Kannur, 10 ഓഗസ്റ്റ് (H.S.)

കണ്ണൂർ: ക്രിമിനൽ കേസ് പ്രതിയും കാപ്പ ചുമത്തപ്പെട്ട ഗുണ്ടാനേതാവുമായ അർജുൻ ആയങ്കിക്കൊപ്പം നിൽക്കുന്ന തരത്തിൽ പ്രചരിക്കുന്ന വ്യാജചിത്രത്തിനെതിരെ കടുത്ത നിലപാടുമായി സിപിഎം സംസ്ഥാന കമ്മിറ്റി അംഗവും മുതിർന്ന നേതാവുമായ പി. ജയരാജൻ. അർജുൻ ആയങ്കിയുടെ തോളിൽ കൈയിട്ട് നിൽക്കുന്ന ചിത്രമാണ് കഴിഞ്ഞ കുറച്ചുദിവസങ്ങളായി സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. എന്നാൽ ഇത് കൃത്രിമമായി നിർമ്മിച്ച എഐ (Artificial Intelligence) ചിത്രമാണെന്നും, ഇത്തരം വ്യാജപ്രചാരണങ്ങൾക്കെതിരെ ശക്തമായ നിയമനടപടി സ്വീകരിച്ചിട്ടുണ്ടെന്നും പി. ജയരാജൻ ഫെയ്സ്ബുക്ക് കുറിപ്പിലൂടെ വ്യക്തമാക്കി.

തന്റെ ശാരീരികാവസ്ഥയെപ്പോലും മറച്ചുവെച്ചുകൊണ്ട് നിർമ്മിച്ച വ്യാജചിത്രത്തെ പരിഹസിച്ചുകൊണ്ടാണ് പി. ജയരാജന്റെ പ്രതികരണം. ആർഎസ്എസ് ആക്രമണത്തിൽ നഷ്ടപ്പെട്ട തന്റെ വിരൽ എഐ സാങ്കേതികവിദ്യയിലൂടെ തിരികെ നൽകിയതിന് വ്യാജപ്രചാരകർക്ക് നന്ദിയുണ്ടെന്ന് അദ്ദേഹം ഫെയ്സ്ബുക്കിൽ കുറിച്ചു.

പി. ജയരാജന്റെ ഫെയ്സ്ബുക്ക് കുറിപ്പിന്റെ പൂർണ്ണരൂപം:

27 വർഷം മുൻപ് ഒരു തിരുവോണ നാളിൽ ആർഎസ്എസ് ക്രിമിനലുകൾ വെട്ടിയരിഞ്ഞതാണ് എന്റെ ഇടതുകൈയ്യിലെ പെരുവിരൽ. ഇപ്പോൾ ചിലർ എഐ സർജറിയിലൂടെ നഷ്ടപ്പെട്ട വിരൽ അടക്കം ചേർത്ത് തന്നിട്ടുണ്ട്. ഇത്തരം വ്യാജ പ്രചാരണത്തിനെതിരെ നിയമനടപടി തുടങ്ങി.

എഐ ദുരുപയോഗവും വ്യാജപ്രചാരണവും

1999 ഓഗസ്റ്റ് 25-ന് (തിരുവോണ നാളിൽ) കിഴക്കേ കതിരൂരിലെ തറവാട്ടുട്ടുവീട്ടിൽ വെച്ചാണ് പി. ജയരാജനുനേരെ ആർഎസ്എസ് ആക്രമണം ഉണ്ടാകുന്നത്. ആക്രമണത്തിൽ അദ്ദേഹത്തിന്റെ ഇടതുകൈയ്യിലെ പെരുവിരൽ നഷ്ടപ്പെടുകയും ശരീരത്തിലാകമാനം ഗുരുതരമായി പരിക്കേൽക്കുകയും ചെയ്തിരുന്നു. എന്നാൽ, ഇപ്പോൾ പ്രചരിക്കുന്ന ചിത്രത്തിൽ ഇടതുകൈ പൂർണ്ണ ആരോഗ്യത്തോടെ കാണാം. ഇതാണ് ചിത്രം എഐ ഉപയോഗിച്ച് നിർമ്മിച്ചതാണെന്ന് വ്യക്തമാക്കുന്ന ഏറ്റവും വലിയ തെളിവായി അദ്ദേഹം ചൂണ്ടിക്കാണിക്കുന്നത്.

കരിപ്പൂർ സ്വർണ്ണക്കടത്ത് കേസിലും വിവിധ അക്രമ സംഭവങ്ങളിലും പ്രതിയായ അർജുൻ ആയങ്കിയുമായി പി. ജയരാജന് വഴിവിട്ട ബന്ധമുണ്ടെന്ന തരത്തിലുള്ള പ്രചാരണങ്ങൾ നേരത്തെയും ചില കേന്ദ്രങ്ങൾ ഉയർത്തിയിരുന്നു. ക്രിമിനൽ സംഘങ്ങളെയും ഡീപ് ഫേക്ക് സാങ്കേതികവിദ്യയെയും ഉപയോഗിച്ച് പാർട്ടിയെയും മുതിർന്ന നേതാക്കളെയും പൊതുജനമധ്യത്തിൽ അധിക്ഷേപിക്കാനുള്ള രാഷ്ട്രീയ ഗൂഢാലോചനയാണ് ഇതിനു പിന്നിലെന്ന് സിപിഎം ആരോപിക്കുന്നു.

സംഭവത്തിൽ പൊലീസിനും സൈബർ സെല്ലിനും പരാതി നൽകിയതായും, ചിത്രം നിർമ്മിച്ചവരെയും അത് സോഷ്യൽ മീഡിയ പ്ലാറ്റ്ഫോമുകളിൽ പ്രചരിപ്പിച്ചവരെയും കണ്ടെത്തി മാതൃകാപരമായ ശിക്ഷ ഉറപ്പാക്കുമെന്നും ജയരാജൻ വ്യക്തമാക്കി. രാഷ്ട്രീയ എതിരാളികൾ ഇത്തരം വിലകുറഞ്ഞ മാർഗ്ഗങ്ങൾ ഉപയോഗിച്ച് തനിക്കെതിരെ വ്യാജപ്രചാരണം നടത്തുകയാണെന്നും അദ്ദേഹം കൂട്ടിച്ചേർത്തു.

---------------

Hindusthan Samachar / Roshith K