Newdelhi , 10 ഓഗസ്റ്റ് (H.S.)

ന്യൂഡൽഹി: പാർലമെന്റിലെ സ്തംഭനാവസ്ഥ തുടരുന്നതിനിടെ പാർലമെന്ററി കാര്യ മന്ത്രി കിരൺ റിജിജുവിന്റെ പ്രസ്താവനകളെ ശക്തമായി തള്ളി എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ എം.പി. പാർലമെന്റിൽ ദിവസങ്ങളോളം തുടർന്ന മൗനത്തിനൊടുവിൽ അവസാന മണിക്കൂറുകളിൽ മാത്രം പ്രതികരിക്കാൻ തയാറായ കേന്ദ്ര സർക്കാരിന്റെയും പാർലമെന്ററി കാര്യ മന്ത്രിയുടെയും നിലപാട് ജനങ്ങളെ വഞ്ചിക്കുന്നതാണെന്ന് അദ്ദേഹം ആരോപിച്ചു.

വിദേശ സംഭാവന നിയന്ത്രണ നിയമത്തിലെ (FCRA) ഭേദഗതി ബിൽ സഭയിൽ അവതരിപ്പിക്കാൻ കേന്ദ്ര സർക്കാരിനെ വെല്ലുവിളിച്ച കെ.സി. വേണുഗോപാൽ, രാജ്യത്തെ സന്നദ്ധ സംഘടനകളുടെയും (NGO) ചാരിറ്റബിൾ സ്ഥാപനങ്ങളുടെയും പ്രവർത്തനങ്ങളെ ബോധപൂർവം ലക്ഷ്യം വെക്കുന്ന ഇത്തരമൊരു വിവാദ ബിൽ സഭയിൽ കൊണ്ടുവരാനോ പാസാക്കാനോ പ്രതിപക്ഷ സഖ്യം ഒരുകാരണവശാലും അനുവദിക്കില്ലെന്ന് വ്യക്തമാക്കി.

ചർച്ച വലിച്ചു നീട്ടുകയല്ല വേണ്ടത്; അമിത് ഷാ മറുപടി പറയണം

പാർലമെന്റ് സഭ നിർത്തിവെച്ച് ചർച്ച ചെയ്യണമെന്ന പ്രതിപക്ഷത്തിന്റെ ആവശ്യങ്ങൾ കേന്ദ്ര സർക്കാർ അംഗീകരിച്ചിട്ടുണ്ടെന്ന പ്രചാരണം തെറ്റാണെന്ന് കെ.സി. വേണുഗോപാൽ ചൂണ്ടിക്കാട്ടി. പാർലമെന്റിന്റെ സമയം നഷ്ടപ്പെടുത്തി വിഷയങ്ങൾ ബോധപൂർവം വലിച്ചു നീട്ടുന്ന തന്ത്രമാണ് സർക്കാർ പയറ്റുന്നത്. കേവലം വാക്കുകൾ കൊണ്ട് ചർച്ച നീട്ടിക്കൊണ്ടുപോകുകയല്ല കേന്ദ്രം ചെയ്യേണ്ടത്.

വിദ്യാർത്ഥി പ്രക്ഷോഭങ്ങൾക്ക് നേരെ നടന്ന പൊലീസ് അതിക്രമങ്ങളിലടക്കം കേന്ദ്ര ആഭ്യന്തരമന്ത്രി അമിത് ഷാ നേരിട്ട് സഭയിൽ എത്തി പ്രസ്താവന നടത്തണം. പ്രതിപക്ഷത്തിന്റെ ചോദ്യങ്ങളിൽ നിന്ന് ആഭ്യന്തരമന്ത്രി ഒളിച്ചോടുകയാണ്. പാർലമെന്ററി ജനാധിപത്യത്തോട് അല്പമെങ്കിലും ബഹുമാനമുണ്ടെങ്കിൽ ആഭ്യന്തരമന്ത്രി നേരിട്ട് വന്ന് മറുപടി പറയാൻ തയാറാകണമെന്ന് വേണുഗോപാൽ ആവശ്യപ്പെട്ടു.

