Pathanamthitta , 30 ജൂലൈ (H.S.)

പത്തനംതിട്ട: സർക്കാർ ഉദ്യോഗസ്ഥരുടെ സ്ഥലംമാറ്റങ്ങളും ജോലിക്രമീകരണങ്ങളും തീരുമാനിക്കുന്നത് തങ്ങളാണെന്ന തുറന്ന ഭീഷണിയുമായി എൻജിഒ അസോസിയേഷൻ നേതാവ്. പത്തനംതിട്ട മല്ലപ്പള്ളി താലൂക്ക് ഓഫീസിൽ നടന്ന സംഘടനാ യോഗത്തിലാണ് എൻജിഒ അസോസിയേഷൻ സംസ്ഥാന കമ്മിറ്റിയംഗം പി.എസ്. വിനോദ് കുമാർ വിവാദമായ ഭീഷണി പ്രസംഗം നടത്തിയത്. പ്രസംഗത്തിന്റെ ശബ്ദരേഖ പുറത്തുവന്നതോടെ സംഭവം വലിയ വിവാദത്തിലേക്ക് വഴിമാറിയിരിക്കുകയാണ്.

മല്ലപ്പള്ളി താലൂക്ക് ഓഫീസിൽ വെച്ച് നടന്ന യോഗത്തിൽ ഉദ്യോഗസ്ഥരെ ഉദ്ദേശിച്ചായിരുന്നു നേതാവിന്റെ കടന്നാക്രമണം. റവന്യൂ വകുപ്പ് ഭരിക്കുന്നത് കോൺഗ്രസാണെന്ന നിലപാടിലാണ് സംഘടനയെന്നും, ഓഫീസുകളിൽ ആരൊക്കെ എന്തൊക്കെ ജോലികൾ ചെയ്യണമെന്നും, ആരെെയൊക്കെ എങ്ങോട്ടൊക്കെ സ്ഥലം മാറ്റണമെന്നും എൻജിഒ അസോസിയേഷൻ തീരുമാനമെടുത്ത് നടപ്പാക്കുമെന്നുമാണ് ശബ്ദരേഖയിലുള്ളത്.

ആഗ്രഹിക്കുന്ന സ്ഥലത്ത് ജോലി ചെയ്യാമെന്ന് ആരും കരുതേണ്ടതില്ലെന്നും, തീരുമാനങ്ങൾ എടുക്കുന്നത് ഉന്നത ഉദ്യോഗസ്ഥരല്ലെന്നും പ്രസംഗത്തിൽ തുറന്നടിക്കുന്നുണ്ട്. മറ്റ് സംഘടനകളിൽ പ്രവർത്തിക്കുന്നവർക്ക് ആവശ്യമുണ്ടെങ്കിൽ എൻജിഒ അസോസിയേഷനിൽ ചേരാമെന്ന മുന്നറിയിപ്പും ഇയാൾ നൽകുന്നുണ്ട്. ഉദ്യോഗസ്ഥരുടെ സ്വാഭാവികമായ സർവീസ് അവകാശങ്ങളെപ്പോലും വെല്ലുവിളിക്കുന്ന രീതിയിലായിരുന്നു യോഗത്തിലെ പരാമർശങ്ങൾ.

സർക്കാർ സ്ഥാപനങ്ങളിൽ ഭരണഘടനാപരമായ മേലധികാരികളുടെ ഉത്തരവുകൾക്ക് മുകളിൽ സംഘടനാ താല്പര്യങ്ങൾ അടിച്ചേൽപ്പിക്കാൻ ശ്രമിക്കുന്നത് ഭരണസംവിധാനത്തോടുള്ള പരസ്യമായ വെല്ലുവിളിയാണെന്ന ആക്ഷേപം ഇതിനകം ഉയർന്നുകഴിഞ്ഞു. ഇത്തരത്തിലുള്ള ഭീഷണികൾ സിവിൽ സർവീസിന്റെ സുഗമമായ പ്രവർത്തനത്തെയും ജീവനക്കാരുടെ ആത്മവീര്യത്തെയും പ്രതികൂലമായി ബാധിക്കുമെന്ന് വിലയിരുത്തപ്പെടുന്നു.

ശബ്ദരേഖ പുറത്തുവന്നതോടെ പൊതുജനമധ്യത്തിലും സര്വീസ് മേഖലയിലും ശക്തമായ പ്രതിഷേധമാണ് ഉയർന്നുവരുന്നത്. ഔദ്യോഗിക പദവികളെയും അഡ്മിനിസ്ട്രേറ്റീവ് തീരുമാനങ്ങളെയും മറികടന്ന് സംഘടനകൾ നടത്തുന്ന ഇത്തരം ഇടപെടലുകൾക്കെതിരെ കർശന നടപടി വേണമെന്ന് വിവിധ കോണുകളിൽ നിന്ന് ആവശ്യമുയരുന്നുണ്ട്.

കേരള എൻ.ജി.ഒ അസോസിയേഷൻ (NGOA) കേരളത്തിലെ വിവിധ സർക്കാർ വകുപ്പുകളിലെ ഗസറ്റഡ് അല്ലാത്ത ജീവനക്കാരെ പ്രതിനിധീകരിക്കുന്ന ഒരു പ്രമുഖ സർവീസ് സംഘടനയാണ്.സംഘടനയുടെ അവലോകനം

- ലക്ഷ്യം: ജീവനക്കാരുടെ അവകാശങ്ങൾ, ക്ഷേമ സംരക്ഷണം, സാമൂഹിക സേവന പ്രവർത്തനങ്ങൾ.

- നേതൃത്വം: സംസ്ഥാന പ്രസിഡന്റ് എ.എം. ജാഫർ ഖാൻ, ജനറൽ സെക്രട്ടറി എ.പി. സുനിൽ എന്നിവർ നയിക്കുന്നു.

- ഘടന: 15 സംഘടനാ ജില്ലകളും 157-ലധികം ബ്രാഞ്ച് കമ്മിറ്റികളും ഉണ്ട് (ന്യൂഡൽഹിയിലെ കേരള ഹൗസ് ബ്രാഞ്ച് ഉൾപ്പെടെ).

---------------

Hindusthan Samachar / Roshith K