Chandighad, 03 ജൂലൈ (H.S.)

ചണ്ഡീഗഢ്: പഞ്ചാബ് നിയമസഭാ തെരഞ്ഞെടുപ്പ് അടുത്തിരിക്കെ സംസ്ഥാന കോൺഗ്രസിൽ ആഭ്യന്തര കലഹം രൂക്ഷമാകുന്നു. എഐസിസി പ്രഖ്യാപിച്ച പുതിയ സംഘടനാ പുനഃസംഘടനയിൽ അതൃപ്തി രേഖപ്പെടുത്തി മുൻ മുഖ്യമന്ത്രി ചരൺജിത് സിംഗ് ചന്നിയെ അനുകൂലിക്കുന്ന നേതാക്കൾ പരസ്യമായി രംഗത്തെത്തി. പാർട്ടി നേതൃത്വത്തിന് മേൽ സമ്മർദ്ദം ചെലുത്തുന്നതിന്റെ ഭാഗമായി ചന്നി പക്ഷത്തെ പ്രമുഖ നേതാക്കൾ ഡൽഹിയിലെത്തി കോൺഗ്രസ് ഹൈക്കമാൻഡിനെ നേരിൽ കാണാൻ ഒരുങ്ങുകയാണ്. തങ്ങളുടെ ആവശ്യങ്ങൾ അംഗീകരിച്ചില്ലെങ്കിൽ പാർട്ടി പദവികൾ കൂട്ടത്തോടെ രാജിവെക്കുമെന്ന ഭീഷണിയും ഇവർ ഉയർത്തുന്നുണ്ട്.

ചരൺജിത് സിംഗ് ചന്നിയുടെ വസതിയിൽ വെച്ച് വെള്ളിയാഴ്ച അടിയന്തര യോഗം ചേർന്ന ശേഷമാണ് അനുയായികൾ ഈ നിർണായക തീരുമാനത്തിലേക്ക് എത്തിയത്. പാർട്ടിയിൽ തങ്ങളുടെ നിലപാട് ശക്തമാക്കുന്നതിനും കേന്ദ്ര നേതൃത്വത്തിന്റെ ശ്രദ്ധ ഉടനടി ആകർഷിക്കുന്നതിനുമായി കൂട്ടരാജിയടക്കമുള്ള കടുത്ത തന്ത്രങ്ങളാണ് ചന്നി പക്ഷം ആലോചിക്കുന്നത്.

പ്രതിസന്ധിക്ക് കാരണം എന്ത്?

2027-ൽ നടക്കാനിരിക്കുന്ന പഞ്ചാബ് നിയമസഭാ തെരഞ്ഞെടുപ്പ് ലക്ഷ്യമിട്ട് കഴിഞ്ഞ ബുധനാഴ്ചയാണ് കോൺഗ്രസ് നേതൃത്വം സംസ്ഥാന പുനഃസംഘടന പ്രഖ്യാപിച്ചത്. എന്നാൽ നിലവിലെ അമൃന്ദർ സിംഗ് രാജ വ വാരിംഗിനെ (Amrinder Singh Raja Warring) പഞ്ചാബ് പിസിസി പ്രസിഡന്റായും പ്രതാപ് സിംഗ് ബജ്വയെ (Partap Singh Bajwa) നിയമസഭയിലെ പ്രതിപക്ഷ നേതാവായും നിലനിർത്താൻ ഹൈക്കമാൻഡ് തീരുമാനിക്കുകയായിരുന്നു.

പഞ്ചാബ് കോൺഗ്രസ് അധ്യക്ഷ സ്ഥാനത്തേക്ക് ഏറ്റവും കൂടുതൽ പരിഗണിക്കപ്പെട്ടിരുന്ന നേതാവായിരുന്നു ജലന്ധറിൽ നിന്നുള്ള പാർലമെന്റ് അംഗം കൂടിയായ ചരൺജിത് സിംഗ് ചന്നി. എന്നാൽ അദ്ദേഹത്തെ സംസ്ഥാന അധ്യക്ഷനാക്കുന്നതിന് പകരം തെരഞ്ഞെടുപ്പ് പ്രചാരണ സമിതിയുടെ (Campaign Committee) ചെയർമാനായി മാത്രമാണ് പാർട്ടി നിയമിച്ചത്. ഈ തീരുമാനത്തിൽ ചന്നി കടുത്ത അതൃപ്തിയിലാണ്. പുനഃസംഘടന പ്രഖ്യാപിച്ചതിന് പിന്നാലെ വ്യാഴാഴ്ച മുഴുവൻ ഫോൺ ഓഫാക്കി ബാഹ്യലോകവുമായി ബന്ധപ്പെടാതെ മാറിനിന്ന ചന്നി, വെള്ളിയാഴ്ച തന്റെ അനുയായികളുടെ യോഗം വിളിച്ചുചേർക്കുകയായിരുന്നു. ഇത് കോൺഗ്രസ് ക്യാമ്പുകളിൽ വലിയ ആശങ്കയ്ക്ക് വഴിവെച്ചിട്ടുണ്ട്.

മനീഷ് തിവാരിയുടെ പ്രതികരണം

ചന്നിക്ക് പുറമെ പഞ്ചാബിൽ നിന്നുള്ള മറ്റ് മുതിർന്ന നേതാക്കളും പുനഃസംഘടനയിൽ അസ്വസ്ഥരാണ്. പാർട്ടിയിൽ പദവികളൊന്നും ലഭിക്കാത്തതിൽ അതൃപ്തനായ പ്രമുഖ നേതാവ് മനീഷ് തിവാരി സാമൂഹിക മാധ്യമമായ 'എക്സിൽ' (X) പങ്കുവെച്ച കുറിപ്പും ചർച്ചയായിട്ടുണ്ട്. വ്യക്തികളുടെയും പ്രസ്ഥാനങ്ങളുടെയും അഭദ്രതാബോധത്തിന് (Insecurities) തന്റെ കൈവശം പ്രതിവിധികളൊന്നുമില്ലെന്നായിരുന്നു തിവാരി കുറിച്ചത്.

നിയമസഭാ തെരഞ്ഞെടുപ്പിന് മാസങ്ങൾ മാത്രം ബാക്കിനിൽക്കെ മുതിർന്ന നേതാക്കൾക്കിടയിലെ ഈ ഭിന്നത കോൺഗ്രസിന് വൻ തിരിച്ചടിയാവുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. ഹൈക്കമാൻഡ് ഇടപെട്ട് ചന്നി പക്ഷത്തെ ശാന്തരാക്കിയില്ലെങ്കിൽ പഞ്ചാബ് കോൺഗ്രസ് വീണ്ടും ഒരു വലിയ പിളർപ്പിലേക്ക് നീങ്ങാനുള്ള സാധ്യത തള്ളിക്കളയാനാവില്ല.

---------------

Hindusthan Samachar / Roshith K