Kalpetta, 08 ജൂലൈ (H.S.)

കൽപ്പറ്റ: വയനാട് മേപ്പാടിക്കടുത്ത് കള്ളാടിയിലുണ്ടായ കനത്ത മണ്ണിടിച്ചിൽ ദുരന്തബാധിത പ്രദേശം മുഖ്യമന്ത്രി വി.ഡി. സതീശൻ സന്ദർശിച്ചു. ദുരന്തസ്ഥലത്തെ നേരിട്ടുള്ള സ്ഥിതിഗതികൾ വിലയിരുത്താനും രക്ഷാപ്രവർത്തനങ്ങൾ ഏകോപിപ്പിക്കാനുമായിരുന്നു മുഖ്യമന്ത്രിയുടെ അടിയന്തര സന്ദർശനം. വിവിധ വകുപ്പുകളിലെ മന്ത്രിമാരും ജനപ്രതിനിധികളും ഉന്നത ഉദ്യോഗസ്ഥരും അദ്ദേഹത്തോടൊപ്പമുണ്ടായിരുന്നു. ടണൽ റോഡ് പദ്ധതി പ്രദേശത്ത് അടിഞ്ഞുകൂടിയ മണ്ണ് കനത്ത മഴയിൽ ഒലിച്ചിറങ്ങിയാണ് കള്ളാടിയിൽ വൻ ദുരന്തമുണ്ടായത്.

ദുരന്തത്തിൽ വീടുകളും ജീവനോപാധികളും നഷ്ടപ്പെട്ട് ദുരിതാശ്വാസ ക്യാമ്പുകളിൽ കഴിയുന്ന ജനങ്ങളെ മുഖ്യമന്ത്രി നേരിട്ട് കണ്ട് ആശ്വസിപ്പിച്ചു. നിലവിൽ ദുരിതാശ്വാസ ക്യാമ്പ് പ്രവർത്തിക്കുന്ന മേപ്പാടി ഗവൺമെന്റ് പോളിടെക്നിക് കോളജിലാണ് അദ്ദേഹം ആദ്യമെത്തിയത്. ക്യാമ്പിലെ സൗകര്യങ്ങൾ വിലയിരുത്തിയ അദ്ദേഹം, ദുരന്തബാധിതർക്ക് ആവശ്യമായ ഭക്ഷണം, വസ്ത്രം, മരുന്നുകൾ എന്നിവ കൃത്യമായി ലഭ്യമാക്കുന്നുണ്ടെന്ന് ഉറപ്പുവരുത്താൻ ഉദ്യോഗസ്ഥർക്ക് നിർദ്ദേശം നൽകി.

ആശുപത്രിയിലും ദുരിതാശ്വാസ ക്യാമ്പിലും സന്ദർശനം

ദുരിതാശ്വാസ ക്യാമ്പ് സന്ദർശിച്ച ശേഷം കള്ളാടി ദുരന്തത്തിൽ പരുക്കേറ്റ് ചികിത്സയിൽ കഴിയുന്നവരെ കാണാനായി മുഖ്യമന്ത്രി വിംസ് (WIMS) ആശുപത്രിയിലെത്തി. അപകടത്തിൽപ്പെട്ട് വിവിധ വാർഡുകളിലും തീവ്രപരിചരണ വിഭാഗത്തിലും കഴിയുന്നവരെ സന്ദർശിച്ച അദ്ദേഹം അവരുടെ ആരോഗ്യനിലയെക്കുറിച്ച് ഡോക്ടർമാരോട് ചോദിച്ചറിഞ്ഞു. പരുക്കേറ്റവർക്ക് ഏറ്റവും മികച്ചതും സൌജന്യവുമായ ചികിത്സ ഉറപ്പാക്കാൻ ആശുപത്രി അധികൃതർക്ക് പ്രത്യേക നിർദ്ദേശം നൽകിയിട്ടുണ്ട്. ദുരന്തത്തിൽ പരുക്കേറ്റവർക്ക് ആവശ്യമായ എല്ലാവിധ സാമ്പത്തിക, അടിയന്തര സഹായങ്ങളും സർക്കാർ മുൻകൈ എടുത്ത് നൽകുമെന്നും അദ്ദേഹം ഉറപ്പുനൽകി.

മുഖ്യമന്ത്രിയുടെ പ്രധാന നിർദ്ദേശങ്ങൾ:

-

ക്യാമ്പുകളിൽ കഴിയുന്നവർക്ക് തടസ്സമില്ലാതെ വൈദ്യസഹായവും അവശ്യസാധനങ്ങളും ഉറപ്പാക്കുക.

-

അപകടത്തിൽ പരുക്കേറ്റവരുടെ പൂർണ്ണമായ ചികിത്സാ ചെലവ് സർക്കാർ വഹിക്കും.

-

ഇനിയും അപകടസാധ്യത നിലനിൽക്കുന്ന മേഖലകളിൽ നിന്ന് ആളുകളെ അടിയന്തരമായി സുരക്ഷിത സ്ഥാനങ്ങളിലേക്ക് മാറ്റുക.

കളക്ടറേറ്റിൽ അടിയന്തര അവലോകനയോഗം

ദുരന്തമേഖലയിലെ സന്ദർശനത്തിന് ശേഷം വയനാട് ജില്ലാ കളക്ടറേറ്റിൽ മുഖ്യമന്ത്രി വി.ഡി. സതീശന്റെ അധ്യക്ഷതയിൽ അടിയന്തര അവലോകനയോഗം ചേരും. മന്ത്രിമാർ, ജില്ലാ കളക്ടർ, റവന്യൂ-ദുരന്തനിവാരണ വകുപ്പുകളിലെ ഉന്നത ഉദ്യോഗസ്ഥർ, ജനപ്രതിനിധികൾ എന്നിവർ യോഗത്തിൽ പങ്കെടുക്കും.

തുടർന്ന് നടത്തേണ്ട പുനരധിവാസ പ്രവർത്തനങ്ങൾ, നിലവിലെ രക്ഷാപ്രവർത്തന പുരോഗതി, കനത്ത മഴ തുടരുന്ന പശ്ചാത്തലത്തിൽ ജില്ലയിൽ സ്വീകരിക്കേണ്ട ജാഗ്രതാ നടപടികൾ എന്നിവ യോഗത്തിൽ വിശദമായി ചർച്ച ചെയ്യും. ടണൽ പദ്ധതി പ്രദേശത്ത് നിർമ്മാണാവശിഷ്ടങ്ങൾ അശാസ്ത്രീയമായി തള്ളിയതാണ് ദുരന്തത്തിന്റെ ആക്കം കൂട്ടിയതെന്ന പരാതികൾ ഉയർന്ന സാഹചര്യത്തിൽ, നിർമ്മാണ കമ്പനിക്കെതിരെ സ്വീകരിക്കേണ്ട തുടർനടപടികളും യോഗത്തിന്റെ പരിഗണനയ്ക്ക് വരും. വരും ദിവസങ്ങളിലും ജില്ലയിൽ കനത്ത മഴ പ്രവചിക്കപ്പെട്ടിട്ടുള്ളതിനാൽ അതീവ ജാഗ്രത പുലർത്താൻ ഭരണകൂടത്തിന് മുഖ്യമന്ത്രി നിർദ്ദേശം നൽകിയിട്ടുണ്ട്.

---------------

Hindusthan Samachar / Roshith K