Chennai, 03 ജൂലൈ (H.S.)

ചെന്നൈ: തമിഴ്നാട് മുഖ്യമന്ത്രി സി. ജോസഫ് വിജയിക്കെതിരെ അപകീർത്തികരമായ പരാമർശം നടത്തിയെന്ന കേസിൽ ഡിഎംകെ നേതാവും മുൻ മന്ത്രിയുമായ അനിത ആർ രാധാകൃഷ്ണൻ എംഎൽഎയെ പോലീസ് അറസ്റ്റ് ചെയ്തു. മദ്രാസ് ഹൈക്കോടതി മുൻകൂർ ജാമ്യാപേക്ഷ തള്ളിയതിന് തൊട്ടുപിന്നാലെയായിരുന്നു നാടകീയമായ ഈ അറസ്റ്റ്. അറസ്റ്റിനെ തുടർന്ന് തൂത്തുക്കുടിയിൽ ഡിഎംകെ പ്രവർത്തകർ ശക്തമായ പ്രതിഷേധവുമായി രംഗത്തെത്തിയതോടെ സംസ്ഥാനത്ത് വൻ രാഷ്ട്രീയ വിവാദത്തിന് വഴിതുറന്നിരിക്കുകയാണ്.

കേസിന് ആസ്പദമായ സംഭവം

കഴിഞ്ഞ ജൂൺ 20-ന് തൂത്തുക്കുടി ജില്ലയിലെ ആത്തൂരിൽ നടന്ന ഡിഎംകെ പൊതുയോഗത്തിനിടെ മുഖ്യമന്ത്രി വിജയിക്കെതിരെ അനിത രാധാകൃഷ്ണൻ അപകീർത്തികരവും വ്യക്തിഹത്യ നടത്തുന്നതുമായ പരാമർശങ്ങൾ നടത്തി എന്നാണ് കേസ്. ഈ പ്രസംഗത്തിനെതിരെ പോലീസിന് ലഭിച്ച പരാതികളുടെ അടിസ്ഥാനത്തിലാണ് അപകീർത്തിപ്പെടുത്തൽ, ജനങ്ങൾക്കിടയിൽ സംഘർഷം ഉണ്ടാക്കാൻ ശ്രമിക്കൽ തുടങ്ങിയ വകുപ്പുകൾ ചുമത്തി മുൻ മന്ത്രിക്കെതിരെ കേസെടുത്തത്.

തുടർന്ന് അദ്ദേഹം സമർപ്പിച്ച മുൻകൂർ ജാമ്യാപേക്ഷ പരിഗണിച്ച മദ്രാസ് ഹൈക്കോടതി ജസ്റ്റിസ് ജി.കെ ഇളന്തിരയ്യൻ അത് തള്ളുകയായിരുന്നു. ജാമ്യാപേക്ഷ നിരസിച്ചുകൊണ്ട്, 1967 മുതൽ തമിഴ്നാട് ഭരിക്കുന്നത് സിനിമാ രംഗത്ത് നിന്നുള്ള നേതാക്കളാണെന്ന കാര്യം കോടതി നിരീക്ഷിച്ചു. പൊതുയോഗത്തിൽ രാധാകൃഷ്ണൻ നടത്തിയ പ്രസംഗത്തിന്റെ സ്വഭാവത്തെ കോടതി കടുത്ത ഭാഷയിൽ ചോദ്യം ചെയ്യുകയും ചെയ്തു. ഇതോടെയാണ് പോലീസിന് അറസ്റ്റിലേക്ക് നീങ്ങാനുള്ള നിയമപരമായ വഴി തെളിഞ്ഞത്.

