Thiruvananthapuram, 01 ഓഗസ്റ്റ് (H.S.)

തിരുവനന്തപുരം: സംസ്ഥാനത്തിന്റെ വിവിധ ഭാഗങ്ങളിൽ പെയ്യുന്ന അതിതീവ്ര മഴയെത്തുടർന്ന് വ്യാപക നാശനഷ്ടങ്ങൾ റിപ്പോർട്ട് ചെയ്തു. മധ്യകേരളത്തിലെ മലയോര മേഖലകളിലാണ് മഴക്കെടുതി ഏറ്റവും രൂക്ഷമായി ബാധിച്ചിരിക്കുന്നത്. ഇടുക്കി, കോട്ടയം, പത്തനംതിട്ട ജില്ലകളിൽ വിവിധയിടങ്ങളിൽ ഉരുൾപൊട്ടലും ശക്തമായ മലവെള്ളപ്പാച്ചിലുമുണ്ടായി. നദികളും തോടുകളും കരകവിഞ്ഞൊഴുകിയതോടെ പ്രധാന നഗരങ്ങളിലും മലയോര ഗ്രാമങ്ങളിലും വെള്ളക്കെട്ട് രൂപപ്പെടുകയും നിരവധി കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിക്കുകയും ചെയ്തിട്ടുണ്ട്.

ഇടുക്കിയിലും കോട്ടയത്തും ഉരുൾപൊട്ടൽ; തീക്കോയിൽ കനത്ത പ്രഹരം

ഇടുക്കി ജില്ലയിലെ കുടയൂർമലയിലും കോട്ടയം തീക്കോയിയിലും പത്തനംതിട്ട നെല്ലിക്കാപാറയിലുമാണ് പ്രധാനമായും ഉരുൾപൊട്ടൽ ഉണ്ടായിരിക്കുന്നത്. മലയോര മേഖലകളിൽ പെയ്ത തോരാമഴയിൽ വലിയ തോതിൽ മണ്ണും പാറക്കല്ലുകളും ഇടിഞ്ഞുവീണു.

കോട്ടയം ജില്ലയിലെ കിഴക്കൻ മേഖലയായ തീക്കോയിയിൽ ഉണ്ടായ ഉരുൾപൊട്ടലിൽ പ്രദേശത്ത് വലിയ നാശനഷ്ടമാണുണ്ടായത്. മലവെള്ളപ്പാച്ചിലിൽ നിരവധി വീടുകളിൽ വെള്ളം കയറി. വീടുകളുടെ ഉമ്മറത്തോളവും മുറികളിലും വെള്ളവും ചെളിയും അടിച്ചുകയറിയതോടെ പ്രദേശവാസികൾ ദുരിതത്തിലായി. നിറുത്തിയിട്ടിരുന്ന നിരവധി വാഹനങ്ങളും ഒഴുക്കിൽപെട്ട് പോയിട്ടുണ്ട്. പലയിടത്തും മണ്ണിടിഞ്ഞതിനെ തുടർന്ന് ഗതാഗതം പൂർണ്ണമായും തടസ്സപ്പെട്ടു.

ഈരാറ്റുപേട്ടയും പാലായും വെള്ളത്തിനടിയിൽ; ഗതാഗതം സ്തംഭിച്ചു

മീനച്ചിലാറും അനുബന്ധ തോടുകളും കരകവിഞ്ഞൊഴുകിയതോടെ ഈരാറ്റുപേട്ട, പാലാ നഗരങ്ങൾ പൂർണ്ണമായും വെള്ളക്കെട്ടിലായി.

-

ഈരാറ്റുപേട്ട: ഈരാറ്റുപേട്ടയിലെ താഴ്ന്ന പ്രദേശങ്ങളിലെല്ലാം വെള്ളപ്പൊക്ക ഭീഷണിയിലാണ്. നഗരത്തിലെ പ്രധാന റോഡുകളും കടകമ്പോളങ്ങളും വെള്ളത്തിലായതോടെ ആളുകൾ കടകളിൽ നിന്നും സാധനങ്ങൾ സുരക്ഷിത സ്ഥാനങ്ങളിലേക്ക് മാറ്റുകയാണ്.

-

പാലാ: പാലാ ടൗണിലെ താഴ്ന്ന മേഖലകളിൽ വെള്ളം കയറി ഗതാഗതം തടസ്സപ്പെട്ടു. റോഡുകളിൽ വെള്ളം ഉയർന്നതിനെ തുടർന്ന് വാഹനഗതാഗതം നിരോധിച്ചു.

-

പത്തനംതിട്ട: നെല്ലിക്കാപാറയിലും സമീപ പ്രദേശങ്ങളിലും മലവെള്ളപ്പാച്ചിൽ രൂപപ്പെട്ടു. നദികളിൽ ജലനിരപ്പ് ഉയർന്നതിനാൽ പത്തനംതിട്ടയിലെ മലയോര ഗ്രാമങ്ങളിൽ അതീവ ജാഗ്രതാ നിർദ്ദേശം നൽകിയിട്ടുണ്ട്.

രക്ഷാപ്രവർത്തനം പുരോഗമിക്കുന്നു; ജാഗ്രതാ നിർദ്ദേശം

ദുരന്തനിവാരണ സേനയും (NDRF) ഫയർഫോഴ്സും ജനപ്രതിനിധികളും പ്രദേശവാസികളും ചേർന്ന് ദുരിതബാധിത മേഖലകളിൽ രക്ഷാപ്രവർത്തനം നടത്തിവരികയാണ്. അപകടസാധ്യതയുള്ള മേഖലകളിൽ നിന്ന് ആളുകളെ അടിയന്തരമായി ദുരിതാശ്വാസ ക്യാമ്പുകളിലേക്ക് മാറ്റിപ്പാർപ്പിച്ചു. മലയോര മേഖലകളിലേക്കുള്ള രാത്രികാല യാത്രകൾ പൂർണ്ണമായും ഒഴിവാക്കണമെന്ന് റവന്യൂ അധികൃതർ നിർദ്ദേശിച്ചു. അതിതീവ്ര മഴ തുടരാൻ സാധ്യതയുള്ളതിനാൽ പുഴയോരങ്ങളിലും ചരിവുപ്രദേശങ്ങളിലും താമസിക്കുന്നവർ ജാഗ്രത പാലിക്കണമെന്നും ജില്ലാ ഭരണകൂടങ്ങൾ അറിയിച്ചു.

---------------

Hindusthan Samachar / Roshith K