Kannur, 10 ഓഗസ്റ്റ് (H.S.)

കണ്ണൂർ: പൊലീസിനെ നിരന്തരം വെല്ലുവിളിച്ചതിനു പിന്നാലെ, ദിവസങ്ങൾ നീണ്ട തിരച്ചിലിനൊടുവിൽ ഒളിവിലായിരുന്ന ക്രിമിനൽ കേസ് പ്രതി അർജുൻ ആയങ്കി പിടിയിലായതോടെ കണ്ണൂരിലെ സിപിഎം വീണ്ടും രാഷ്ട്രീയമായി പ്രതിരോധത്തിലാകുന്നു. ആയങ്കിയുടെ അറസ്റ്റും അതിനുപിന്നാലെ ഉയർന്ന പാർട്ടി ബന്ധത്തെക്കുറിച്ചുള്ള ചർച്ചകളുമാണ് സിപിഎമ്മിന് തലവേദന സൃഷ്ടിക്കുന്നത്. നിയമനടപടികൾ ശക്തമാകുമ്പോഴും സൈബറിടങ്ങളിൽ ആയങ്കിക്ക് ലഭിക്കുന്ന വൻ സ്വീകാര്യതയും, പാർട്ടിയുടെ ഔദ്യോഗിക നേതൃത്വം ഇയാളെ തള്ളിപ്പറയുമ്പോൾ ഉണ്ടാകുന്ന സൈബർ അമർഷവുമാണ് നിലവിലെ വൻ വിവാദങ്ങൾക്ക് ആധാരം.

കൂടെ നിന്നവരെ മറക്കരുത്: ആയങ്കിയുടെ വൈകാരിക ഓർമ്മപ്പെടുത്തൽ

ഒളിവിലിരിക്കെ സോഷ്യൽ മീഡിയയിലൂടെ പൊലീസിനെയും രാഷ്ട്രീയ എതിരാളികളെയും വെല്ലുവിളിച്ച അർജുൻ ആയങ്കി, സിപിഎമ്മുമായുള്ള തന്റെ പഴയകാല ആത്മബന്ധം എടുത്തുപറഞ്ഞതാണ് പാർട്ടിയെ കൂടുതൽ സമ്മർദ്ദത്തിലാക്കിയത്. പ്രതിസന്ധികളും പ്രതികൂല സാഹചര്യങ്ങളും വന്നപ്പോൾ ഒപ്പം നിന്ന സഖാക്കളെ മറക്കരുതെന്ന് ഓർമ്മിപ്പിച്ച ആയങ്കി, മുൻപ് അഞ്ചു വർഷത്തോളം താൻ സിപിഎമ്മിനായി സജീവമായി പ്രവർത്തിച്ച കാര്യം പരസ്യമായി വ്യക്തമാക്കുകയുണ്ടായി.

ഒരു പാർട്ടി സഖാവിന് കുത്തേറ്റപ്പോൾ സ്വന്തം ജീവനും ജീവിതവും മറന്ന് തിരിച്ചടിക്കാനിറങ്ങുകയും തുടർന്ന് ജയിലിൽ കിടക്കേണ്ടി വരികയും ചെയ്തിട്ടുണ്ടെന്നാണ് ആയങ്കി സമൂഹമാധ്യമങ്ങളിലൂടെ വാദിച്ചത്. ശത്രുവിനേക്കാൾ വലിയ ശത്രുവായാണ് ഇപ്പോൾ എന്നെ കാണുന്നത്. പിന്തുണ വേണമെന്നില്ല, പക്ഷേ പിന്നിൽ നിന്ന് കുത്തരുത് എന്ന ആയങ്കിയുടെ വാക്കുകൾ പാർട്ടി സൈബർ അണികൾക്കിടയിൽ വലിയ തരംഗമാണ് സൃഷ്ടിച്ചത്.

എം.വി. ജയരാജന്റെ രൂക്ഷവിമർശനവും തിരിച്ചടിയും

അതേസമയം, അർജുൻ ആയങ്കിയെയും ക്വട്ടേഷൻ സംഘങ്ങളെയും പൂർണ്ണമായും തള്ളിപ്പറയുന്ന നിലപാടാണ് സിപിഎം സംസ്ഥാന സെക്രട്ടേറിയറ്റ് അംഗം എം.വി. ജയരാജൻ സ്വീകരിച്ചത്. അർജുൻ ആയങ്കിയെ തൂഫാൻ (കാറ്റ്) പോലെ തൂക്കിയെടുത്ത് അറസ്റ്റ് ചെയ്യണം എന്ന് പൊലീസിനോട് ആവശ്യപ്പെട്ട ജയരാജൻ, കേസുകളിൽ പ്രതിയായ ഒരാൾ പൊലീസിനെ പരസ്യമായി വെല്ലുവിളിച്ച് നടക്കുന്നതിൽ കടുത്ത ആശ്ചര്യം പ്രകടിപ്പിച്ചു.