അയോധ്യ സംഭാവന കൊള്ളയിൽ പ്രതിഷേധം കടുപ്പിച്ച് പ്രതിപക്ഷം

അയോധ്യ രാമക്ഷേത്ര നിർമാണത്തിനായി ശേഖരിച്ച കോടിക്കണക്കിന് രൂപയുടെ പൊതു സംഭാവനകളിൽ വലിയ രീതിയിലുള്ള തട്ടിപ്പും കൊള്ളയുമാണ് നടന്നിരിക്കുന്നതെന്ന് കെ.സി. വേണുഗോപാൽ ആരോപിച്ചു. രാജ്യത്തെ ഓരോ സാധാരണക്കാരന്റെയും വീടുകളിൽ നിന്ന് സ്വരൂപിച്ച ഭക്തിയുടെ പ്രതീകമായ പണവും സ്വർണ്ണവുമാണ് കൊള്ളയടിക്കപ്പെട്ടിരിക്കുന്നത്. ഇത് രാജ്യത്തെ ഓരോ വീടും കൊള്ളയടിച്ചതിന് തുല്യമായ ഗുരുതരമായ കുറ്റകൃത്യമാണ്.

ശ്രീരാമജന്മഭൂമി തീർത്ഥക്ഷേത്ര ട്രസ്റ്റിൽ നടന്നതായി പുറത്തുവന്ന തട്ടിപ്പിനെക്കുറിച്ച് കേന്ദ്ര സർക്കാർ അടിയന്തരമായി പ്രതികരിക്കണം. ഈ വിഷയത്തിൽ പ്രതിപക്ഷം ഉന്നയിച്ച കൃത്യമായ ആവശ്യങ്ങളോട് ഇതുവരെയും സർക്കാരോ പ്രധാനമന്ത്രിയോ പ്രതികരിക്കാൻ തയാറായിട്ടില്ല. സുപ്രീം കോടതി ജഡ്ജിയുടെ മേൽനോട്ടത്തിൽ സ്വതന്ത്രവും ഉന്നതതലത്തിലുമുള്ള അന്വേഷണം പ്രഖ്യാപിക്കാൻ സർക്കാർ ഭയപ്പെടുന്നത് എന്തുകൊണ്ടാണെന്ന് വേണുഗോപാൽ ചോദിച്ചു.

വിട്ടുവീഴ്ചയില്ലാതെ പോരാട്ടം തുടരും

രാജ്യത്തെ ന്യൂനപക്ഷ സ്ഥാപനങ്ങളെയും സന്നദ്ധ സംഘടനകളെയും തകർക്കാനും സർക്കാർ നിയന്ത്രണത്തിലാക്കാനും ഉദ്ദേശിച്ചാണ് എഫ്.സി.ആർ.എ ബില്ലുമായി കേന്ദ്രം മുന്നോട്ടുപോകുന്നത്. ഈ വിഷയത്തിലും അയോധ്യ സംഭാവന തട്ടിപ്പിലും പ്രതിപക്ഷം ഉന്നയിച്ച ഗുരുതരമായ ചോദ്യങ്ങൾക്ക് മറുപടി നൽകാതെ വിഷയം വഴിതിരിച്ചുവിടാനാണ് കിരൺ റിജിജു ശ്രമിക്കുന്നത്.

പൊതുജനങ്ങളുടെ ആശങ്കകളും പ്രതിപക്ഷത്തിന്റെ ഉന്നയിക്കപ്പെട്ട ആവശ്യങ്ങളും പരിഗണിക്കുന്നത് വരെ സഭയ്ക്കുള്ളിലും പുറത്തും ശക്തമായ പ്രതിഷേധം തുടരുമെന്നും സഭയിൽ ജനകീയ വിഷയങ്ങൾ ഉന്നയിക്കുന്നതിൽ നിന്ന് പിന്നോട്ട് പോകില്ലെന്നും കെ.സി. വേണുഗോപാൽ വാർത്താസമ്മേളനത്തിൽ കൂട്ടിച്ചേർത്തു.

---------------

Hindusthan Samachar / Roshith K