Kozhikode, 08 ജൂലൈ (H.S.)

കോഴിക്കോട്: മംഗളൂരു സെൻട്രൽ – ഗോവ വന്ദേഭാരത് എക്സ്പ്രസ് ട്രെയിൻ സർവീസ് കോഴിക്കോട് വരെ ദീർഘിപ്പിക്കണമെന്ന ആവശ്യം വീണ്ടും സജീവ ചർച്ചയാകുന്നു. കേന്ദ്രമന്ത്രി സുരേഷ് ഗോപി ഇക്കാര്യം ഉന്നയിച്ച് കേന്ദ്ര റെയിൽവേ മന്ത്രി അശ്വിനി വൈഷ്ണവിന് ഔദ്യോഗികമായി കത്തു നൽകിയതോടെയാണ് മലബാറിലെ യാത്രക്കാരുടെ ഈ ദീർഘകാല ആവശ്യം വീണ്ടും റെയിൽവേ മന്ത്രാലയത്തിന്റെ പരിഗണനയിലേക്ക് എത്തിയിരിക്കുന്നത്.

നിലവിൽ യാത്രക്കാരുടെ കുറവുമൂലം വലിയ പ്രതിസന്ധി നേരിടുന്ന ഈ വന്ദേഭാരത് സർവീസ് കോഴിക്കോട്ടേക്ക് നീട്ടുന്നത് വൻ വിജയമാകുമെന്നാണ് വിലയിരുത്തൽ. സർവീസ് കേരളത്തിലേക്ക് നീട്ടുന്നത് ഇരു സംസ്ഥാനങ്ങളിലെയും വിനോദസഞ്ചാര മേഖലയ്ക്കും ഒപ്പം കശ്മീർ ഉൾപ്പെടെയുള്ള ദീർഘദൂര യാത്രകൾ ആസൂത്രണം ചെയ്യുന്നവർക്കും വലിയ ഉണർവ് നൽകുമെന്ന് സുരേഷ് ഗോപി ചൂണ്ടിക്കാട്ടി. തീർത്ഥാടന കേന്ദ്രമായ കൊല്ലൂർ മൂകാംബിക ക്ഷേത്രത്തിലേക്ക് പോകുന്ന ഭക്തർക്കായി ബൈന്ദൂരിൽ സ്റ്റോപ്പ് അനുവദിക്കണമെന്ന ആവശ്യവും അദ്ദേഹം കത്തിൽ ഉന്നയിച്ചിട്ടുണ്ട്.

പകുതിയിലേറെ സീറ്റുകൾ ഒഴിഞ്ഞുകിടക്കുന്നു; സമയം അനുകൂലം

കേരളത്തിൽ നിലവിലുള്ള മറ്റ് വന്ദേഭാരത് ട്രെയിനുകൾ 150 ശതമാനത്തിലേറെ യാത്രക്കാരുമായി (Occupancy) മികച്ച ലാഭത്തിൽ സർവീസ് നടത്തുമ്പോൾ, മംഗളൂരു - ഗോവ റൂട്ടിൽ കാര്യമായ തിരക്കില്ല. മിക്ക ദിവസങ്ങളിലും ആകെ ശേഷിയുടെ വെറും 30 ശതമാനം യാത്രക്കാർ മാത്രമാണ് ഈ ട്രെയിനിൽ യാത്ര ചെയ്യുന്നത്. ഈ സാഹചര്യത്തിലാണ് സർവീസ് ദീർഘിപ്പിച്ചാൽ കൂടുതൽ ലാഭകരമാകുമെന്ന കണക്കുകൂട്ടൽ ശക്തമാകുന്നത്.