ക്വട്ടേഷൻ-ഗുണ്ടാ സംഘങ്ങളുടെ യാതൊരുവിധ പിന്തുണയും സിപിഎമ്മിന് ആവശ്യമില്ലെന്നും, ആയങ്കിയെ ആരെങ്കിലും പിന്തുണയ്ക്കുന്നുണ്ടെങ്കിൽ അവർ ക്വട്ടേഷൻ സംഘങ്ങളെയാണ് പിന്തുണയ്ക്കുന്നതെന്നും അദ്ദേഹം ഉറപ്പിച്ചു പറഞ്ഞു. ആയങ്കി 'വളർന്നുവന്ന പാർട്ടി' എന്ന് വിശേഷിപ്പിച്ചത് ക്വട്ടേഷൻ പാർട്ടിയെ കുറിച്ചാണെന്നും പാർട്ടിക്ക് ഇയാളുമായി യാതൊരു ബന്ധവുമില്ലെന്നും അദ്ദേഹം വ്യക്തമാക്കി.

നേതാക്കൾക്കെതിരെ സൈബർ സഖാക്കളുടെ പോരാട്ടം

എന്നാൽ എം.വി. ജയരാജന്റെ ഈ പ്രതികരണത്തിന് പിന്നാലെ, സൈബറിടങ്ങളിൽ പാർട്ടിക്കായി പോരാടുന്ന ഒരുവിഭാഗം അണികളും ഗ്രൂപ്പുകളും ജയരാജനെതിരെ തിരിഞ്ഞത് പാർട്ടിയെ അമ്പരപ്പിച്ചിട്ടുണ്ട്. സോഷ്യൽ മീഡിയയിൽ പാർട്ടിയുടെ പ്രതിരോധ നിരയിലുള്ള 'സൈബർ സഖാക്കൾക്കിടയിൽ' അർജുൻ ആയങ്കിക്ക് വലിയ രീതിയിലുള്ള പിന്തുണയും സ്വീകാര്യതയുമുണ്ട്.

പാർട്ടിക്കായി തെരുവിൽ പോരാടുകയും കേസിൽപ്പെടുകയും ചെയ്തവരെ പ്രതിസന്ധിഘട്ടത്തിൽ നേതൃത്വം ഭയന്ന് തള്ളിപ്പറയുകയാണെന്നാണ് ഇവരുടെ ആരോപണം. കണ്ണൂരിലെ മുൻകാല പാർട്ടി തർക്കങ്ങളും ഡി വൈ എഫ് ഐ (DYFI) അണികളിലെ അഭിപ്രായവ്യത്യാസങ്ങളും വീണ്ടും മറനീക്കി പുറത്തുവരാൻ ഈ അറസ്റ്റ് വഴിയൊരുക്കിയിരിക്കുകയാണ്.

രാഷ്ട്രീയ പ്രത്യാഘാതങ്ങൾ

വിഷയം പ്രതിപക്ഷം കടുത്ത രാഷ്ട്രീയ ആയുധമാക്കിക്കഴിഞ്ഞു. കണ്ണൂരിലെ ക്വട്ടേഷൻ-സ്വർണ്ണക്കടത്ത് സംഘങ്ങൾക്ക് സിപിഎമ്മിന്റെ ഉന്നത നേതൃത്വവുമായി അടുത്ത ബന്ധമുണ്ടെന്ന പ്രതിപക്ഷ ആരോപണങ്ങൾക്ക് ആയങ്കിയുടെ പ്രസ്താവനകൾ കൂടുതൽ ബലം നൽകുന്നു. ഇപി ജയരാജൻ ഉൾപ്പെടെയുള്ള മുതിർന്ന നേതാക്കൾ ആയങ്കിക്ക് പാർട്ടിയുമായി ഒരു ബന്ധവുമില്ലെന്ന് ആവർത്തിച്ച് വ്യക്തമാക്കുന്നുണ്ടെങ്കിലും, സൈബർ പോരാളികൾക്കിടയിലെ ഭിന്നതയും ആയങ്കിയുടെ തുറന്നുപറച്ചിലുകളും സിപിഎം പ്രാദേശിക നേതൃത്വത്തെ വലിയ രീതിയിൽ പൊള്ളിക്കുന്നുണ്ട്.

---------------

Hindusthan Samachar / Roshith K