Alapuzha, 04 ജൂലൈ (H.S.)

ആലപ്പുഴ: ചേർത്തലയിൽ ദേശീയപാതയിൽ വൻ ഗർത്തം രൂപപ്പെട്ട സംഭവത്തിൽ അടിയന്തര സുരക്ഷാ ഓഡിറ്റിന് ഉത്തരവിട്ട് ജില്ലാ കളക്ടർ. പൊതുമരാമത്ത് വകുപ്പ് (PWD), ജല അതോറിറ്റി (KWA) എന്നിവർ സംയുക്തമായി നടത്തിയ പ്രാഥമിക പരിശോധനയ്ക്ക് ശേഷം നൽകിയ റിപ്പോർട്ടിന്റെ അടിസ്ഥാനത്തിലാണ് കളക്ടറുടെ ഈ കർശന നടപടി. എന്നാൽ, മുൻപ് ദേശീയപാതയിലുണ്ടായ മറ്റ് പല അപകടങ്ങൾക്ക് പിന്നാലെയും പ്രഖ്യാപിച്ച സുരക്ഷാ ഓഡിറ്റുകൾ പലതും ഇപ്പോഴും എങ്ങുമെത്താതെ ഫയലുകളിൽ ഉറങ്ങുകയാണെന്ന ആക്ഷേപം ജനങ്ങൾക്കിടയിൽ ശക്തമാണ്.

മാനദണ്ഡങ്ങൾ ലംഘിച്ചുള്ള പൈപ്പ് ലൈൻ സ്ഥാപിക്കൽ

ദേശീയപാതയ്ക്ക് അടിയിലൂടെ സുരക്ഷാ മുന്നറിയിപ്പുകൾ പൂർണ്ണമായും അവഗണിച്ചാണ് പൈപ്പ് ലൈൻ സ്ഥാപിച്ചതെന്ന് ജല അതോറിറ്റിയുടെയും പൊതുമരാമത്ത് വകുപ്പിന്റെയും റിപ്പോർട്ടിൽ വ്യക്തമാക്കുന്നു. നിർമ്മാണ ചട്ടങ്ങൾ അനുസരിച്ച് അതിശക്തമായ ഇരുമ്പ് പൈപ്പുകൾ (Iron Pipes) സ്ഥാപിക്കേണ്ട സ്ഥാനത്ത് കുറഞ്ഞ ഗുണനിലവാരമുള്ള ഫൈബർ പൈപ്പുകളാണ് ഇവിടെ സ്ഥാപിച്ചത്.

ഇത്തരത്തിൽ സുരക്ഷാ മാനദണ്ഡങ്ങൾ പാലിക്കാതെ പൈപ്പ് സ്ഥാപിച്ചതിനെ തുടർന്ന് ജലസമ്മർദ്ദം താങ്ങാനാവാതെ പൈപ്പ് പൊട്ടുകയായിരുന്നു. പൈപ്പ് പൊട്ടി വെള്ളം പുറത്തേക്ക് ഒഴുക്കി പാതയ്ക്ക് അടിയിലെ മണ്ണും മണലും ഒലിച്ചുപോയതാണ് റോഡിന് നടുവിൽ വൻ ഗർത്തം രൂപപ്പെടാൻ കാരണമായത്.

അപകടസാധ്യത മുന്നിൽക്കണ്ട് ഫൈബർ പൈപ്പുകൾ എത്രയും വേഗം മാറ്റിസ്ഥാപിക്കണമെന്ന് ജല അതോറിറ്റി കരാർ കമ്പനിക്ക് നേരത്തെ തന്നെ കർശന മുന്നറിയിപ്പ് നൽകിയിരുന്നു. എന്നാൽ ഈ ഔദ്യോഗിക നിർദ്ദേശം പാടെ അവഗണിച്ചാണ് കരാറുകാരൻ നിർമ്മാണവുമായി മുന്നോട്ട് പോയത്.

വൻ ദുരന്തം ഒഴിവായത് തലനാരിഴയ്ക്ക്

പുതിയതായി നിർമ്മിച്ച പാതയിൽ 12 അടിയോളം താഴ്ചയുള്ള ഭീമൻ കുഴിയാണ് രൂപപ്പെട്ടത്. തിരക്കേറിയ സമയത്ത് ബസിന് തൊട്ടുപിന്നാലെ വന്ന ബൈക്ക് യാത്രികൻ പെട്ടെന്ന് വാഹനം നിർത്തിയതുകൊണ്ട് മാത്രമാണ് വൻ ദുരന്തം ഒഴിവായത്. കായൽ മണൽ ഉപയോഗിച്ചുള്ള അശാസ്ത്രീയമായ നിർമ്മാണമാണ് ഇതിന് പിന്നിലെന്ന ആരോപണവുമായി രാഷ്ട്രീയ പാർട്ടികളും രംഗത്തെത്തിയിട്ടുണ്ട്.

പൈപ്പ് ലൈൻ മാറ്റി സ്ഥാപിക്കുന്നതിൽ കരാറുകാരന് സംഭവിച്ച ഗുരുതരമായ വീഴ്ചയെക്കുറിച്ച് സമഗ്രമായ അന്വേഷണം നടത്തുമെന്നും, ദേശീയപാതയുടെ മറ്റ് ഭാഗങ്ങളിലും സമാനമായ രീതിയിൽ അശാസ്ത്രീയ നിർമ്മാണങ്ങൾ നടന്നിട്ടുണ്ടോ എന്ന് സുരക്ഷാ ഓഡിറ്റിലൂടെ കണ്ടെത്തുമെന്നും അധികൃതർ അറിയിച്ചു. സുരക്ഷാ ക്രമീകരണങ്ങൾ പൂർത്തിയാക്കാതെ നിർമ്മാണം തുടരാൻ അനുവദിക്കില്ലെന്ന നിലപാടിലാണ് നാട്ടുകാരും ജനപ്രതിനിധികളും.

---------------

Hindusthan Samachar / Roshith K