നിലവിലെ സമയക്രമം അനുസരിച്ച്, വ്യാഴാഴ്ച ഒഴികെയുള്ള ദിവസങ്ങളിൽ രാവിലെ 8.30-ന് മംഗളൂരു സെൻട്രലിൽ നിന്ന് പുറപ്പെടുന്ന വന്ദേഭാരത്, രാത്രി 10.45-നാണ് തിരിച്ചെത്തുന്നത്. അതായത്, രാത്രി 10.45 മുതൽ പിറ്റേന്ന് രാവിലെ 8.30 വരെ ഏകദേശം 10 മണിക്കൂറിലധികം ട്രെയിൻ മംഗളൂരുവിൽ വെറുതെ കിടക്കുകയാണ് ചെയ്യുന്നത്. നിലവിലെ ഈ സമയക്രമത്തിൽ യാതൊരു മാറ്റവും വരുത്താതെ തന്നെ, രാത്രിയിൽ ഈ വണ്ടി കോഴിക്കോട്ടേക്ക് നീട്ടാനും പുലർച്ചെ തിരികെ മംഗളൂരുവിൽ എത്തിക്കാനും സാധിക്കും. ഇത് മലബാറിലുള്ള മലയാളികൾക്ക് ഏറെ പ്രയോജനപ്പെടും.

റെയിൽവേയുടെ മുൻ റിപ്പോർട്ടും അനുകൂലം

ട്രെയിൻ കോഴിക്കോട്ടേക്ക് നീട്ടുന്നത് പ്രായോഗികമാണെന്ന് കാണിച്ച് മുൻപ് റെയിൽവേ പ്രാദേശിക അധികൃതർ അനുകൂല റിപ്പോർട്ട് നൽകിയിരുന്നു. രാത്രി സമയങ്ങളിൽ ട്രെയിൻ നിർത്തിയിടാൻ കോഴിക്കോട് റെയിൽവേ സ്റ്റേഷനിൽ പ്ലാറ്റ്ഫോം ഒഴിവുണ്ടെന്നതും, പാതയിൽ കൂടുതൽ ട്രെയിനുകൾ ഓടിക്കാനുള്ള ട്രാക്ക് ശേഷിയുണ്ടെന്നതും (Line Capacity) ഇതിന് അനുകൂല ഘടകങ്ങളായി ഉദ്യോഗസ്ഥർ ചൂണ്ടിക്കാണിച്ചിരുന്നു. എന്നാൽ കർണാടകയിലെ ചില രാഷ്ട്രീയ കോണുകളിൽ നിന്നുള്ള എതിർപ്പിനെത്തുടർന്ന് അന്ന് റെയിൽവേ ബോർഡ് അവസാന നിമിഷം ഈ നീക്കത്തിൽ നിന്ന് പിന്മാറുകയായിരുന്നു.

പ്രധാന നേട്ടങ്ങൾ:

-

തീർത്ഥാടകർക്ക് ആശ്വാസം: കൊല്ലൂർ മൂകാംബിക, ഉഡുപ്പി, മുരുഡേശ്വർ തുടങ്ങിയ പ്രമുഖ തീർത്ഥാടന കേന്ദ്രങ്ങളിലേക്ക് പോകുന്ന വടക്കൻ കേരളത്തിലെ ഭക്തർക്ക് ഈ സർവീസ് വലിയ അനുഗ്രഹമാകും.

-

ചികിത്സാ സൗകര്യം: മലബാറിൽ നിന്ന് മംഗളൂരുവിലെ പ്രമുഖ ആശുപത്രികളിൽ ചികിത്സ തേടി പോകുന്ന രോഗികൾക്കും അവരുടെ ബന്ധുക്കൾക്കും യാത്ര സുഗമമാകും.

-

ടൂറിസം വികസനം: കേരളത്തിൽ നിന്ന് ഗോവയിലേക്ക് വേഗത്തിൽ യാത്ര ചെയ്യാൻ ആഗ്രഹിക്കുന്ന വിനോദസഞ്ചാരികൾക്ക് ഏറ്റവും മികച്ച ഓപ്ഷനായി ഇത് മാറും.

യാത്രക്കാരുടെ സംഘടനകളും ജനപ്രതിനിധികളും നിരന്തരമായി ആവശ്യപ്പെടുന്ന ഈ പദ്ധതിക്ക് സുരേഷ് ഗോപിയുടെ ഇടപെടലോടെ ഉടൻ തന്നെ റെയിൽവേ ബോർഡിന്റെ അംഗീകാരം ലഭിക്കുമെന്ന പ്രതീക്ഷയിലാണ് മലബാറിലെ റെയിൽവേ യാത്രക്കാർ.

---------------

Hindusthan Samachar / Roshith K