Kasarkod, 10 ഓഗസ്റ്റ് (H.S.)

കാസർഗോഡ്: കാസർഗോഡ് ജില്ലാ കളക്ടറേറ്റിലെ സീനിയർ ക്ലർക്ക് എ. ആശാലത (41) ജീവനൊടുക്കിയ സംഭവത്തിൽ അഡീഷണൽ ജില്ലാ മജിസ്ട്രേറ്റ് (എ.ഡി.എം)തല അന്വേഷണത്തിന് നിർദേശം നൽകി ജില്ലാ കളക്ടർ അർജുൻ പാണ്ഡ്യൻ. ഉദ്യോഗസ്ഥയുടെ ആകസ്മിക മരണത്തിൽ വകുപ്പുതല അന്വേഷണം നടത്തി അടിയന്തരമായി റിപ്പോർട്ട് സമർപ്പിക്കാനാണ് കളക്ടറുടെ ഉത്തരവ്. സംഭവത്തിൽ വിദ്യാ നഗർ പോലീസിന്റെ അന്വേഷണത്തിന് പുറമെയായിരിക്കും എ.ഡി.എമ്മിന്റെ വകുപ്പുതല അന്വേഷണം നടക്കുക.

ഈ മാസം ഏഴാം തീയതി വെള്ളിയാഴ്ച രാവിലെ പത്തു മണിയോടെയാണ് കളക്ടറേറ്റ് പരിസരത്തു വെച്ച് ആശാലത എലിവിഷം കഴിച്ചത്. അവശനിലയിലായ ഇവരെ ആദ്യം ചെങ്കള സഹകരണ ആശുപത്രിയിലും തുടർന്ന് വിദഗ്ധ ചികിത്സയ്ക്കായി കോഴിക്കോട്ടെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും ഓഗസ്റ്റ് ഒൻപതിന് ഞായറാഴ്ച ചികിത്സയിലിരിക്കെ മരണപ്പെടുകയായിരുന്നു. കളക്ടറേറ്റിലെ എസ്റ്റാബ്ലിഷ്മെന്റ് വിഭാഗത്തിൽ ജോലി ചെയ്തിരുന്ന ഇവരെ രണ്ടു മാസം മുൻപാണ് എൻഡോസൾഫാൻ സ്പെഷ്യൽ സെല്ലിലേക്ക് മാറ്റിയത്.

ആശുപത്രിയിൽ വെച്ച് പോലീസ് രേഖപ്പെടുത്തിയ മരണമൊഴിയിലാണ് താൻ നേരിട്ട കടുത്ത മാനസിക വിഷമം ആശാലത തുറന്നുപറഞ്ഞത്. ഓഫീസിലും വീട്ടിലും ഒറ്റപ്പെട്ടുപോയത് തന്നെ വലിയ രീതിയിൽ മാനസികമായി തളർത്തിയിരുന്നെന്നും കഴിഞ്ഞ കുറച്ചു ദിവസങ്ങളായി താൻ കടുത്ത മാനസിക സമ്മർദ്ദത്തിലായിരുന്നുവെന്നുമാണ് ആശാലത നൽകിയ മൊഴിയിലുള്ളത്. എന്നാൽ, സംഭവത്തിൽ ആർക്കെതിരെയും പ്രത്യേകം പരാതികളൊന്നും ഇവർ ഉന്നയിച്ചിട്ടില്ലെന്ന് പോലീസ് വ്യക്തമാക്കുന്നു.

കളക്ടറേറ്റ് ജീവനക്കാരിയുടെ ആത്മഹത്യ റവന്യൂ വകുപ്പിലും കളക്ടറേറ്റിലും വലിയ ഞെട്ടലുണ്ടാക്കിയിട്ടുണ്ട്. എൻ.ജി.ഒ യൂണിയൻ ജില്ലാ കൗൺസിൽ അംഗവും കളക്ടറേറ്റിലെ അക്ഷര ലൈബ്രറി ഭാരവാഹിയുമായിരുന്നു ആശാലത. എ.ഡി.എം നടത്തുന്ന വകുപ്പുതല അന്വേഷണത്തിൽ ഏതെങ്കിലും തരത്തിലുള്ള വീഴ്ചകളോ മാനസിക പീഡനങ്ങളോ നടന്നതായി കണ്ടെത്തിയാൽ കുറ്റക്കാർക്കെതിരെ ശക്തമായ നടപടി സ്വീകരിക്കുമെന്ന് ജില്ലാ കളക്ടറും റവന്യൂ മന്ത്രിയും വ്യക്തമാക്കിയിട്ടുണ്ട്.

വർദ്ധിച്ചുവരുന്ന ജോലി സമ്മർദ്ദമാണോ അതോ മറ്റ് വ്യക്തിപരമായ കാരണങ്ങളാണോ ആത്മഹത്യയിലേക്ക് നയിച്ചതെന്ന കാര്യത്തിൽ സി.ഐ.ഡി/പോലീസ് സംഘവും വിശദമായ മൊഴിയെടുപ്പ് തുടരുകയാണ്. പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകി. വിദേശത്തുള്ള ഭർത്താവ് അജയകുമാറും മക്കളായ യദുകൃഷ്ണനും അഗ്നിവേശും അടങ്ങുന്നതാണ് ആശാലതയുടെ കുടുംബം.

---------------

Hindusthan Samachar / Roshith K