Kerala, 05 ജൂലൈ (H.S.)

പാപ്പിനിശ്ശേരി: കണ്ണൂർ ജില്ലയുടെ വിവിധ പ്രദേശങ്ങളിൽ ആഫ്രിക്കൻ ഒച്ചുകളുടെ ശല്യം അതീവ ഗുരുതരമായ പ്രതിസന്ധി സൃഷ്ടിക്കുന്നു. കഴിഞ്ഞ കുറച്ചു ദിവസങ്ങളായി ജില്ലയിലെ പല ഗ്രാമങ്ങളിലും നഗരപ്രദേശങ്ങളിലും ആയിരക്കണക്കിന് ആഫ്രിക്കൻ ഒച്ചുകളാണ് പെറ്റുപെരുകുന്നത്. തുടർച്ചയായ മഴയും അന്തരീക്ഷത്തിലെ ഈർപ്പവുമാണ് ഇവയുടെ പെട്ടെന്നുള്ള വംശവർദ്ധനവിന് കാരണമായി ചൂണ്ടിക്കാണിക്കപ്പെടുന്നത്. ഒച്ചുശല്യം രൂക്ഷമായതോടെ ജനജീവിതം പൂർണ്ണമായും ദുസ്സഹമായിരിക്കുകയാണ്.

രാത്രികാലങ്ങളിലാണ് ഇവ കൂട്ടത്തോടെ ജനവാസ മേഖലകളിലേക്ക് ഇറങ്ങുന്നത്. വീട്ടുപറമ്പുകളിലെയും തോട്ടങ്ങളിലെയും വിലപിടിപ്പുള്ള ചെടികൾ, പച്ചക്കറി വിളകൾ, വാഴ, തെങ്ങിൻ തൈകൾ എന്നിവ ഇവ വ്യാപകമായി തിന്നു നശിപ്പിക്കുന്നുണ്ട്. കർഷകർക്ക് ഇത് വലിയ രീതിയിലുള്ള സാമ്പത്തിക നഷ്ടമാണ് ഉണ്ടാക്കുന്നത്. നേരം പുലരുമ്പോൾ വീടുകളുടെ മതിലുകളിലും വരാന്തകളിലും കതകുകളിലും വരെ ഒച്ചുകൾ ഒട്ടിപ്പിടിച്ചിരിക്കുന്ന കാഴ്ചയാണ് കാണാൻ സാധിക്കുന്നത്.

ജനങ്ങളെ ആശങ്കയിലാഴ്ത്തി ആരോഗ്യ ഭീഷണി

കേവലം കൃഷിനാശത്തിൽ മാത്രം ഒതുങ്ങുന്നതല്ല ആഫ്രിക്കൻ ഒച്ചുകൾ സൃഷ്ടിക്കുന്ന പ്രശ്നങ്ങൾ. വീടുകളിലെ ശുദ്ധജലസ്രോതസ്സുകളായ കിണറുകളിലും ടാങ്കുകളിലും ഇവ വീണ് ചത്തുപൊങ്ങുന്നത് കുടിവെള്ളം മലിനമാകുന്നതിന് കാരണമാകുന്നുണ്ട്. പലയിടങ്ങളിലും കിണറ്റിലെ വെള്ളം ഉപയോഗിക്കാൻ പറ്റാത്ത അവസ്ഥയിലാണ്.

ഇതിനുപുറമേ, വീടിനകങ്ങളിലേക്ക് വരെ ഒച്ചുകൾ അരിച്ചുകയറുന്നത് വീട്ടമ്മമാരെയും കുട്ടികളെയും വലിയ ഭീതിയിലാഴ്ത്തുന്നു. ആഫ്രിക്കൻ ഒച്ചുകളുടെ ശരീരത്തിൽ കാണപ്പെടുന്ന ചില പരാദങ്ങൾ മനുഷ്യരിൽ തലച്ചോറിനെ ബാധിക്കുന്ന മസ്തിഷ്ക ജ്വരം (മെനിഞ്ചൈറ്റിസ്) പോലുള്ള മാരക രോഗങ്ങൾക്ക് കാരണമാകുമെന്ന ശാസ്ത്രീയ മുന്നറിയിപ്പുകൾ നാട്ടുകാരുടെ ആശങ്ക ഇരട്ടിയാക്കുകയാണ്.

