Perumbavoor , 03 ജൂലൈ (H.S.)

പെരുമ്പാവൂർ: എറണാകുളം ജില്ലയിലെ പ്രമുഖ വ്യവസായ കേന്ദ്രമായ പെരുമ്പാവൂരിനെ ലഹരിമുക്തമാക്കുക എന്ന ലക്ഷ്യത്തോടെ സംസ്ഥാന ആഭ്യന്തര വകുപ്പിന്റെ നേതൃത്വത്തിൽ വിപുലമായ ജനകീയ പ്രതിരോധ പരിപാടികൾക്ക് തുടക്കമായി. ഇതിന്റെ ഭാഗമായി പെരുമ്പാവൂരിൽ 'തൂഫാൻ ജാഗരൺ' എന്ന പേരിൽ വൻ ലഹരിവിരുദ്ധ ബഹുജന റാലി സംഘടിപ്പിച്ചു. സംസ്ഥാനവ്യാപകമായി നടന്നുവരുന്ന ‘ഓപ്പറേഷൻ തൂഫാൻ: ദി നാർക്കോ ഹണ്ട്’ മയക്കുമരുന്ന് വിരുദ്ധ ഡ്രൈവിന്റെ ഭാഗമായാണ് ഈ ജനകീയ മുന്നേറ്റം.

പെരുമ്പാവൂർ ബോയ്സ് ഹൈസ്കൂൾ പരിസരത്തുനിന്നാണ് റാലി ആരംഭിച്ചത്. ആഭ്യന്തരമന്ത്രി രമേശ് ചെന്നിത്തല, സംസ്ഥാന പോലീസ് മേധാവി (DGP) റവാഡ എ. ചന്ദ്രശേഖർ എന്നിവർ റാലിയുടെ മുൻനിരയിൽ അണിനിരന്നു. പ്രതികൂല കാലാവസ്ഥയെയും കനത്ത മഴയെയും അവഗണിച്ച് പൊതുജനങ്ങൾ, വിദ്യാർത്ഥികൾ, സാംസ്കാരിക പ്രവർത്തകർ, വിവിധ രാഷ്ട്രീയ കക്ഷി നേതാക്കൾ എന്നിവരുൾപ്പെടെ ആയിരക്കണക്കിന് ആളുകളാണ് റാലിയിൽ പങ്കാളികളായത്. പെരുമ്പാവൂരിനെ ലഹരിയുടെ പിടിയിൽ നിന്ന് മോചിപ്പിക്കുമെന്ന ദൃഢപ്രഖ്യാപനവുമായി നീങ്ങിയ റാലി നഗരത്തെ ജനസാഗരമാക്കി മാറ്റി.

ലഹരി മാഫിയക്കെതിരെ കർശന നടപടി: ആഭ്യന്തരമന്ത്രി

റാലിയ്ക്ക് ശേഷം നടന്ന വിപുലമായ പൊതുസമ്മേളനവും ജനസഭയും ആഭ്യന്തരമന്ത്രി രമേശ് ചെന്നിത്തല ഉദ്ഘാടനം ചെയ്തു. കേരളം ഭരിക്കുന്നത് ഗുണ്ടകളോ ലഹരി മാഫിയകളോ അല്ലെന്നും ശക്തമായ സർക്കാരാണെന്നും അദ്ദേഹം ഉദ്ഘാടന പ്രസംഗത്തിൽ വ്യക്തമാക്കി. ജനവിധി മാഫിയകൾക്ക് തകർക്കാൻ നൽകില്ലെന്ന് പ്രഖ്യാപിച്ച മന്ത്രി, മയക്കുമരുന്ന് കടത്ത് തടയുന്നതിനായി കാരവനുകളിൽ ഉൾപ്പെടെ വരും ദിവസങ്ങളിൽ കർശന പരിശോധന നടത്തുമെന്നും അറിയിച്ചു.

പെരുമ്പാവൂരിലെ ലഹരി ശൃംഖല പൂർണ്ണമായും പിഴുതെറിയാൻ പ്രത്യേക ടാസ്ക് ഫോഴ്സ് രൂപീകരിക്കുമെന്നും ആഭ്യന്തരമന്ത്രി പ്രഖ്യാപിച്ചു. കഠിനാധ്വാനം കൊണ്ട് ഒരു 'മിനി ഇന്ത്യ'യായി മാറിയ പെരുമ്പാവൂരിന്റെ മണ്ണിൽ, അതിഥി തൊഴിലാളികളെ മറയാക്കി ലഹരി വിൽപന നടത്താൻ ശ്രമിക്കുന്ന ശക്തികളെ വെച്ചുപൊറുപ്പിക്കില്ലെന്നും അദ്ദേഹം കൂട്ടിച്ചേർത്തു.

ഭായ് കോളനിയിൽ നേരിട്ടെത്തും

പൊതുസമ്മേളനത്തിന് ശേഷം ആഭ്യന്തരമന്ത്രി രമേശ് ചെന്നിത്തലയും സംസ്ഥാന പോലീസ് മേധാവി റവാഡ എ. ചന്ദ്രശേഖറും പെരുമ്പാവൂരിലെ പ്രശസ്തമായ അതിഥി തൊഴിലാളി കേന്ദ്രമായ 'ഭായ് കോളനി' സന്ദർശിക്കും. ലഹരി മാഫിയകളുടെ ചൂഷണത്തിന് ഇതരസംസ്ഥാന തൊഴിലാളികൾ ഇരയാകുന്നത് തടയുക എന്ന ലക്ഷ്യത്തോടെയാണ് ഈ സന്ദർശനം. കോളനിയിലെ താമസക്കാരായ അതിഥി തൊഴിലാളികളുമായി ആഭ്യന്തരമന്ത്രി നേരിട്ട് കൂടിക്കാഴ്ച നടത്തുകയും അവരുമായി സംവദിക്കുകയും ചെയ്യും.

തൊഴിലാളികൾക്കിടയിലെ ലഹരി ഉപയോഗം ഇല്ലാതാക്കുന്നതിനും അവർക്ക് ആവശ്യമായ ബോധവത്കരണം നൽകുന്നതിനും പോലീസിന്റെ പ്രത്യേക പദ്ധതികൾ വിശദീകരിക്കും. കുട്ടികളും മുതിർന്നവരും അതിഥി സഹോദരങ്ങളും ഒരേ മനസ്സോടെ ലഹരിവിരുദ്ധ പ്രതിജ്ഞയെടുത്ത് ഈ ദൗത്യത്തിൽ പങ്കാളികളാകണമെന്ന് അധികൃതർ അഭ്യർത്ഥിച്ചു. ബെന്നി ബഹനാൻ എംപി, പ്രാദേശിക എംഎൽഎമാർ, ജനപ്രതിനിധികൾ, ഉയർന്ന പോലീസ് ഉദ്യോഗസ്ഥർ എന്നിവരും പരിപാടികളിൽ ഉടനീളം പങ്കെടുത്തു.

---------------

Hindusthan Samachar / Roshith K