മണ്ഡല സന്ദർശനത്തിനിടെ നാടകീയ അറസ്റ്റ്

തന്റെ നിയോജക മണ്ഡലമായ തിരുച്ചെന്തൂരിന് കീഴിലുള്ള ആത്തൂർ ടൗൺ പഞ്ചായത്തിലെ വികസന പ്രവർത്തനങ്ങൾ വിലയിരുത്താൻ എത്തിയതായിരുന്നു അനിത രാധാകൃഷ്ണൻ. പുതിയ ഓഫീസ് കെട്ടിടത്തിന്റെ നിർമ്മാണം അടക്കമുള്ള കാര്യങ്ങൾ പരിശോധിച്ച് അദ്ദേഹം പുറത്തിറങ്ങിയ ഉടൻ പോലീസ് സംഘം അദ്ദേഹത്തെ തടഞ്ഞു. വാഹനത്തിൽ നിന്നും പുറത്തിറക്കിയ ശേഷം കസ്റ്റഡിയിലെടുക്കുകയായിരുന്നു. തുടർന്ന് കൂടുതൽ ചോദ്യം ചെയ്യലിനായി അദ്ദേഹത്തെ തൂത്തുക്കുടി ജില്ലാ പോലീസ് സൂപ്രണ്ടിന്റെ (എസ്പി) ഓഫീസിലേക്ക് മാറ്റി.

പ്രതിഷേധവുമായി ഡിഎംകെ പ്രവർത്തകർ

അറസ്റ്റ് വിവരം അറിഞ്ഞതോടെ ആത്തൂരിൽ തടിച്ചുകൂടിയ ഡിഎംകെ പ്രവർത്തകർ പോലീസിനെതിരെയും സർക്കാരിനെതിരെയും ശക്തമായ മുദ്രാവാക്യം വിളികളുമായി രംഗത്തെത്തി. പ്രവർത്തകർ റോഡ് ഉപരോധിച്ചതോടെ പ്രദേശത്ത് ഗതാഗതം പൂർണ്ണമായും തടസ്സപ്പെട്ടു. തുടർന്ന് കൂടുതൽ പോലീസിനെ വിന്യസിച്ചാണ് സ്ഥിതിഗതികൾ ശാന്തമാക്കിയത്. പ്രതിപക്ഷത്തെ മനഃപൂർവ്വം ലക്ഷ്യമിട്ടുള്ള നീക്കമാണ് സർക്കാരിന്റേതെന്ന് ഡിഎംകെ ആരോപിച്ചു.

രാഷ്ട്രീയ പകപോക്കലെന്ന് കനിമൊഴി

അറസ്റ്റിനെ കടുത്ത ഭാഷയിൽ അപലപിച്ച് ഡിഎംകെ എംപി കനിമൊഴി രംഗത്തെത്തി. പ്രതിപക്ഷത്തെ അടിച്ചമർത്താൻ സർക്കാർ പോലീസിനെ ദുരുപയോഗം ചെയ്യുകയാണെന്ന് അവർ കുറ്റപ്പെടുത്തി.

തൂത്തുക്കുടി സൗത്ത് ഡിസ്ട്രിക്റ്റ് സെക്രട്ടറിയും മുൻ മന്ത്രിയുമായ തിരു. അനിത രാധാകൃഷ്ണനെ ഈ ഏകാധിപത്യ സർക്കാർ അറസ്റ്റ് ചെയ്തതിനെ ശക്തമായി അപലപിക്കുന്നു. തന്റെ മണ്ഡലത്തിലെ വികസന പ്രവർത്തനങ്ങൾ വിലയിരുത്തുന്നതിനിടയിലാണ് പ്രതിപക്ഷ എംഎൽഎയെ തികച്ചും അരാജകത്വപരമായ രീതിയിൽ അറസ്റ്റ് ചെയ്തത്. ഇത്തരം അടിച്ചമർത്തൽ തന്ത്രങ്ങൾക്ക് മുന്നിൽ ഡിഎംകെ ഒരിക്കലും തലകുനിക്കില്ല, കനിമൊഴി വ്യക്തമാക്കി.

കോടതി ജാമ്യം നിഷേധിച്ചതും തൊട്ടുപിന്നാലെയുള്ള അറസ്റ്റും തമിഴ്നാട് രാഷ്ട്രീയത്തിൽ വരും ദിവസങ്ങളിലും വലിയ ചർച്ചകൾക്ക് വഴിവെക്കുമെന്നുറപ്പാണ്. ഡിഎംകെയും മുഖ്യമന്ത്രി വിജയിന്റെ നേതൃത്വത്തിലുള്ള ഭരണപക്ഷവും തമ്മിലുള്ള രാഷ്ട്രീയ പോര് ഇതോടെ പുതിയ തലത്തിലേക്ക് നീങ്ങിയിരിക്കുകയാണ്.

---------------

Hindusthan Samachar / Roshith K