Kannur, 01 ഓഗസ്റ്റ് (H.S.)

കണ്ണൂർ: മതിൽക്കെട്ടുകൾക്കുള്ളിൽ അടക്കപ്പെട്ട ജീവിതങ്ങൾക്ക് പ്രതീക്ഷയുടെയും അതിജീവനത്തിന്റെയും പുതിയ സുഗന്ധമേകി കണ്ണൂർ സെൻട്രൽ ജയിൽ. ജയിൽ വളപ്പിലും അകത്തെ എല്ലാ ബ്ലോക്കുകളിലും ആരംഭിച്ച പദ്ധതിയിലൂടെ ഇപ്പോൾ മുല്ലപ്പൂ സുഗന്ധം പരക്കുകയാണ്. പരീക്ഷണാടിസ്ഥാനത്തിൽ ആരംഭിച്ച മുല്ലപ്പൂക്കൃഷി വൻ വിജയമായതോടെ അടുത്ത ദിവസങ്ങളിൽ തന്നെ ഈ പൂക്കൾ നഗരത്തിലെ വിപണികളിലും പൊതുജനങ്ങൾക്കിടയിലും ലഭ്യമായിത്തുടങ്ങും.

2500 ചട്ടികളിൽ വളർന്ന പൂന്തോട്ടം

തടവുകാരുടെ പുനരധിവാസവും മാനസികോല്ലാസവും ലക്ഷ്യമിട്ട് ഹരിത കേരള മിഷന്റെയും കതിരൂർ സർവീസ് സഹകരണ ബാങ്കിന്റെയും പൂർണ്ണ സഹകരണത്തോടെയാണ് പദ്ധതിക്ക് തുടക്കമിട്ടത്. ജയിലിനു മുന്നിലും അകത്തുള്ള വിവിധ ബ്ലോക്കുകളിലുമായി ആകെ 2500 ചട്ടികളിലാണ് മുല്ലച്ചെടികൾ നട്ടുപിടിപ്പിച്ചത്. കൃത്യമായ പരിചരണവും പരിപാലനവും ലഭിച്ചതോടെ ചെടികളെല്ലാം ഒന്നടങ്കം പൂവിട്ടു തുടങ്ങി.

തടവുകാരുടെ സജീവ പങ്കാളിത്തമാണ് പദ്ധതിയുടെ വിജയത്തിന് പിന്നിൽ. ചെടികൾക്ക് വെള്ളമൊഴിക്കുന്നതും വളമിടുന്നതും കീടനിയന്ത്രണം നടത്തുന്നതുമെല്ലാം ജയിൽ അന്തേവാസികൾ തന്നെയാണ്. കാഠിന്യമേറിയ ജയിൽ അന്തരീക്ഷത്തിൽ ഇത്തരം കാർഷിക പ്രവർത്തനങ്ങൾ തടവുകാർക്ക് വലിയ ആശ്വാസവും മാനസിക സന്തോഷവും പകരുന്നുണ്ടെന്ന് അധികൃതർ വ്യക്തമാക്കുന്നു.

കണ്ണൂരിലെ പൂക്കടകളിലേക്ക് ജയിലിലെ മുല്ലപ്പൂക്കൾ

വിളവെടുത്ത പൂക്കൾ അടുത്ത ദിവസം മുതൽ കണ്ണൂർ നഗരത്തിലെ വിവിധ പൂക്കടകളിൽ വിൽപനയ്ക്കെത്തിക്കും. വിപണിയിൽ മുല്ലപ്പൂവിന് വൻ ഡിമാൻഡുള്ളതിനാൽ ജയിലിന് ഇതിലൂടെ നല്ലൊരു വരുമാനവും പ്രതീക്ഷിക്കുന്നുണ്ട്. തടവുകാരുടെ അധ്വാനത്തിന് കൃത്യമായ വേതനവും ഈ പദ്ധതിയിലൂടെ കണ്ടെത്താൻ സാധിക്കും.

നേരത്തെയും പച്ചക്കറിക്കൃഷിയിലും ജൈവ ഉൽപ്പന്ന നിർമ്മാണത്തിലും കണ്ണൂർ സെൻട്രൽ ജയിൽ മാതൃകാപരമായ നേട്ടങ്ങൾ കൈവരിച്ചിരുന്നു. ഇതിന് പിന്നാലെയാണ് ഇപ്പോൾ പൂക്കൃഷിയിലും വലിയ വിജയം കൈവരിച്ചിരിക്കുന്നത്. മുല്ലപ്പൂക്കൃഷിയുടെ വിജയം കണക്കിലെടുത്ത് വരും ദിവസങ്ങളിൽ കൂടുതൽ സ്ഥലങ്ങളിലേക്ക് കൃഷി വ്യാപിപ്പിക്കാനും പദ്ധതിയുണ്ട്.

---------------

Hindusthan Samachar / Roshith K