Hyderabad , 01 ഓഗസ്റ്റ് (H.S.)

ഹൈദരാബാദ് / ന്യൂഡൽഹി: പ്രധാനമന്ത്രി നരേന്ദ്ര മോദിക്കെതിരെ സോഷ്യൽ മീഡിയയിലൂടെ അധിക്ഷേപകരമായ രീതിയിൽ വ്യാജ ചിത്രങ്ങളും വീഡിയോകളും പ്രചരിപ്പിച്ച സംഭവത്തിൽ കമ്പനിയുടെ ഇന്ത്യ മേധാവിക്കെതിരെ കേസെടുത്തതിന് പിന്നാലെ പ്രതികരണവുമായി സാങ്കേതികഭീമന്മാരായ മെറ്റ (Meta). വിഷയവുമായി ബന്ധപ്പെട്ട് അന്വേഷണ ഏജൻസികളുമായി നിരന്തരം ബന്ധപ്പെടുന്നുണ്ടെന്നും നിയമനടപടികളോടും അന്വേഷണത്തോടും പൂർണ്ണമായി സഹകരിക്കുന്നുണ്ടെന്നും ഫേസ്ബുക്കിന്റെയും ഇൻസ്റ്റാഗ്രാമിന്റെയും മാതൃസ്ഥാപനമായ മെറ്റ വക്താവ് പ്രസ്താവനയിൽ വ്യക്തമാക്കി.

നീറ്റ് (NEET) ചോദ്യപേപ്പർ ചോർച്ചയുമായി ബന്ധപ്പെട്ട് കോക്ക്റോച്ച് ജനതാ പാർട്ടി (CJP) നടത്തിയ പ്രതിഷേധങ്ങൾക്കിടെയാണ് പ്രധാനമന്ത്രിക്കെതിരെ വ്യാജമായി നിർമ്മിച്ചതും അധിക്ഷേപകരവുമായ പോസ്റ്റുകളും റീലുകളും സോഷ്യൽ മീഡിയയിൽ വ്യാപകമായി പ്രചരിച്ചത്. ഇതിന് പിന്നിൽ പ്രവർത്തിച്ച അക്കൗണ്ട് ഉടമകൾക്കെതിരെയും മെറ്റ ഇന്ത്യ മേധാവിക്കെതിരെയുമാണ് ഹൈദരാബാദ് സൈബർ ക്രൈം പോലീസ് കേസ് രജിസ്റ്റർ ചെയ്തത്.

ബി.ജെ.പി പരാതിയും ആരോപണങ്ങളും

തെലങ്കാന ബി.ജെ.പി സോഷ്യൽ മീഡിയ വിഭാഗം അംഗമായ ടി. സായികിരൺ ഗൗഡ് നൽകിയ പരാതിയുടെ അടിസ്ഥാനത്തിലാണ് പോലീസിന്റെ നടപടി. ജൂലൈ 29-ന് സോഷ്യൽ മീഡിയ പരിശോധിക്കുന്നതിനിടയിലാണ് പ്രധാനമന്ത്രിയെ അപകീർത്തിപ്പെടുത്തുന്ന തരത്തിലും രാജ്യത്തിന്റെ അഖണ്ഡതയ്ക്ക് വിരുദ്ധമായ രീതിയിലുമുള്ള ഉള്ളടക്കങ്ങൾ പ്രചരിക്കുന്നത് ശ്രദ്ധയിൽപ്പെട്ടതെന്ന് പരാതിയിൽ പറയുന്നു.

-

ലിങ്കുകൾ കൈമാറി: ഇൻസ്റ്റാഗ്രാമിലും ഫേസ്ബുക്കിലും പോസ്റ്റ് ചെയ്ത അധിക്ഷേപകരമായ 20 റീലുകളുടെയും പോസ്റ്റുകളുടെയും യു.ആർ.എല്ലുകൾ (URL) പരാതിക്കാരൻ പോലീസിന് കൈമാറിയിട്ടുണ്ട്.

-

സുരക്ഷാ ഭീഷണി: ഇത്തരത്തിലുള്ള വ്യാജ പ്രചാരണങ്ങൾ സമൂഹത്തിൽ വിദ്വേഷം പടർത്താനും തെറ്റായ വിവരങ്ങൾ പ്രചരിപ്പിക്കാനും ദേശീയ സുരക്ഷയ്ക്കും അഖണ്ഡതയ്ക്കും ഭീഷണിയുയർത്താനും കാരണമാകുമെന്ന് പരാതിയിൽ ചൂണ്ടിക്കാട്ടി.

-

മെറ്റയ്ക്കെതിരെ നടപടി: ഇത്തരം അധിക്ഷേപകരമായ ഉള്ളടക്കങ്ങൾ തങ്ങളുടെ പ്ലാറ്റ്ഫോമുകളിലൂടെ പ്രചരിക്കാൻ അനുവദിച്ചതിന് മെറ്റയ്ക്കെതിരെയും കർശന നിയമനടപടി സ്വീകരിക്കണമെന്ന് ബി.ജെ.പി ആവശ്യപ്പെട്ടു.

ശക്തമായ വകുപ്പുകൾ ചുമത്തി കേസ്

ബി.ജെ.പി ഭാരവാഹിയുടെ പരാതിയിൽ ഹൈദരാബാദ് സൈബർ ക്രൈം പോലീസ് സ്റ്റേഷനിൽ എ.എസ്.ഐ കെ. ഹരിറാമിന്റെ നേതൃത്വത്തിലാണ് എഫ്.ഐ.ആർ രജിസ്റ്റർ ചെയ്തിരിക്കുന്നത്. ഐ.ടി ആക്ടിലെ 66(C), 67 വകുപ്പുകൾക്ക ഒപ്പം ഭാരതീയ ന്യായ സംഹിതയിലെ (BNS) 353(2), 336(4) തുടങ്ങിയ കർശനമായ വകുപ്പുകളും കേസിൽ ഉൾപ്പെടുത്തിയിട്ടുണ്ട്.

സംഭവത്തെ തുടർന്ന് തെലങ്കാന ബി.ജെ.പി വക്താവ് എൻ.വി. സുഭാഷ് രംഗത്തെത്തുകയും പ്രധാനമന്ത്രിക്കെതിരെ അപകീർത്തികരമായ പ്രചാരണം നടത്തുന്നവർക്കെതിരെ മാതൃകാപരമായ നിയമനടപടി വേണമെന്ന് ആവശ്യപ്പെടുകയും ചെയ്തു. ആശയപ്രകടന സ്വാതന്ത്ര്യം എന്നത് വ്യാജ പ്രചാരണങ്ങൾ നടത്താനും വ്യക്തിഹത്യ നടത്താനുമുള്ള ലൈസൻസല്ല എന്ന് അദ്ദേഹം ഓർമ്മിപ്പിച്ചു.

സോഷ്യൽ മീഡിയയിലൂടെയുള്ള അധിക്ഷേപ പ്രചാരണങ്ങൾ തടയാൻ കർശന നടപടികളുമായി മുന്നോട്ടുപോകാനാണ് സൈബർ പോലീസിന്റെ തീരുമാനം. കേസിൽ കൂടുതൽ വിവര ശേഖരണവും ഡിജിറ്റൽ തെളിവുകളുടെ പരിശോധനയും പുരോഗമിക്കുകയാണ്.

---------------

Hindusthan Samachar / Roshith K