Enter your Email Address to subscribe to our newsletters
New delhi, 30 ജൂലൈ (H.S.)
നീറ്റ് പരീക്ഷ ക്രമക്കേടില് പ്രതിഷേധിച്ച് ഡല്ഹിയില് നടന്ന വിദ്യാര്ഥി പ്രക്ഷോഭവുമായി ബന്ധപ്പെട്ട് പ്രതിഷേധക്കാര്ക്കെതിരെ രജിസ്റ്റര് ചെയ്തിരുന്ന കേസുകള് പിന്വലിക്കാന് ഡല്ഹി സര്ക്കാര് ഉത്തരവിട്ടു. പ്രക്ഷോഭത്തില് പങ്കെടുത്തവര്ക്കെതിരെയുള്ള നിയമനടപടികള് അവസാനിപ്പിക്കാനാണ് സര്ക്കാര് തീരുമാനിച്ചിരിക്കുന്നത്. ഇതുവരെ ഡല്ഹി പോലീസ് 13 എഫ്ഐആറുകളാണ് രജിസ്റ്റര് ചെയ്തിട്ടുള്ളതെന്ന് ഡല്ഹി ആഭ്യന്തര മന്ത്രാലയം വാര്ത്താക്കുറിപ്പില് വ്യക്തമാക്കിയിട്ടുണ്ട്.
സുപ്രീം കോടതിയുടെ ഉത്തരവുകളും നിലവിലുള്ള എഫ്ഐആറുകളും വിശദമായി പരിശോധിച്ച ശേഷമാണ് ഈ കേസുകളില് കൂടുതല് നടപടികള് വേണ്ടെന്ന തീരുമാനത്തില് സര്ക്കാര് എത്തിയത്. മുന്പ് ക്രിമിനല് പശ്ചാത്തലമില്ലാത്ത വിദ്യാര്ഥികള്ക്കെതിരെയുള്ള ഒരു തരത്തിലുള്ള ക്രിമിനല് നടപടികളും ഇനി മുന്നോട്ട് കൊണ്ടുപോകാന് ഉദ്ദേശിക്കുന്നില്ലെന്ന് സര്ക്കാര് അറിയിച്ചു.
ലെഫ്റ്റനന്റ് ഗവര്ണറുടെ നിര്ദ്ദേശപ്രകാരമാണ് ഡല്ഹി സര്ക്കാര് ഈ സുപ്രധാന ഉത്തരവ് പുറപ്പെടുവിച്ചിരിക്കുന്നത്. മറ്റ് പല സംസ്ഥാനങ്ങളും സമാനമായ രീതിയില് വിദ്യാര്ഥികള്ക്കെതിരെയുള്ള നിയമനടപടികള് അവസാനിപ്പിക്കാന് നേരത്തെ തീരുമാനിച്ചിരുന്നു. ഇതിന് പിന്നാലെയാണ് ഡല്ഹി സര്ക്കാര് കൂടി ഇപ്പോള് ഈ നിലപാട് സ്വീകരിച്ചിരിക്കുന്നത്.
നീറ്റ് പരീക്ഷാ ചോദ്യപേപ്പര് ചോര്ച്ചയ്ക്കെതിരെ ജന്തര് മന്തറില് നടന്ന വിദ്യാര്ഥി പ്രതിഷേധത്തിനിടെ വിന്യസിച്ച റാപ്പിഡ് ആക്ഷന് ഫോഴ്സിന്റെ വെടിമരുന്ന് ലോഗ് വിവരങ്ങള് സൂക്ഷിച്ചുവെക്കാന് കേന്ദ്രത്തോട് സുപ്രീം കോടതി നിര്ദ്ദേശിച്ചിരുന്നു. പ്രതിഷേധങ്ങള് പലപ്പോഴും ആത്മാര്ഥമായ ലക്ഷ്യത്തോടെയുള്ളതാണെങ്കിലും അവ ദുരുദ്ദേശ്യപരമായ ആവശ്യങ്ങള്ക്കും അട്ടിമറികള്ക്കുമായി വഴിതിരിച്ചുവിടപ്പെടാന് സാധ്യതയുണ്ടെന്നും അതിനാല് സാഹചര്യത്തിനനുസരിച്ചുള്ള നടപടികള് ആവശ്യമാണെന്നും കോടതി നിരീക്ഷിച്ചു.