വ്യാപനം ഈ പ്രദേശങ്ങളിൽ

കാടുമൂടിക്കിടക്കുന്നതും ഈർപ്പം കൂടിയതുമായ പ്രദേശങ്ങളാണ് ഒച്ചുകളുടെ പ്രധാന താവളങ്ങൾ. ജില്ലയിലെ പ്രധാനപ്പെട്ട പല കേന്ദ്രങ്ങളിലും നിലവിൽ സ്ഥിതി നിയന്ത്രണാതീതമാണ്.

-

ഇരിണാവ്

-

ചെറുകുന്ന്

-

കണ്ണപുരം റെയിൽവേ സ്റ്റേഷൻ പരിസരം

-

പാപ്പിനിശ്ശേരി

-

മയ്യിൽ

-

കയരളം

-

കുറ്റ്യാട്ടൂർ

-

മടക്കര

-

അലവിൽ

-

പയ്യന്നൂർ

തുടങ്ങി ജില്ലയുടെ ഒട്ടുമിക്ക ഭാഗങ്ങളിലും ഒച്ചുശല്യം അതിരൂക്ഷമായി തുടരുകയാണ്. റെയിൽവേ ട്രാക്കുകൾക്ക് ഇരുവശവുമുള്ള കാടുകളിൽ നിന്നും റെയിൽവേ സ്റ്റേഷൻ പരിസരങ്ങളിൽ നിന്നുമാണ് ഇവ കൂടുതൽ വ്യാപിക്കുന്നതെന്ന് യാത്രക്കാരും പ്രദേശവാസികളും പരാതിപ്പെടുന്നു.

പ്രതിരോധ നടപടികൾ അടിയന്തരമാക്കണം

നാട്ടുകാർ സ്വന്തം നിലയിൽ ഉപ്പും തുരിശും ലായനികളും തളിച്ച് ഒച്ചുകളെ നശിപ്പിക്കാൻ ശ്രമിക്കുന്നുണ്ടെങ്കിലും, ലക്ഷക്കണക്കിന് വരുന്ന ഒച്ചുകളെ പൂർണ്ണമായി ഇല്ലാതാക്കാൻ ഇത് പര്യാപ്തമല്ല. ഒച്ചിന്റെ മുട്ടകൾ മണ്ണിൽ അവശേഷിക്കുന്നതിനാൽ ഇവ വീണ്ടും പെരുകിക്കൊണ്ടേയിരിക്കുകയാണ്.

കൃഷിയും കുടിവെള്ളവും ഒരുപോലെ ഭീഷണിയിലാണ്. തദ്ദേശ സ്വയംഭരണ സ്ഥാപനങ്ങളും ആരോഗ്യ വകുപ്പും കൃഷി വകുപ്പും സംയുക്തമായി അടിയന്തര പ്രതിരോധ നടപടികൾ സ്വീകരിച്ചില്ലെങ്കിൽ ജില്ലയിൽ ഇതൊരു വലിയ പകർച്ചവ്യാധി ഭീഷണിയായി മാറും, എന്ന് പ്രദേശവാസികൾ ഒരേസ്വരത്തിൽ പറയുന്നു.

തദ്ദേശ സ്ഥാപനങ്ങളുടെ നേതൃത്വത്തിൽ തൊഴിലുറപ്പ് തൊഴിലാളികളെയും സന്നദ്ധ പ്രവർത്തകരെയും ഉൾപ്പെടുത്തി വലിയ തോതിലുള്ള ശുചീകരണ പ്രവർത്തനങ്ങളും ഒച്ചുനിർമ്മാർജ്ജന ക്യാമ്പയിനുകളും യുദ്ധകാലാടിസ്ഥാനത്തിൽ ആരംഭിക്കണമെന്നാണ് ഇപ്പോൾ വരുന്ന് പ്രധാന ആവശ്യം.

---------------

Hindusthan Samachar / Roshith K