Wayanad, 03 ജൂലൈ (H.S.)

വയനാട്: അമ്പലവയലിൽ ആളില്ലാത്ത സമയത്ത് വീട് ജപ്തി ചെയ്തെന്ന തരത്തിൽ പ്രചരിക്കുന്ന വാർത്തകൾ പൂർണ്ണമായും തെറ്റാണെന്ന് വ്യക്തമാക്കി കനറ ബാങ്ക് അധികൃതർ രംഗത്ത്. വായ്പക്കാരന്റെ പൂർണ്ണ സമ്മതത്തോടെയും മുൻകൂട്ടി നിശ്ചയിച്ച പ്രകാരവുമാണ് ജപ്തി നടപടികൾ പൂർത്തിയാക്കിയതെന്ന് കനറ ബാങ്ക് കോഴിക്കോട് സർക്കിൾ ഓഫീസ് അസിസ്റ്റന്റ് ജനറൽ മാനേജർ അറിയിച്ചു. അധ്യാപകനായ സുരേഷ് ബാബുവിന്റെ വീട് ജപ്തി ചെയ്തതുമായി ബന്ധപ്പെട്ട് ഉയർന്ന വിവാദങ്ങൾക്കാണ് ബാങ്ക് ഇപ്പോൾ ഔദ്യോഗിക വിശദീകരണവുമായി വ്യക്തത വരുത്തിയിരിക്കുന്നത്.

ബാങ്ക് അധികൃതർ നൽകുന്ന വിവരങ്ങൾ പ്രകാരം, 2022-ലാണ് ആണ്ടൂർ സ്വദേശിയും അധ്യാപകനുമായ സുരേഷ് ബാബു കനറാ ബാങ്കിന്റെ സുൽത്താൻ ബത്തേരി ശാഖയിൽ നിന്നും 29 ലക്ഷം രൂപ വായ്പയായി കൈപ്പറ്റിയത്. എന്നാൽ, വായ്പയെടുത്ത് തൊട്ടടുത്ത വർഷം മുതൽ തന്നെ ഇതിന്റെ പ്രതിമാസ അടവുകൾ മുടങ്ങാൻ തുടങ്ങി. വായ്പ കുടിശ്ശികയായതിനെ തുടർന്ന് ബാങ്ക് അധികൃതർ പലതവണ സുരേഷ് ബാബുവിന് മുന്നറിയിപ്പുകൾ നൽകുകയും തുക തിരിച്ചടയ്ക്കാൻ ആവശ്യപ്പെടുകയും ചെയ്തിരുന്നു. എന്നാൽ നിരന്തരമായ ഓർമ്മപ്പെടുത്തലുകൾ ഉണ്ടായിട്ടും വായ്പ തിരിച്ചടയ്ക്കാൻ വായ്പക്കാരൻ തയ്യാറാകാത്തതിനെ തുടർന്നാണ് ബാങ്ക് ഒടുവിൽ നിയമപരമായ ജപ്തി നടപടികളിലേക്ക് കടക്കാൻ നിർബന്ധിതരായത്.

പെട്ടെന്നൊരു ദിവസം വന്ന് വീട് പൂട്ടി സീൽ ചെയ്യുകയായിരുന്നില്ല ബാങ്ക് ചെയ്തതെന്നും, ഇതിന് മുൻപ് നാല് തവണ ജപ്തി നടപടികൾക്കായി ബാങ്ക് ഉദ്യോഗസ്ഥർ എത്തിയെങ്കിലും മാനുഷിക പരിഗണനകൾ മുൻനിർത്തി തിരിച്ചുപോവുകയായിരുന്നു എന്നും കനറ ബാങ്ക് വ്യക്തമാക്കുന്നു. ഏറ്റവും ഒടുവിൽ, തന്റെ മകന്റെ നീറ്റ് (NEET) പരീക്ഷയുള്ളതിനാൽ അതുവരെ ജപ്തി നടപടികൾ നീട്ടിനൽകണമെന്ന് സുരേഷ് ബാബു ബാങ്കിനോട് രേഖാമൂലം ആവശ്യപ്പെട്ടിരുന്നു. മകന്റെ പരീക്ഷ കഴിഞ്ഞാൽ എപ്പോൾ വേണമെങ്കിലും ജപ്തി നടപടികളുമായി ബാങ്കിന് മുന്നോട്ട് പോകാമെന്ന് ഇയാൾ ഒപ്പിട്ടു നൽകിയ കത്തിൽ വ്യക്തമാക്കിയിരുന്നതായും ബാങ്ക് അധികൃതർ വെളിപ്പെടുത്തി.

ഇത്തരത്തിൽ വായ്പക്കാരൻ തന്നെ എഴുതി നൽകിയ ഉറപ്പിന്റെ അടിസ്ഥാനത്തിലാണ് പരീക്ഷയ്ക്ക് ശേഷം ബാങ്ക് ഉദ്യോഗസ്ഥർ ജപ്തിക്കായി എത്തിയത്. നടപടികൾ നടക്കുന്ന സമയത്ത് സ്ഥലത്ത് സന്നിഹിതനാകാൻ സുരേഷ് ബാബുവിനോട് ബാങ്ക് ആവശ്യപ്പെട്ടിരുന്നെങ്കിലും അദ്ദേഹം അത് നിരസിക്കുകയായിരുന്നു. ജപ്തി നടക്കുമ്പോൾ താൻ സ്ഥലത്തുണ്ടാകില്ലെന്ന് ഇയാൾ ബാങ്കിനെ അറിയിച്ചിരുന്നു. ഇതിനെല്ലാം കൃത്യമായ തെളിവുകൾ തങ്ങളുടെ പക്കലുണ്ടെന്ന് ബാങ്ക് അധികൃതർ അവകാശപ്പെടുന്നു. ആളില്ലാത്ത സമയം നോക്കി ബാങ്ക് വഞ്ചനാപരമായി വീട് കൈയടക്കി എന്ന രീതിയിൽ സോഷ്യൽ മീഡിയയിലും മറ്റ് മാധ്യമങ്ങളിലും വരുന്ന വാർത്തകൾ വസ്തുതാവിരുദ്ധമാണെന്നും ബാങ്കിന്റെ പ്രതിച്ഛായ തകർക്കാൻ ലക്ഷ്യം വെച്ചുള്ളതാണെന്നും കനറ ബാങ്ക് കോഴിക്കോട് സർക്കിൾ ഓഫീസ് വ്യക്തമാക്കുന്നു.

---------------

Hindusthan Samachar / Roshith K