ബ്യൂറോ ഓഫ് പൊലീസ് റിസര്ച്ച് ആന്ഡ് ഡെവലപ്മെന്റിന്റെ മാര്ഗനിര്ദ്ദേശങ്ങള് പരാമര്ശിച്ചുകൊണ്ട് അസാധാരണ സാഹചര്യങ്ങളില് പെല്ലറ്റ് ഗണ്ണുകള് ഉപയോഗിക്കാന് പൊലീസിന് അധികാരമുണ്ടെന്നും കോടതി ചൂണ്ടിക്കാട്ടി.
ക്രമസമാധാന പ്രശ്നങ്ങള് കൈകാര്യം ചെയ്യുന്നതിന് ലോഹനിര്മ്മിതമായ പെല്ലറ്റ് ഗണ്ണുകള് ഉപയോഗിക്കുന്നത് പൂര്ണ്ണമായും നിരോധിക്കണമെന്ന് ആവശ്യപ്പെട്ട് മുന് കേന്ദ്ര വിവരാവകാശ കമ്മീഷണറും വിരമിച്ച ഐപിഎസ് ഉദ്യോഗസ്ഥനുമായ യശോവര്ദ്ധന് ആസാദും പെല്ലറ്റ് ആക്രമണത്തില് പരിക്കേറ്റെന്ന് അവകാശപ്പെടുന്ന രണ്ട് വ്യക്തികളും ചേര്ന്ന് സമര്പ്പിച്ച പൊതുതാല്പര്യ ഹര്ജിയിലെ ആവശ്യകതയെകുറിച്ച് ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങുന്ന ബെഞ്ച് ചോദ്യങ്ങള് ഉന്നയിച്ചു.
ജനക്കൂട്ടത്തെ പിരിച്ചുവിടാന് പമ്പ്-ആക്ഷന് അല്ലെങ്കില് പ്രൊജക്റ്റൈല്-ആക്ഷന് ഗണ്ണുകളില് നിന്ന് പൂര്ണ്ണമായോ ഭാഗികമായോ ലോഹം കൊണ്ടുള്ള പെല്ലറ്റുകള് ഉപയോഗിക്കുന്നത് ഭരണഘടനാപരമായ മാനദണ്ഡങ്ങള്ക്ക് വിരുദ്ധമാണെന്ന് ചൂണ്ടിക്കാട്ടി, അത്തരം ആയുധങ്ങളുടെ ഉപയോഗത്തിന് രാജ്യവ്യാപകമായി നിരോധനം ഏര്പ്പെടുത്തണമെന്ന് ആവശ്യപ്പെട്ടാണ് ആസാദ് സുപ്രീം കോടതിയെ സമീപിച്ചത്.
ദേശീയ തലസ്ഥാനത്ത് നടന്ന നീറ്റ് പരീക്ഷാ ചോദ്യപേപ്പര് ചോര്ച്ചാ വിരുദ്ധ പ്രതിഷേധത്തിനിടെ പെല്ലറ്റ് ആക്രമണത്തില് പരിക്കേറ്റവര്ക്ക് മികച്ച ചികിത്സ നല്കാന് ഡല്ഹി സര്ക്കാരിനോട് ബെഞ്ച് ആവശ്യപ്പെട്ടു. 'കോക്രോച്ച് ജനതാ പാര്ട്ടി' ആഹ്വാനം ചെയ്ത പോലെ ജൂലൈ 20-ലെ പ്രതിഷേധങ്ങളില് പെല്ലറ്റ് ഗണ്ണുകള് ഉപയോഗിച്ചതിനെക്കുറിച്ച് പരിശോധിക്കാനും കോടതി സമ്മതിച്ചു. സംഭവത്തില് പരിക്കേറ്റവര്ക്കെല്ലാം മാതൃകാപരമായ നഷ്ടപരിഹാരവും സമഗ്രമായ ചികിത്സയും പുനരധിവാസവും നല്കണമെന്നും ഹര്ജി ആവശ്യപ്പെടുന്നു.
---------------
Hindusthan Samachar / Sreejith S
