മണിക്കൂറായി ഉയർത്താൻ ധാരണയാവുകയായിരുന്നു. എന്നാൽ സഭയിലെ അംഗങ്ങൾക്ക് കൂടുതൽ കാര്യങ്ങൾ പങ്കുവെക്കാനുണ്ടെങ്കിൽ സമയം വീണ്ടും നീട്ടി നൽകുന്നതിൽ സർക്കാരിന് യാതൊരു എതിർപ്പുമില്ലെന്നും 10 മണിക്കൂർ വരെ ചർച്ച നടത്താൻ തയ്യാറാണെന്നും കേന്ദ്രമന്ത്രി സഭയിൽ വ്യക്തമാക്കി.

പൊതുപരീക്ഷകളിലെ അട്ടിമറികളും ക്രമക്കേടുകളും തടയുന്നതിനായി കൊണ്ടുവന്ന ചരിത്രപരമായ ഈ നിയമനിർമ്മാണം രാജ്യത്തെ യുവജനങ്ങളുടെ ക്ഷേമത്തോടുള്ള സർക്കാരിന്റെ പ്രതിബദ്ധത വ്യക്തമാക്കുന്നതാണെന്ന് കേന്ദ്ര സഹമന്ത്രി ജിതേന്ദ്ര സിംഗ് ലോകസഭയിൽ ചർച്ചയ്ക്ക് തുടക്കം കുറിച്ചുകൊണ്ട് പറഞ്ഞു. പരീക്ഷാ സമ്പ്രദായത്തിന്റെ വിശ്വാസ്യതയും സുതാര്യതയും വർദ്ധിപ്പിക്കാനും, ആത്മാർത്ഥമായി അധ്വാനിക്കുന്ന വിദ്യാർത്ഥികൾക്ക് അർഹമായ ഫലം ഉറപ്പാക്കാനും ഈ ഭേദഗതി നിയമം സഹായിക്കും. വിവിധ സംസ്ഥാനങ്ങളിലും വിവിധ ഭരണകാലഘട്ടങ്ങളിലും ചോദ്യപേപ്പർ ചോർച്ചയും പരീക്ഷാ തട്ടിപ്പുകളും റിപ്പോർട്ട് ചെയ്യപ്പെട്ടിട്ടുള്ള പശ്ചാത്തലത്തിലാണ് കൂടുതൽ കർശനമായ നിയമത്തിന്റെ ആവശ്യകത ഉയർന്നുവന്നതെന്നും അദ്ദേഹം കൂട്ടിച്ചേർത്തു.

സ്വതന്ത്ര ഇന്ത്യയുടെ ചരിത്രത്തിൽ ആദ്യമായി പൊതുപരീക്ഷകളിലെ അനാചാരങ്ങൾ തടയാനായി ഒരു പ്രത്യേക നിയമനിർമ്മാണം നടത്തിയത് കേന്ദ്ര സർക്കാരാണെന്ന് മന്ത്രി അവകാശപ്പെട്ടു. 2024 ജനുവരിയിൽ അവതരിപ്പിക്കപ്പെടുകയും ജൂണിൽ നിലവിൽ വരികയും ചെയ്ത നിയമത്തിന്റെ അനുഭവസമ്പത്തിൽ നിന്നാണ് കൂടുതൽ കാര്യക്ഷമവും കർശനവുമായ വ്യവസ്ഥകൾ ഉൾപ്പെടുത്തി പുതിയ ഭേദഗതി തയ്യാറാക്കിയിരിക്കുന്നത്. കുറ്റകൃത്യങ്ങളിൽ പങ്കാളികളാകുന്നവർക്ക് കഠിനമായ ശിക്ഷ ഉറപ്പാക്കുന്നതിനൊപ്പം, ഇവ ജാമ്യമില്ലാത്തതും ഗുരുതരവുമായ കുറ്റകൃത്യങ്ങളായി പരിഗണിക്കാനും പുതിയ ഭേദഗതിയിൽ വ്യവസ്ഥയുണ്ട്.

പരീക്ഷാ ക്രമക്കേടുകൾ തടയുന്നതിലൂടെ രാജ്യത്തെ ചെറുപ്പക്കാരുടെ പ്രതീക്ഷകൾ കാത്തുസൂക്ഷിക്കാനാണ് സർക്കാർ ലക്ഷ്യമിടുന്നത്. 2017-ൽ നാഷണൽ ടെസ്റ്റിംഗ് ഏജൻസി (എൻ.ടി.എ) രൂപീകരിച്ചതുൾപ്പെടെയുള്ള നടപടികൾ രാജ്യത്ത് ഏകീകൃതവും സുതാര്യവുമായ പരീക്ഷാ സംവിധാനം നിർമ്മിക്കുന്നതിന്റെ ഭാഗമായിരുന്നു. നീതിപൂർവ്വമായ പരീക്ഷാ നടത്തിപ്പിലൂടെ ഭാവി തലമുറയുടെ ആത്മവിശ്വാസം വീണ്ടെടുക്കാനാണ് ഈ പുതിയ ഭേദഗതിയിലൂടെ ശ്രമിക്കുന്നതെന്നും സർക്കാരിന്റെ ഭാഗത്തുനിന്നുള്ള വിശദീകരണത്തിൽ വ്യക്തമാക്കി.

---------------

Hindusthan Samachar / Roshith K