Thiruvananthapuram, 29 ജൂലൈ (H.S.)

സംസ്ഥാനത്തെ ബാറുകളിൽ പലതും നിശ്ചിത സമയക്രമം പാലിക്കാതെ പുലർച്ചെ തന്നെ തുറന്നുപ്രവർത്തിക്കുന്നുവെന്ന എക്സൈസ് മന്ത്രി എം. ലിജുവിന്റെ കടുത്ത വിമർശനത്തിന് പിന്നാലെ ഉദ്യോഗസ്ഥർക്ക് കർശന മാർഗ്ഗനിർദേശങ്ങളുമായി എക്സൈസ് കമ്മിഷണർ സാംബശിവ റാവു. രാവിലെ പത്തുമണി മുതൽ രാത്രി പന്ത്രണ്ട് മണിവരെ എന്ന ഔദ്യോഗിക പ്രവർത്തന സമയക്രമം പാലിക്കാത്ത ബാറുകളുടെ ലൈസൻസ് ഉടൻ സസ്പെൻഡ് ചെയ്യാനും ലൈസൻസിക്കെതിരെ കർശന നടപടികൾ സ്വീകരിക്കാനും എക്സൈസ് ഡപ്യൂട്ടി കമ്മിഷണർമാർക്ക് കമ്മിഷണർ നിർദേശം നൽകി.

നിയമപ്രകാരം ബാറുകൾ പ്രവർത്തിക്കാൻ അനുമതിയുള്ള സമയ പരിധി കൃത്യമായി പാലിക്കപ്പെടുന്നുണ്ടെന്ന് ഉറപ്പുവരുത്താൻ എക്സൈസ് വകുപ്പ് നടപടികൾ ഊർജ്ജിതമാക്കിയിരിക്കുകയാണ്. ഇതിനായി സർക്കുലർ മുഖേന പ്രത്യേക ഉത്തരവുകൾ ജില്ലാ ഓഫീസർമാർക്ക് കൈമാറി.

ഡെപ്യൂട്ടി കമ്മിഷണർമാർ നേരിട്ട് പരിശോധിക്കണം

ബാറുകളുടെ പ്രവർത്തന സമയക്രമം കൃത്യമാണോ എന്ന് പരിശോധിക്കുന്നതിൽ റേഞ്ച് ഓഫിസർമാർക്ക് മാത്രമല്ല, എക്സൈസ് ഡെപ്യൂട്ടി കമ്മിഷണർമാർക്കും നേരിട്ട് ഉത്തരവാദിത്തമുണ്ടെന്ന് എക്സൈസ് കമ്മിഷണർ വ്യക്തമാക്കി. താഴെത്തട്ടിലുള്ള ഉദ്യോഗസ്ഥരുടെ റിപ്പോർട്ടുകളെ മാത്രം ആശ്രയിക്കാതെ, ഡെപ്യൂട്ടി കമ്മിഷണർമാർ തന്നെ നേരിട്ട് ഇടവേളകളിൽ ബാറുകൾ തുറക്കുന്നതിന്റെയും അടയ്ക്കുന്നതിന്റെയും സമയക്രമം പരിശോധിക്കണം.

തങ്ങൾക്ക് ലഭിച്ചിട്ടുള്ള ഔദ്യോഗിക അധികാരം ഉപയോഗിച്ച് നിയമലംഘനങ്ങൾ തടയാൻ മടിക്കുകയും കർത്തവ്യത്തിൽ വീഴ്ച വരുത്തുകയും ചെയ്യുന്ന ജില്ലാ ഓഫിസർമാർക്കെതിരെ ദയയില്ലാത്ത നടപടിയുണ്ടാകുമെന്നും കമ്മിഷണറുടെ നിർദേശത്തിലുണ്ട്. ഉദ്യോഗസ്ഥരുടെ ഭാഗത്തുനിന്നുള്ള അനാസ്ഥയോ ക്രമക്കേടുകൾ കണ്ടില്ലെന്ന് നടിക്കുന്ന നിലപാടോ യാതൊരു കാരണവശാലും വെച്ചുപൊറുപ്പിക്കില്ല.

കൂടുതൽ പരാതികൾ ഈ മൂന്ന് ജില്ലകളിൽ

സംസ്ഥാനത്ത് ബാറുകൾ അനധികൃതമായി സമയ പരിധി ലംഘിച്ച് പ്രവർത്തിക്കുന്നതിനെക്കുറിച്ച് കോട്ടയം, തൃശൂർ, പാലക്കാട് ജില്ലകളിൽ നിന്നാണ് കൂടുതൽ പരാതികൾ ലഭിച്ചിട്ടുള്ളതെന്ന് എക്സൈസ് കമ്മിഷണർ സർക്കുലറിൽ ചൂണ്ടിക്കാട്ടുന്നു. ഈ ജില്ലകളിൽ പ്രത്യേക നിരീക്ഷണവും മിന്നൽ പരിശോധനകളും നടത്താൻ ഉദ്യോഗസ്ഥർക്ക് നിർദേശം നൽകിയിട്ടുണ്ട്.

കഴിഞ്ഞ ദിവസം ബാറുകൾ സമയപരിധി പാലിക്കാതെ പുലർച്ചെ തന്നെ തുറന്നുപ്രവർത്തിക്കുന്നതിനെതിരെ എക്സൈസ് മന്ത്രി എം. ലിജു കടുത്ത വിമർശനം ഉന്നയിച്ചിരുന്നു. ഇതിന് പിന്നാലെയാണ് വകുപ്പുതലത്തിൽ അടിയന്തരമായി തിരുത്തൽ നടപടികൾക്ക് എക്സൈസ് കമ്മിഷണർ റാവു തുടക്കമിട്ടത്. വരുംദിവസങ്ങളിൽ സംസ്ഥാനത്തുടനീളമുള്ള ബാറുകളിൽ എക്സൈസ് സ്പെഷ്യൽ സ്ക്വാഡുകളുടെ നേതൃത്വത്തിൽ കടുത്ത പരിശോധനകൾ ഉണ്ടാകുമെന്നാണ് സൂചന.

---------------

Hindusthan Samachar / Roshith K